សកម្មជនសិទ្ធិមនុស្សតវ៉ាលើកបដាមុខរដ្ឋសភាប្រឆាំងពង្រាងច្បាប់អង្គការ
សកម្មជនសិទ្ធិមនុស្សមកពីសហគមន៍មូលដ្ឋានទូទាំង ២៤ ខេត្ត-រាជធានី ពាក់អាវយឺតខ្មៅ បង់កក្រមា លើកញតិ្តស្នាមមេដៃជាង ១ ម៉ឺន ឈរតវ៉ាព្រមទាំងស្រែកមេក្រូ ប្រឆាំងនឹងការបង្កើតច្បាប់សមាគមនិងអង្គការមិនមែនរដ្ឋាភិបាល។ សកម្មជនសិទិ្ធមនុស្សនៅតែអះអាងថាពង្រាងច្បាប់ថ្មីនោះ បានរឹតត្បិតសេរីភាពនិងសកម្មភាពរបស់សមាគម និងអង្គការនៅសហគមន៍មូលដ្ឋាន។ ក៏ប៉ុន្តែអ្នកនាំពាក្យក្រសួងមហាផ្ទៃ លោក ខៀវ សុភ័គ បានច្រានចោលហើយថា ក្រសួងមហាផ្ទៃនឹងពិនិត្យលើក្តីបារម្ភ និងអនុសាសន៍របស់សង្គមស៊ីវិល ដែលអាចនឹងមានការជួបប្រជុំលើកក្រោយៗទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
បង់កក្រមា ពាក់អាវយឺតពណ៌ខ្មៅ និងស្លៀកខោឬសំពត់ខ្មៅ សកម្មជនសិទ្ធិមនុស្សមកពីសហគមន៍មូលដ្ឋានទូទាំងប្រទេស បានឈរកាន់បដា ធ្វើពីក្រមា ជាង ២០០ ម៉ែត្រ បិទនូវញត្តិស្នាមមេដៃជាង១ម៉ឺនស្នាមមេដៃ។ ខណៈដែលរដ្ឋសភាបើកកិច្ចប្រជុំនៅព្រឹកថ្ងៃទី២០ធ្នូ ឆ្នាំ២០១១ សកម្មជនសិទ្ធិមនុស្សទាំងនោះ បានឈរតវ៉ា ដោយស្រែកមេក្រូ នៅមុខរដ្ឋសភា ដើម្បីប្រឆាំងនឹងពង្រាងច្បាប់សមាគម និងអង្គការមិនមែនរដ្ឋាភិបាល។
សេចក្តីថ្លែងការណ៍រួមរបស់ក្រុមសកម្មជនសិទ្ធិមនុស្សបង្ហាញថា សេចក្តីព្រាងច្បាប់លើកទី៤ ស្តីពីសមាគមនិងអង្គការមិនមែនរដ្ឋាភិបាលដែលរដ្ឋាភិបាលផ្សព្វផ្សាយ និងពិភាក្សាកាលពីថ្ងៃទី១៩ធ្នូម្សិលមិញ ធ្វើឡើងដើម្បីត្រួតត្រា ជាជាងលើកស្ទួយ និងពង្រឹងសង្គមស៊ីវិល។ ពង្រាងច្បាប់ថ្មីនោះ ធ្វើឲ្យបាត់បង់សិទ្ធិប្រជាពលរដ្ឋ និងលទ្ធិប្រជាធិបតេយ្យនៅកម្ពុជា។
តាមសេចក្តីថ្លែងការណ៍ សេចក្តីព្រាងច្បាប់ លើកទី៤ ស្តីពី សមាគម និងអង្គការមិនមែនរដ្ឋាភិបាល បានដាក់បន្ទុកយ៉ាងខ្លាំងទៅលើសង្គមស៊ីវិលនានា នៅថ្នាក់មូលដ្ឋានដែលបង្កើតឡើងដោយឆន្ទៈប្រជាពលរដ្ឋផ្ទាល់ ព្រមទាំងអង្គការមិនមែនរដ្ឋាភិបាលអន្តរជាតិ ដែលធ្វើការផ្នែកសិទ្ធិមនុស្សនិងលទ្ធិប្រជាធិបតេយ្យក្នុងប្រទេសកម្ពុជា។
ប្រជាសហគមន៍ដីធ្លី ព្រៃឈើ សហគមន៍នេសាទ និងសហជីពកម្មករ ក៏បានស្រែកទាមទារឲ្យ រដ្ឋសភា កុំទទួលយកពង្រាងច្បាប់ថ្មីនោះ មកអនុម័តឡើយ។
ក្រោយពីជួបជុំ សកម្មជនសិទ្ធិមនុស្ស បានយកបដាញត្តិក្រមាស្នាមមេដៃនោះ ប្រគល់ឲ្យអ្នកតំណាងរាស្ត្រគណបក្សសមរង្ស៊ី ដែលបានធ្វើពហិការ ដើរចេញពីកិច្ចប្រជុំរដ្ឋសភា នាព្រឹកថ្ងៃទី២០ធ្នូ ឆ្នាំ២០១១។
យ៉ាងណាក៏ដោយ លោកឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់វិទ្យុបារាំងអន្តរជាតិថា ក្រសួងមហាផ្ទៃ នឹងពិនិត្យលើការព្រួយបារម្ភ និងអនុសាសន៍របស់សង្គមស៊ីវិល ចំពោះពង្រាងច្បាប់ សមាគម និងអង្គការមិនមែនរដ្ឋាភិបាល។ ក្រសួងក៏នឹងរៀបចំឲ្យមានការជួបប្រជុំពិភាក្សាគ្នាលើកក្រោយៗទៀត។
តាមលោកឧត្តមសេនីយ៍ ច្បាប់ថ្មីនោះ មិនមែនបង្កើតឡើងដើម្បីបិទសិទ្ធិសេរីភាពសង្គមស៊ីវិលទេ។ ប៉ុន្តែជាគោលការណ៍គឺក្រសួងមហាផ្ទៃ ក៏ដូចរដ្ឋាភិបាល ត្រូវតែបង្កើតច្បាប់សមាគម និងអង្គការមិនមែនរដ្ឋាភិបាលស្របតាមការកំណត់ក្នុងរដ្ឋធម្មនុញ្ញ។
សូមរម្លឹកថា កាលពីព្រឹកថ្ងៃទី១៩ ខែធ្នូឆ្នាំ២០១១ ក្រសួងមហាផ្ទៃ បានបើកកិច្ចប្រជុំជាមួយសង្គមស៊ីវិលជាតិនិងអន្តរជាតិដើម្បីផ្តល់ឱកាសជាថ្មីម្តងទៀតដល់ក្រុមសង្គមស៊ីវិលឲ្យបញ្ចេញមតិលើពង្រាងច្បាប់ លើកទី៤ ស្តីពី សមាគមនិងអង្គការមិនមែនរដ្ឋាភិបាលដ៏ចម្រូងចម្រាស។ ក៏ប៉ុន្តែកិច្ចប្រជុំពេញមួយព្រឹកនោះ មិនទទួលបានលទ្ធផលអ្វីទេ ដោយតំណាងក្រសួងមហាផ្ទៃមិនបានឆ្លើយតបអ្វី ចំពោះការស្នើឲ្យពន្យារពេលនិងកែសម្រួលមាត្រាជាច្រើនក្នុងពង្រាងច្បាប់នោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ