តុលាការកំពូលសាលាក្តីខ្មែរសម្រេចបន្តឃុំខ្លួនអៀង ធីរិទ្ធ
តុលាការកំពូលនៃសាលាក្តីខ្មែរក្រហមបានបដិសេធសាលក្រមរបស់សាលាដំបូងដែលសម្រេចដោះលែងលោកស្រីអៀង ធីរិទ្ធអោយមានសេរីភាពក្រោមមូលហេតុថា លោកស្រីអៀង ធីរិទ្ធពុំមានសម្បទានិងបញ្ញាស្មារតីគ្រប់គ្រាន់ដើម្បីចូលរួមក្នុងសវនាការ។ សេចក្តីប្រកាសរបស់តុលាការកំពូលត្រូវបានផ្សព្វផ្សាយអោយដឹងកាលពីល្ងាចថ្ងៃអង្គារទី១៣ធ្នូនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
លោកស្រី អៀង ធីរិទ្ធមិនអាចមានសេរីភាពចេញពីមន្ទីរឃុំឃាំងតាមសេចក្តីសម្រេចរបស់សាលាដំបូងនៃសាលាក្តីខ្មែរក្រហមឡើយ។ ដោយសម្រេចទៅលើបណ្តឹងសាទុក្ខរបស់សហព្រះរាជអាជ្ញា តុលាការកំពូលបានជំទាស់សាលក្រមសាលាដំបូងនៃតុលាការខ្មែរក្រហមហើយបញ្ជាអោយបន្តឃុំខ្លួនលោកស្រីអៀង ធីរិទ្ធដែលសាលាដំបូងទទួលស្គាល់ថាមានសម្បទានិងស្មារតីមិនគ្រប់គ្រាន់ដើម្បីចូលរួមក្នុងសវនាការ។ តុលាការកំពូលបានបង្គាប់អោយសាលាដំបូងត្រូវប្រើអោយអស់វិធានការនិងលទ្ធភាពដែលមានដើម្បីរង់ចាំសុខភាពជនជាប់ចោទអាចវិលមករកភាពប្រសើរឡើងវិញ បើទោះជាលទ្ធភាពនោះមានតិចក៏ដោយ។
អ្នកនាំពាក្យសាលាក្តីខ្មែរក្រហមលោកនេត្រភក្ត្រាបានបញ្ជាក់អោយដឹងថាតុលាការកំពូលនៃសាលាក្តីខ្មែរក្រហមក៏បានប្រើប្រាស់របាយការណ៍របស់គ្រូពេទ្យជំនាញដូចគ្នាដែលនិយាយថាការព្យាបាលបន្ថែមទៀតទៅលើជនជាប់ចោទអាចជួយពង្រឹងសុខភាពផ្លូវចិត្តរបស់គាត់ឲ្យមានសម្បទាគ្រប់គ្រាន់ដើម្បីចូលរួមក្នុងសវនាការ។
កាលពីថ្ងៃទី១៧វិច្ឆិកាដោយយោងលើអំណះអំណាងរបស់គ្រូពេទ្យជំនាញដែលបញ្ជាក់ថា លោកស្រីអៀង ធីរិទ្ធអតីតរដ្ឋមន្ត្រីសង្គមកិច្ច និងជាភរិយារបស់អៀង សារីមានស្មារតីវង្វេងវង្វាន់និងចុះខ្សោយនោះ បានសម្រេចដោះលែងលោកស្រី អៀង ធីរិទ្ធអោយមានសេរីភាព។ ប៉ុន្តែសហព្រះរាជអាជ្ញាបានជំទាស់សេចក្តីសម្រេចនេះ ហើយដាក់បណ្តឹងសាទុក្ខទៅតុលាការកំពូលភ្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ