មន្ត្រីរដ្ឋាភិបាលឆ្លើយតបការចោទប្រកាន់របស់ នួន ជា មកលើវៀតណាម
រដ្ឋមន្ត្រីការបរទេសកម្ពុជាលោកហោ ណាំហុងបានច្រានចោលការចោទប្រកាន់របស់នួន ជា ដែលថាឧក្រិដ្ឋកម្មលើប្រជាជនខ្មែរក្នុងសម័យខ្មែរក្រហមមានពាក់ព័ន្ធនឹងប្រទេសវៀតណាម។ លោកនួន ជានិយាយច្រើនអំពីប្រទេសវៀតណាមនៅក្នុងបន្ទប់សវនាការ ខណៈពេលដែលអគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តវៀតណាមកំពុងបំពេញទស្សនកិច្ចនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
លោកឧបនាយករដ្ឋមន្ត្រីហោ ណាំហុង រដ្ឋមន្ត្រីការបរទេសកម្ពុជាបានថ្លែងចាត់ទុកការលើកឡើងរបស់លោកនួន ជា នៅក្នុងបន្ទប់សវនាការនៃសាលាក្តីខ្មែរក្រហមនោះ ថាគ្រាន់តែជាការអះអាងរបស់ជនជាប់ចោទនៃឧក្រិដ្ឋកម្មប្រឆាំងមនុស្សជាតិម្នាក់ប៉ុណ្ណោះ។ ប៉ុន្តែថា ការពិតជាក់ស្តែងគឺផ្ទុយពីការលើកឡើងរបស់លោកនួន ជា។
លោកហោ ណាំហុងបានថ្លែងយ៉ាងនេះដើម្បីឆ្លើយតបទៅសំណួររបស់អ្នកកាសែតនៅឯក្រសួងការបរទេសនៅព្រឹកថ្ងៃពុធទី៧ធ្នូនេះ។ អ្នកកាសែតដែលសុំការអត្ថាធិប្បាយរបស់លោកជុំវិញការចោទប្រកាន់របស់លោកនួន ជា ថាឧក្រិដ្ឋកម្មក្នុងសម័យខ្មែរក្រហមមានពាក់ព័ន្ធនឹងវៀតណាម ថាវៀតណាមមានបំណងចង់គ្រប់គ្រងកម្ពុជា។ ហេតុដូច្នេះហើយបានជាបក្សកុម្មុយនិស្តកម្ពុជាតស៊ូរំដោះកម្ពុជា។
ការឆ្លើយឆ្លងរវាងមន្ត្រីជាន់ខ្ពស់របស់កម្ពុជាជាមួយលោកនួន ជា កំពុងកើតឡើងខណៈដែលអគ្គលេខាធិការនៃគណៈកម្មាធិការ មជ្ឈិមបក្សកុម្មុយនិស្តវៀតណាមកំពុងធ្វើទស្សនកិច្ចនៅកម្ពុជាដែរ។ ពាក់ព័ន្ធនឹងសាលាក្តីខ្មែរក្រហមដែរ កាលពីល្ងាចថ្ងៃអង្គារទី៦ធ្នូ នៅក្នុងជំនួបជាមួយលោកង្វៀន ភូទ្រុងអគ្គលេខាធិការនៃគណៈកម្មាធិការបក្សកុម្មុយនិស្តវៀតណាម លោកនាយករដ្ឋមន្ត្រីហ៊ុន សែនបានថ្លែងប្រាប់លោកង្វៀន ភូទ្រុងថា ការកាត់ទោសអតីតមេដឹកនាំខ្មែរក្រហមគឺជាសច្ចៈធម៌ប្រវត្តិសាស្ត្រមួយសម្រាប់ប្រទេសវៀតណាម។ ការកាត់ក្តីដែលវាបានបង្ហាញពីភាពត្រឹមត្រូវនៃជំនួយរបស់កងទ័ពវៀតណាមក្នុងការរំដោះប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ