តុលាការខេត្តបន្ទាយមានជ័យកាត់ទោសឧត្តមសេនីយ៍ម៉ឹកដារ៉ានិងបក្ខពួកក្នុងសំណុំរឿងពុករលួយគ្រឿងញៀន
នៅព្រឹកថ្ងៃព្រហស្បតិ៍នេះ តុលាការខេត្តបន្ទាយមានជ័យ បានចាប់ផ្តើមសវនាការលើសំណុំរឿងពុករលួយតាមរយៈការបង្ក្រាបគ្រឿងញៀន ប្រឆាំងនឹងឧត្តមសេនីយ៍ឯក ម៉ឹក ដារ៉ា អតីតអគ្គលេខាធិការអាជ្ញាធរជាតិប្រឆាំងគ្រឿងញៀនរួមទាំងបក្ខពួក។ សវនាការលើសំណុំរឿងពុករលួយ និងគ្រឿងញៀនដ៏ធំប្រឆាំងមេប៉ូលិសក្រសួងមហាផ្ទៃ នឹងបន្តធ្វើ ចាប់ពីពេលនេះ រហូតដល់ចុងខែមករា ឆ្នាំ២០១២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៩
នៅព្រឹកថ្ងៃទី១៧វិច្ឆិកា ឆ្នាំ២០១១ តុលាការខេត្តបន្ទាយមានជ័យ បានលើកយកសំណុំរឿងពុករលួយ ដោយការបង្ក្រាបគ្រឿងញៀន ចាប់តាំងពីឆ្នាំ២០០៧ ដើម្បីចោទប្រកាន់ប្រឆាំងនឹងលោកឧត្តមសេនីយ៍ឯក ម៉ឹក ដារ៉ា និងអ្នកក្រោមបង្គាប់។
នៅពេលបើកសវនាការ លោកចៅក្រម អ៊ិត សម្ផស្ស ប្រធានក្រុមប្រឹក្សាជំនុំជម្រះ របស់តុលាការខេត្តបន្ទាយមានជ័យ បានប្រកាសថា សវនាការលើសំណុំរឿងពុករលួយគ្រឿងញៀនប្រឆាំងលោក ម៉ឹកដារ៉ា ត្រូវធ្វើចាប់ពីថ្ងៃទី១៧វិច្ឆិកានេះ រហូតដល់ថ្ងៃទី២០មករា ឆ្នាំ២០១២។ ក្នុងករណីនេះ មានសំណុំរឿងរហូតដល់ ៣៨ ករណី និងសាក្សី ១៣០ នាក់។
លោកម៉ឹកដារ៉ា ត្រូវបានប៉ូលិសដាក់ខ្នោះនាំចូលតុលាការ ជាមួយនឹងអតីតមេប៉ូលិសខេត្តបន្ទាយមានជ័យ និងអតីតប៉ូលិសប្រឆាំងគ្រឿងញៀនជាច្រើននាក់ទៀត។
ប៉ុន្តែក្នុងសំណុំរឿងពុករលួយ ស៊ីសំណូក តាមរយៈការបង្ក្រាបគ្រឿងញៀន ដែលតុលាការកាត់ទោសនៅថ្ងៃដំបូងនេះ មានជនជាប់ចោទ ៣ នាក់ ជាអតីតប៉ូលិសប្រឆាំងគ្រឿងញៀន គឺលោកឧត្តមសេនីយ៍ឯក ម៉ឹកដារ៉ា អតីតអគ្គលេខាធិការអាជ្ញាធរជាតិប្រឆាំងគ្រឿងញៀន និងជាអតីតប្រធានមន្ទីរប្រឆាំងគ្រឿងញៀន, លោក ជា ឡេង អតីតប្រធានការិយាល័យ នៃមន្ទីរប្រឆាំងគ្រឿងញៀន និងប៉ូលិសឈ្មោះ ម៉ន ឌឿន នាយរងការិយាល័យ ទំនាក់ទំនងព្រំដែន នៃមន្ទីរប្រឆាំងគ្រឿងញៀន ដែលបានរត់គេចខ្លួន។
អតីតស្នងការប៉ូលិសខេត្តបន្ទាយមានជ័យលោក ហ៊ុន ហ៊ាន និងអតីតស្នងការរង លោក ឈៀង សុន ព្រមទាំងអតីតប៉ូលិសជាច្រើននាក់ផ្សេងទៀត ដែលត្រូវនាំចូលតុលាការនៅថ្ងៃនេះ គឺជាសាក្សី។ តុលាការបានកាត់ទោសដាក់ពន្ធនាគារ ៤ ឆ្នាំ ក្នុងរឿងពុករលួយគ្រឿងញៀន លើអតីតមេប៉ូលិស ហ៊ុនហ៊ាន និងឈៀងសុន។
នៅពេលចាប់ផ្តើមសវនាការ កាលពីព្រឹកថ្ងៃទី១៧វិច្ឆិកា ឆ្នាំ២០១១ លោក ការ សាវុត្ថ មេធាវីការពារក្តីឲ្យលោក ម៉ឹក ដារ៉ា បានទាមទារឲ្យតុលាការ ផ្អាកដំណើរការសវនាការ ព្រោះថា មកដល់ពេលនេះ មិនទាន់មានព្រះរាជក្រឹត្យពីព្រះមហាក្សត្រ ក្នុងការដកតំណែងលោក ម៉ឹក ដារ៉ា ពីឧត្តមមន្ត្រីឡើយ។ ក៏ប៉ុន្តែចៅក្រមបានបដិសេធ។
ចំណែកលោកឧត្តមសេនីយ៍ឯក ម៉ឹកដារ៉ា បានច្រានចោលរាល់ការប្រកាន់លើរូបលោក។ លោក ម៉ឹកដារ៉ា ក៏បានប្រកាសស្បថស្បែថា លោកមិនដឹងរឿងស៊ីសំណូក តាមរយៈការបង្ក្រាបបទល្មើសគ្រឿងញៀនកន្លងមកឡើយ។
អង្គភាពប្រឆាំងអំពើពុករលួយ ដែលជាដើមបណ្តឹងប្រឆាំងនឹងអតីតឧត្តមសេនីយ៍ និងមេប៉ូលិស បានលើកឡើងថា គ្រាន់តែបទចោទប្រកាន់ករណីទី២ និងទី៣ អាចឲ្យលោកអតីតឧត្តមសេនីយ៍ឯក ម៉ឹកដារ៉ា ជាប់ពន្ធនាគារអស់មួយជីវិត។
សវនាការរយៈពេលពេញមួយថ្ងៃនេះ ធ្វើឡើង ដោយចៅក្រមសួរដេញដោលលើលោក ម៉ឹកដារ៉ា និងលោក ជា ឡេង អំពីការបង្ក្រាបគ្រឿងញៀន កាលពីថ្ងៃទី៤មិថុនា ឆ្នាំ២០០៧ នៅកាស៊ីណូ ណាហ្គា ក្នុងទីក្រុងភ្នំពេញ។ ករណីនោះ គឺលោក ជា ឡេង ប្រធានការិយាល័យ នៃមន្ទីរប្រឆាំងគ្រឿងញៀន របស់ក្រសួងមហាផ្ទៃ បានចុះបង្ក្រាប តាមការបញ្ជារបស់លោក ម៉ឹកដារ៉ា។ សវនាការលើរឿងក្តីនេះ នឹងបន្តទៅថ្ងៃស្អែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ