មន្ត្រីរដ្ឋាភិបាលនិងអ្នកជំនួញខ្មែរជិត៣០០នាក់ចូលរួមពិពណ៌ចិន-អាស៊ាន
លោកនាយករដ្ឋមន្ត្រីខ្មែរហ៊ុន សែនបានដឹកនាំប្រតិភូជាន់ខ្ពស់របស់កម្ពុជាចេញទៅទីក្រុងណាន់នីងប្រទេសនៅព្រឹកថ្ងៃព្រហស្បតិ៍ទី២០តុលានេះ។ នៅការតាំងពិពណ៌ពាណិជ្ជកម្មដែកម្ពុជាបានក្រុមហ៊ុនកម្ពុជាចំនួន៧៥បានចូលរួមដែរនោះ លោកនាយករដ្ឋមន្ត្រីកម្ពុជាគ្រោងនឹងធ្វើសេចក្តីថ្លែងការណ៍តំណាងអាស៊ាននៅក្នុងឱកាសបើកកិច្ចប្រជុំកំពូលធុរកិច្ចនិងវិនិយោគចិន-អាស៊ានផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
ក្រៅពីមន្ត្រីជាន់ខ្ពស់រដ្ឋាភិបាលជាច្រើនរូប នៅមានប្រតិភូពាណិជ្ជករធំៗរបស់កម្ពុជាចំនួន២៥០នាក់មកពី៧៥ក្រុមហ៊ុនដែលចេញដំណើរទៅទីក្រុងណាន់នីងប្រទេសចិនជាមួយលោកនាយករដ្ឋមន្ត្រីហ៊ុន សែននៅព្រឹកថ្ងៃព្រហស្បតិ៍ទី២០តុលានេះ។
ប្រតិភូជាន់ខ្ពស់របស់កម្ពុជាត្រូវចូលរួមការតាំងពិពណ៌ពាណិជ្ជកម្មចិនអាស៊ានលើកទី៨ និងកិច្ចប្រជុំកំពូលធុរកិច្ចនិងវិនិយោគអាស៊ានចិនផងដែរ។
រដ្ឋមន្ត្រីប្រតិភូអមនាយករដ្ឋមន្ត្រីលោក ស្រ៊ី ថាមរ៉ុង្គបានថ្លែងប្រាប់សារព័ត៌មានមុនចេញដំណើរថា លោកនាយករដ្ឋមន្ត្រីនឹងជួបពិភាក្សាជាមួយលោកនាយករដ្ឋមន្ត្រីចិនវេន ជាប៉ាវ ជួបជាមួយប្រតិភូធនាគារអភិវឌ្ឍន៍ចិនផងដែរ។ តាមគម្រោងនៅថ្ងៃទី២១តុលាដែលជាថ្ងៃបើកពិពណ៌ពាណិជ្ជកម្មចិនអាស៊ានជាផ្លូវការ លោកនាយករដ្ឋមន្ត្រីកម្ពុជា នឹងទស្សនាពន្លាជាតិកម្ពុជាដែលមានស្តង់ពិពណ៌ចំនួន៩០។ បន្ទាប់មកលោកប្រមុខរដ្ឋាភិបាលនឹងចូលរួមក្នុងពិធីបើកកិច្ចប្រជុំកំពូលធុរកិច្ចនិងវិនិយោគចិន-អាស៊ានលើកទី៨។ គឺនៅក្នុងកិច្ចប្រជុំនោះហើយ ដែលលោកនាយករដ្ឋមន្ត្រីកម្ពុជានឹងថ្លែងសុន្ទរកថាគន្លឹះមួយតំណាងអោយសមាគមអាស៊ាន។
គួរបញ្ជាក់ថា ពិពណ៌ពាណិជ្ជកម្មចិនអាស៊ានឆ្នាំនេះប្រព្រឹត្តិទៅក្រោមប្រធានបទកិច្ចសហប្រតិបត្តិការការពារបរិស្ថាន។ ក្នុងន័យនេះកម្ពុជាបានលើកប្រធានបទខេត្តរតនគិរីស្រស់ប្រិមប្រិយ ដើម្បីចូលរួមក្នុងពិពណ៌អន្តរជាតិនេះ។ក្រៅពីនេះ កម្ពុជាក៏មានស្តង់ដាក់តាំង និងលក់ផលិតផលកែច្នៃជាច្រើនដូចជាគ្រឿងអលង្កា សង្ហារឹម សំលៀកបំពាក់ ផលិតផលធ្វើអំពីសូត្រជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ