ទូតកម្ពុជាប្រចាំប្រទេសថៃបញ្ជាក់ថារដ្ឋាភិបាលមិនជ្រៀតជ្រែកដំណើការតុលាការខ្មែរក្រហម
នៅថ្ងៃពុធនេះ លោកស្រី យូ អយ ឯកអគ្គរាជទូតកម្ពុជា ប្រចាំប្រទេសថៃ បានសរសេរលិខិតបំភ្លឺមួយ ទៅកាន់កាសែតបាងកកប៉ុស្តិ៍របស់ថៃ ចំពោះអត្តបទ ដែលមានចំណងជើងថា “ចៅក្រមលាលែងដោយសារតែការជ្រៀតជ្រែករបស់រដ្ឋាភិបាល”។ ក៏ប៉ុន្តែតាមលោកស្រី យូ អយ រដ្ឋាភិបាលកម្ពុជា មិនដែលបានហើយក៏នឹងមិនជ្រៀតជ្រែកលើសមត្ថកិច្ចរបស់សាលាក្តី ចម្រុះកាត់ទោសមេខ្មែរក្រហមឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
ក្នុងលិខិតចុះថ្ងៃទី១២តុលាឆ្នាំ២០១១ លោកស្រី យូ អយ ឯកអគ្គរាជទូតកម្ពុជា ប្រចាំប្រទេសថៃ បានបញ្ជាក់យ៉ាងច្បាស់ពីតួនាទីរបស់រដ្ឋាភិបាលកម្ពុជា ចំពោះតុលាការខ្មែរក្រហម។ នោះគឺរដ្ឋាភិបាលកម្ពុជាយល់យ៉ាងច្បាស់ថា វាជាបុព្វសិទ្ធិរបស់សាលាក្តីចម្រុះកាត់ទោសមេខ្មែរក្រហមដែលបង្កើតឡើងដោយអង្គការសហប្រជាជាតិនិងរដ្ឋាភិបាលកម្ពុជាក្នុងការសម្រេចចិត្តចោទប្រកាន់បុគ្គលណាម្នាក់ នៅពីក្រោយបទឧក្រិដ្ឋកម្មប្រឆាំងមនុស្សជាតិ អំឡុងរបបខ្មែរក្រហម។
លោកស្រីឯកអគ្គរាជទូតបានបញ្ជាក់ទៅកាន់កាសែតបាងកកប៉ុស្តិ៍របស់ប្រទេសថៃថា ចាប់តាំងពីបង្កើតសាលាក្តីចម្រុះនោះមកដល់សព្វថ្ងៃ រដ្ឋាភិបាលកម្ពុជាបានប្រកាន់ខ្ជាប់នូវការគោរពដោយពេញលេញលើឯករាជ្យភាពនៃដំណើរការកាត់ទោសមេខ្មែរក្រហម និងមិនដែលជ្រៀតជ្រែកចំពោះដំណើរការស្វែងរកយុត្តិធម៌ជូនជនរងគ្រោះខ្មែរឡើយ។
លោកស្រី យូ អយក៏បានបន្ថែមថា រដ្ឋាភិបាលកម្ពុជា ចង់ឲ្យតុលាការកូនកាត់បំពេញបេសកកម្មរបស់ខ្លួនឲ្យឆាប់រហ័សតាមដែលអាចធ្វើទៅបានពីព្រោះអតីតមេខ្មែរក្រហម ៤ រូប ដែលកំពុងជាប់ឃុំឃាំង នៅក្នុងសំណុំរឿង០០២ កាន់តែមានវ័យចំណាស់ និងមានជំងឺហើយអាចនឹងស្លាប់នៅពេលណាមួយ។ ដូច្នេះសាលាក្តីចម្រុះ អាចប្រឈមនឹងការមិនបានកាត់ទោសមេដឹកនាំខ្មែរក្រហមណាម្នាក់ទេ ប្រសិនបើដំណើរការកាត់ទោសត្រូវបានអូសបន្លាយ។
ម្យ៉ាងវិញទៀត លោកស្រី យូ អយ ក៏បានប្រាប់ទៅកាន់និពន្ធនាយកកាសែតបាងកកប៉ុស្តិ៍នៅថ្ងៃនេះថា ក្នុងរឿងសាលាក្តីខ្មែរក្រហម រដ្ឋាភិបាលកម្ពុជាគ្រាន់តែបង្ហាញនូវក្តីបារម្ភរបស់ខ្លួនចំពោះការផ្សះផ្សារជាតិ សន្តិភាព សន្តិសុខ និងការអភិវឌ្ឍជាតិ បើសិនជាមានការចោទប្រកាន់បន្ថែមលើអតីតមេខ្មែរក្រហម។
សេចក្តីបញ្ជាក់ស្រដៀងគ្នា ពីការមិនជ្រៀតជ្រែករបស់រដ្ឋាភិបាល លើដំណើការកាត់ទោសមេខ្មែរក្រហមក៏ត្រូវបានក្រសួងការបរទេសកម្ពុជាប្រកាសក្នុងសេចក្តីថ្លែងការណ៍នៅថ្ងៃពុធនេះផងដែរ។
ទាក់ទងសំណុំរឿងខ្មែរក្រហម នៅថ្ងៃពុធនេះ លោកចៅក្រម យូប៊ុនឡេង សហចៅក្រមស៊ើបអង្កេតជាតិ បានចេញសេចក្តីថ្លែងការណ៍ ដោយសម្តែងការភ្ញាក់ផ្អើលបំផុត ចំពោះការប្រកាសលាលែងរបស់សហចៅក្រមស៊ើបអង្កេតអន្តរជាតិលោក សេហ្វ្រីកប្លុង។
តាមសេចក្តីថ្លែងការណ៍ សហចៅក្រមស៊ើបអង្កេតទាំងពីរ បានដំណើរការយ៉ាងរលូនប្រកបដោយស្មារតីទទួលខុសត្រូវខ្ពស់ និងឈរលើគោលការណ៍ច្បប់។ នោះគឺសហចៅក្រមទាំងពីរ បាន និងកំពុងធ្វើចំណាត់ការនីតិវិធីលើសំណុំរឿង០០៣ និង០០៤ ជាពិសេសកិច្ចស៊ើបសួរ នៃការស្តាប់ចម្លើយសាក្សីសំខាន់ៗ និងការចុះទៅពិនិត្យទីតាំងប្រព្រឹត្តឧក្រិដ្ឋកម្មមួយចំនួនដែលត្រូវបានធ្វើឡើងដោយឯករាជ្យនិងគ្មានឧបសគ្គរារាំងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ