ក្រសួងការងារអន្តរាគមឲ្យកម្មករបានទៅចុះឈ្មោះបោះឆ្នោត
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក វង សូត្រ បានអន្តរាគមទៅថៅកែរោងចក្រដើម្បីឲ្យពួកគេយល់ព្រមអនុញ្ញាតឲ្យ កម្មករឈប់សម្រាកដើម្បីទៅពិនិត្យឈ្មោះនិងចុះឈ្មោះបោះឆ្នោត និងឈប់សម្រាកក្នុងឱកាសបុណ្យភ្ជុំបិណ្ឌ។ កម្មករកាត់ដេរត្រូវបានអនុញ្ញាតឲ្យឈប់សម្រាកចំនួន ២ ថ្ងៃ សម្រាប់អ្នកនៅផ្ទះជិតកន្លែងធ្វើការ និងឈប់សម្រាក ៣ ថ្ងៃ សម្រាប់អ្នកមានស្រុកកំណើតនៅឆ្ងាយ។
ចុះផ្សាយនៅថ្ងៃ៖ កែប្រែថ្ងៃទី៖
តាមរយៈសេចក្តីជូនដំណឹងមួយដែលត្រូវបានផ្សព្វផ្សាយដល់អ្នកកាសែតនៅចុងសប្តាហ៍នេះ លោក វង សូត្រ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ជូនដំណឹងដល់ម្ចាស់ សហគ្រាស គ្រឹះស្ថានទាំងអស់ឲ្យអនុញ្ញាតឲ្យកម្មករនិយោជិត បានឈប់សម្រាកដើម្បីទៅពិនិត្យបញ្ជីឈ្មោះ និងចុះឈ្មោះបោះឆ្នោត។
ក្រសួងការងារបានតម្រូវឲ្យកម្មករឈប់សម្រាកពីការងារនៅថ្ងៃព្រហស្បតិ៍ទី២២ និងថ្ងៃសុក្រ ទី២៣ កញ្ញា ឆ្នាំ២០១១ សម្រាប់កម្មករនិយោជិតដែលធ្វើការនៅរាជធានីភ្នំពេញហើយដែលត្រូវចេញទៅខេត្តជិតទីក្រុង។សម្រាប់អ្នកដែលត្រូវចេញទៅខេត្តឆ្ងាយវិញ ពួកគេនឹងត្រូវគេអនុញ្ញាតឲ្យឈប់រយៈពេល៣ថ្ងៃគឺពីថ្ងៃពុធទី ២១ ដល់ថ្ងៃសុក្រទី ២៣ កញ្ញា ២០១១។ កម្មករដែលធ្វើការនៅតាមរោងចក្រក្នុងបណ្តាខេត្តក៏បានឈប់សម្រាកដូចគ្នាដែរ។
ក្រៅពីការឈប់សម្រាកសម្រាប់ពិនិត្យ និងចុះឈ្មោះបោះឆ្នោត កម្មករ កម្មការិនីក៏ត្រូវគេអនុញ្ញាតឲ្យឈប់សម្រាកក្នុងឱកាសបុណ្យភ្ជុំបិណ្ឌរយៈពេល៣ថ្ងៃផងដែរ គឺថ្ងៃទី២៦-២៧ និង២៨ កញ្ញា ឆ្នាំ២០១១។ ក្រសួងការងារ បានបញ្ជាក់ក្នុងសេចក្តីជូនដំណឹងរបស់ខ្លួនថា រាល់ការអនុញ្ញាតច្បាប់ខាងលើនេះ និយោជកត្រូវរក្សាទុកប្រាក់ឈ្នួល និងប្រាក់រង្វាន់ធ្វើការទៀងទាត់ជូនកម្មករនិយោជិតឲ្យនៅដដែល និងជាពិសេសត្រូវបើកប្រាក់ឈ្នួលជូនពួកគេឲ្យបានមុនការឈប់សម្រាកនោះទៀតផង។
លោក រ៉ុង ឈុន ប្រធានសហភាពសហជីពកម្ពុជាបានសាទរចំពោះអន្តរាគមន៍របស់ក្រសួងការងារ ហើយបានអំពាវនាវឲ្យកម្មករទាំងអស់ទៅពិនិត្យឈ្មោះ និងចុះឈ្មោះបោះឆ្នោតឲ្យបានគ្រប់ៗគ្នា។ សហជីពកម្មករក៏គ្រោងនឹងបោះពុម្ពសេចក្តីជូនដំណឹងរបស់ក្រសួងការងារជាច្រើនម៉ឺនសន្លឹកដើម្បីចែកជូនកម្មករនៅតាមរោងចក្រនានានៅទូទាំងប្រទេសដោយភ្ជាប់ជាមួយនូវសេចក្តីអំពាវនាវឲ្យកម្មករទៅចុះឈ្មោះបោះឆ្នោតផងដែរ។
គួរកត់សម្កាល់ថា មានការវិវឌ្ឍន៍មួយចំនួនគួរឲ្យកត់សម្គាល់រយៈពេលចុងក្រោយនេះនៅក្នុងវិស័យឧស្សាហកម្មកាត់ដេរសម្លៀកបំពាក់កម្ពុជា។ ក្រុមសហជីពកម្មករបានទាមទារយ៉ាងស្វិតស្វាញឲ្យក្រសួងការងារ និងនិយោជកយកចិត្តទុកដាក់លើកម្មករ។ ការទាមទារនេះបានទទួលលទ្ធផលជាបន្តបន្ទាប់។
ជាក់ស្តែង ក្រសួងការងារបានបើកការពិភាក្សាស្វែងរកមូលហេតុនិងការទប់ស្កាត់រឿងកម្មករដួលសន្លប់ និងការដកទោសព្រហ្មទណ្ឌចេញពីសេចក្តីព្រាងច្បាប់សហជីពជាដើម។ ទោះជាយ៉ាងនេះក៏ដោយ មេដឹកនាំសហជីពនៅតែបន្តការទាមទារមិនទាន់ឈប់នៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ