ឆ្នាំ២០១១៖ មន្រ្តីពន្ធដារមិនហ៊ានទារប្រាក់ពីប្រជាពលរដ្ឋដូចក្នុងឆ្នាំកន្លងទៅ
អ្នកសង្កេតការណ៍ការប្រមូលពន្ធលើមធ្យោបាយដឹកជញ្ជូននិងប្រជាពលរដ្ឋអ្នកបង់ពន្ធបានកត់សម្គាល់ឃើញថា ការប្រមូលពន្ធលើមធ្យោបាយដឹកជញ្ជូននៅឆ្នាំ២០១១នេះមានលក្ខណៈល្អប្រសើរជាងឆ្នាំមុន។ មន្រ្តីពន្ធដារមិនហ៊ានទារប្រាក់ពីប្រជាពលរដ្ឋដូចអ្វីដែលខ្លួនធ្លាប់ធ្វើកាលពីឆ្នាំកន្លងទៅនោះទេ។
ចុះផ្សាយនៅថ្ងៃ៖
ស្តាប់ - ០២:០៨
កាលបរិច្ឆេទនៃការប្រមូលពន្ធលើមធ្យោបាយដឹកជញ្ជូននឹងត្រូវបិទបញ្ចប់ជាស្ថាពរនៅថ្ងៃទី១៥ខែកញ្ញាឆ្នាំ២០១១ខាងមុខនេះ។ ចាប់ពីថ្ងៃទី១៦ខែកញ្ញាទៅ អង្គភាពពន្ធដារនឹងចាប់ផ្តើមធ្វើការត្រួតពិនិត្យលើយានយន្តនិងចាប់ផ្តើមផាកពិន័យព្រមពេលជាមួយគ្នា។ នេះបើយោងតាមសេចក្តីជូនដំណឹងរបស់លោក គាត ឈន់ រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ។ លោក គាត ឈុន បានព្រមាននៅក្នុងសេចក្តីជូនដំណឹងថា ការផាកពិន័យត្រូវធ្វើឡើង១០០ភាគរយនៃប្រាក់ដែលត្រូវបង់ពន្ធ។
ស្របពេលដែលកាលបរិច្ឆេទនៃការបង់ពន្ធកាន់តែខិតជិតចូលមកដល់នោះ អ្នកសង្កេតការណ៍នៃការប្រមូលពន្ធលើមធ្យោបាយដឹកជញ្ជូននិងប្រជាពលរដ្ឋអ្នកបង់ពន្ធបានកត់សម្គាល់ឃើញថា ការប្រមូលពន្ធលើមធ្យោបាយដឹកជញ្ជូននៅឆ្នាំ២០១១នេះ មានលក្ខណៈល្អប្រសើរជាងឆ្នាំមុន។
កាលពីឆ្នាំ២០១០ បណ្តាញអង្គការនេះបានរកឃើញថា ប្រជាជនខ្មែរបានចំណាយប្រាក់ក្រៅផ្លូវការប្រមាណជា១លានដុល្លារអាមេរិកសម្រាប់ការបង់ពន្ធលើមធ្យោបាយដឹកជញ្ជូន។ បន្តិចក្រោយមក ដោយសាររបាយការណ៍នេះ មន្រ្តីពន្ធដារជាង៣០នាក់ត្រូវបានក្រសួងសេដ្ឋកិច្ចនិងហិរញ្ញវត្ថុដាក់ទណ្ឌកម្មរដ្ឋបាល។
លោក សន ជ័យ ប្រធានបណ្តាញរួបរួមដើម្បីគណនេយ្យភាពសង្គមនៅតំបន់អាស៊ីបូព៌ានិងប៉ាស៊ីហ្វិកនិងប្រជាជនអ្នកបង់ពន្ធបានថ្លែងប្រាប់នៅថ្ងៃសៅរ៍នេះថា នៅឆ្នាំនេះបាតុភូតទារប្រាក់លើសចំនួនពីមន្រ្តីពន្ធដារត្រូវបានកាត់បន្ថយច្រើនបើប្រៀបធៀបទៅនឹងឆ្នាំមុន។ មន្រ្តីពន្ធដារមិនហ៊ានទារប្រាក់ពីប្រជាពលរដ្ឋដូចអ្វីដែលខ្លួនធ្លាប់ធ្វើកាលពីឆ្នាំកន្លងទៅនោះទេ។ ប៉ុន្តែប្រជាពលរដ្ឋខ្លះនៅបន្តពឹងមន្រ្តីពន្ធដារអោយជួយសរសេរបែបបទដោយបង់ប្រាក់១ដុល្លារ២កាក់ទៅអោយមន្រ្តីពន្ធដារ។
លោក សន ជ័យ បានបញ្ជាក់ថា នេះជាទង្វើពឹងពាក់របស់ប្រជាពលរដ្ឋទៅកាន់មន្រ្តីពន្ធដារដែលខុសពីឆ្នាំមុន។ កាលនោះ មន្រ្តីពន្ធដារទារប្រាក់ថ្លៃសរសេរតែម្តង។ លោក គាត ឈន់ រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុបានបញ្ជាក់នៅក្នុងសារាចររបស់លោកកាលពីពេលថ្មីៗកន្លងមកនេះថា មន្រ្តីពន្ធដារមិនត្រូវទារប្រាក់កម្រៃពីប្រជាពលរដ្ឋទេ។
សូមបញ្ជាក់ថា ប្រទេសកម្ពុជាមានយានជំនិះប្រមាណជា១លាន៣សែនគ្រឿង ក្នុងនោះ ម៉ូតូមានចំនួន១លាន១សែនគ្រឿងនិងរថយន្តមានចំនួន២សែនគ្រឿង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ