ការបញ្ជាបិទសមាគមធាងត្នោតក្លាយជាសង្រ្គាមប៉ាកកា
ការបញ្ជាអោយសមាគមធាងត្នោតផ្អាកសកម្មភាពរយៈពេល៥ខែ ពីសំណាក់ក្រសួងមហាផ្ទៃនោះ កំពុងទទួលប្រតិកម្មពីក្រុមបណ្តាញសង្គមស៊ីវិល។ សង្គមស៊ីវិលចំនួន១៣០បានថ្លែងគាំទ្រសមាគមធាងត្នោត ហើយអំពាវនាវអោយរដ្ឋាភិបាលអនុញ្ញាតអោយសមាគមនេះបន្តសកម្មភាពធម្មតាវិញ។ មន្ត្រីជាន់ខ្ពស់ក្រសួងមហាផ្ទៃវិញបានថ្លែងថា ក្រសួងមហាផ្ទៃគ្រាន់តែសម្រេចផ្អាកសកម្មភាពសមាគមនេះ ដើម្បីអោយសមាគមអាចកែប្រែលក្ខន្តិកៈរបស់ខ្លួនតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០១:៣៩
សេចក្តីសម្រេចរបស់ក្រសួងមហាផ្ទៃអោយសមាគមធាងត្នោតផ្អាកសកម្មភាព៥ខែកំពុងក្លាយទៅជាសង្គ្រាមប៉ាកកាហើយ។ នៅថ្ងៃចន្ទទី២២សីហានេះ បណ្តាញអង្គការក្រៅរដ្ឋាភិបាលចំនួន១៣០អង្គការបានធ្វើសេចក្តីថ្លែងការណ៍រួមមួយដើម្បីប្រឆាំងនឹងសេចក្តីសម្រេចរបស់ក្រសួងមហាផ្ទៃ។ អង្គការសង្គមស៊ីវិលទាំងនោះ បានរិះគន់សេចក្តីសម្រេចរបស់ក្រសួងមហាផ្ទៃ ថាជាទង្វើតាមទំនើងចិត្ត ហើយថានេះក៏ជាការរំលោភលើសិទ្ធិដែលមានចែងក្នុងរដ្ឋធម្មនុញ្ញ គឺសេរីភាពខាងការបញ្ចេញមតិ និងខាងសមាគម និងក៏ជាការបង្ក្រាបលើអ្នកការពារសិទ្ធិមនុស្សផងដែរ។ នៅក្នុងសេចក្តីថ្លែងការណ៍ដដែល បណ្តាញអង្គការក្រៅរដ្ឋាភិបាលបានស្រែកទាមទារអោយក្រសួងមហាផ្ទៃផ្លាស់ប្តូរសេចក្តីសម្រេច ដើម្បីអនុញ្ញាតអោយសមាគមធាងត្នោតអាចត្រឡប់ទៅធ្វើសកម្មភាពដូចធម្មតាវិញ។
លោកឧត្តមសេនីយខៀវ សុភ័គអ្នកនាំពាក្យក្រសួងមហាផ្ទៃបានថ្លែងប្រាប់វិទ្យុបារាំងអន្តរជាតិនៅថ្ងៃនេះថា ក្រសួងមហាផ្ទៃសម្រេចផ្អាកសកម្មភាពរបស់សមាគមនេះពីព្រោះសមាគមនេះ បានធ្វើសកម្មភាពផ្ទុយពីអ្វីដែលមានចែងនៅក្នុងលក្ខន្តិកៈរបស់ខ្លួន។ ដូច្នេះក្រសួងគ្រាន់តែចង់សមាគកមនេះកែប្រែលក្ខន្តិកៈនិងរចនាសម្ព័ន្ធតែប៉ុណ្ណោះ។ បន្ទាប់មក សមាគមនឹងអាចបន្តសកម្មភាពដូចធម្មតាវិញ។ អ្នកនាំពាក្យក្រសួងមហាផ្ទៃបានបញ្ជាក់ថា ក្រសួងនឹងត្រៀមខ្លួនសហការជាមួយសមាគមធាងត្នោតផងដែរ។
ទោះយ៉ាងណាក៏ដោយ ការសម្រេចរបស់ក្រសួងមហាផ្ទៃក៏បានធ្វើអោយភ្ញាក់ផ្អើលដល់ធនាគារអភិវឌ្ឍន៍អាស៊ីADBផងដែរ។ ADBបានអះអាងថា ខ្លួននឹងបន្តតាមដានយ៉ាងយកចិត្តទុកដាក់ចំពោះសំណុំរឿងនេះ។ ដោយសារសមាគមនេះក៏ជាអ្នកតាមដានការអនុវត្តន៍គម្រោងកែលម្អផ្លូវរថភ្លើង ដែលគាំទ្រដោយធនាគារអភិវឌ្ឍន៍អាស៊ី ADB៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ