រដ្ឋាភិបាលអនុម័តសេចក្តីព្រាងច្បាប់គ្រប់គ្រងថ្នាំនិងជីកសិកម្ម
រដ្ឋាភិបាលសម្តេចហ៊ុនសែនបានសម្រេចអនុម័តលើសេចក្តីព្រាងច្បាប់ ស្តីពីការគ្រប់គ្រងថ្នាំកសិកម្មនិងជីកសិកម្ម ប្រយោជន៍ពង្រីកសក្តានុពលភាពវិស័យកសិកម្ម ដើម្បីអភិវឌ្ឍសង្គមសេដ្ឋកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ការអនុម័តរបស់រដ្ឋាភិបាលលើសេចក្តីព្រាងច្បាប់ស្តីពីការគ្រប់គ្រងថ្នាំកសិកម្ម និងជីកសិកម្ម ត្រូវបានស្វាគមពីអង្គការជំនាញកសិកម្ម ដោយរំពឹងថាច្បាប់នេះ អាចនឹងជួយទប់ស្កាត់ការប្រើប្រាស់ថ្នាំពុលខ្លាំង និងកាត់បន្ថយការចំណាយលើថ្នាំកសិកម្ម របស់កសិករ។
សេចក្តីព្រាងច្បាប់ ស្តីពីការគ្រប់គ្រងថ្នាំកសិកម្មនិងជីកសិកម្ម ដែលមាន១២ជំពូក ចែកចេញជា១១៩មាត្រា ត្រូវបានរដ្ឋាភិបាលអនុម័តក្នុងកិច្ចប្រជុំគណៈរដ្ឋមន្រ្តីកាលពីថ្ងៃសុក្រ។ ច្បាប់នេះនឹងលុបបំបាត់ចោលអំពើអសីលធម៌ក្នុងសកម្មភាពផ្សាយពាណិជ្ជកម្មថ្នាំកសិកម្មនិងជីកសិកម្មដើម្បីការពារប្រយោជន៍កសិករ។
លោកយង់សាំងកុមារនាយកមជ្ឈមណ្ឌលសិក្សានិងអភិវឌ្ឍន៍កសិកម្មកម្ពុជា ( អង្គការសេដាក) បានស្វាគមចំពោះសេចក្តីព្រាងច្បាប់ថ្មីនេះ ។ លោកថាច្បាប់នេះអាច ជួយពិនិត្យនិងទប់ស្កាត់ ការប្រើប្រាស់ថ្នាំពុលកសិកម្មដែលមានជាតិខ្លាំងជ្រុល ជួយទប់ស្កាត់ការក្លែងបន្លំលាយផ្សំផលិតផលជីនិងថ្នាំកសិកម្ម ការដាក់ទោសទណ្ឌចំពោះទង្វើខុសច្បាប់ របស់ពាណិជ្ជករ និងជួយកាត់បន្ថយការចំណាយរបស់កសិករលើជីនិងថ្នាំកសិកម្ម។
ប្រជាពលរដ្ឋប្រមាណ៨៥ភាគរយនៃចំនួនពលរដ្ឋសរុបជាង១៤លាននាក់កំពុងប្រកបរបរកសិកម្ម។កសិករភាគច្រើនបានប្រើប្រាស់ជីនិងថ្នាំកសិកម្មពីបរទេស។កាលពីឆ្នាំ២០១០កម្ពុជាបាននាំចូលជីកសិកម្មប្រមាណ១៧០.០០០តោនក្នុង១ឆ្នាំនិងថ្នាំកសិកម្មប្រមាណ៦០០តោនក្នុងឆ្នាំ។ដោយឡែកក្នុងត្រីមាសទី១នៃឆ្នាំ២០១១នេះការនាំចូលជីកសិកម្មមានចំនួន១៥១.០០០តោននិងថ្នាំកសិកម្មមានចំនួន១.៧០០តោន។ គេរំពឹងថាការនាំចូលជីកសិកម្មអាចនឹងកើនឡើងដល់២៥០.០០០តោនក្នុងមួយឆ្នាំស្របតាមកំណើននៃផ្ទៃដីដាំដុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ