ធនាគារពិភពលោកគំរាមបញ្ឈប់ជំនួយថ្មីមកកម្ពុជាដោយសារការបណ្តេញចេញ
ធនាគារពិភពលោកបានធ្វើសេចក្តីថ្លែងការណ៍មួយនៅថ្ងៃនេះ ថាខ្លួននឹងឈប់ផ្តល់ជំនួយមកកម្ពុជា ប្រសិនបើអាជ្ញាធរកម្ពុជាមិនរកដំណោះស្រាយសមរម្យមួយក្នុងករណីបណ្តេញ ពលរដ្ឋចេញពីបឹងកក់ ក្នុងរាជធានីភ្នំពេញនោះទេ។ អ្នកតំណាងរាស្ត្រគណបក្សប្រជាជនកម្ពុជាបានអត្ថាធិប្បាយថា ធនាគារពិភពលោកមិនស្គាល់អធិបតេយ្យរបស់កម្ពុជា ហើយថាកម្ពុជាមិនត្រូវការធនាគារពិភពលោកក៏បាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
ការព្រមានរបស់ធនាគារពិភពលោកធ្វើឡើងនៅពេលដែលអាជ្ញាធរកំពុងបន្តចរចារកដំណោះស្រាយសម្រាប់ពលរដ្ឋជាង១០០០គ្រួសារដែលរស់នៅក្នុងតំបន់បឹងកក់ហើយដែលតស៊ូក្រាញននាលមិនព្រមចាកចេញតាមការបណ្តេញរបស់ក្រុមហ៊ុន។ ក្រុមហ៊ុនអភិវឌ្ឍន៍តំបន់បឹងកក់ឈ្មោះស៊ូកាកូអ៊ីនដែលគ្រប់គ្រងដោយសមាជិកព្រឹទ្ធសភាលោកឡៅ ម៉េងឃីន។ នៅក្នុងសេចក្តីថ្លែងការណ៍លោកស្រីAnnette Dixon នាយិកាធនាគារពិភពលោកប្រចាំតំបន់ បានថ្លែងថាល្គឹកណាមិនមានការរកដំណោះស្រាយបានជាមួយក្រុមពលរដ្ឋនៅបឹងកកនោះទេ ធនាគារនឹងមិនផ្តល់ជំនួយថ្មីមកកម្ពុជាឡើយ។ ទោះយ៉ាងនេះក្តី លោកស្រីDixonបញ្ជាក់ថា រាល់គម្រោងអភិវឌ្ឍន៍ដែលគាំទ្រដោយធនាគារពិភពលោក ហើយដែលកំពុងប្រតិបត្តិនោះ ត្រូវនៅបន្តដូចធម្មតា។
តំណាងរាស្ត្រគណបក្សប្រជាជនកម្ពុជាកាន់អំណាចលោកជាម យៀបមិនបានខ្វល់ខ្វាយនឹងសេចក្តីថ្លែងការណ៍របស់នាយិកាធនាគារពិភពលោកឡើយ។ ផ្ទុយទៅវិញ លោកជាម យៀបបានស្តីបន្ទោសធនាគារថាធនាគារកំពុងរំលោភលើអធិបតេយ្យរបស់កម្ពុជាដែលមានផែនការអភិវឌ្ឍន៍។ លោកជាម យៀបបន្តថា ពលរដ្ឋដែលប៉ះពាល់ដោយគម្រោងអភិវឌ្ឍន៍សុទ្ធតែត្រូវទទួលបានប្រាក់គោលនយោបាយ។ អ្នកតំណាងរាស្ត្ររូបនេះបញ្ជាក់ថា ប្រសិនបើធនាគារពិភពលោកមិនពេញចិត្ត គេមិនបាច់មកកម្ពុជាក៏បាន។
សព្វថ្ងៃនេះធនាគារពិភពលោកកំពុងឧបត្ថម្ភគាំទ្រគម្រោងជាង២០នៅកម្ពុជាដែលមានតម្លៃជាង៤០០លានដុល្លារ។
សូមរម្លឹកថា គម្រោងអភិវឌ្ឍន៍ដ៏ចម្រូងចម្រាសនៅបឹងកក់រយៈពេល៩៩ឆ្នាំនៅលើផ្ទៃដី១៣៣ហិចតាបានប៉ះពាល់ពលរដ្ឋដែលរស់នៅទីនោះជាង៤០០០គ្រួសារ។ មានពលរដ្ឋប្រមាណ៣០០០គ្រួសារដែលបានសុខចិត្តទទួលសំណង ហើយចាកចេញទៅរស់នៅទីតាំងថ្មី។ ប៉ុន្តែពលរដ្ឋជាង១០០០គ្រួសារទៀតកំពុងក្រាញននាលធ្វើបាតុកម្មទាមទារការអភិវឌ្ឍន៍នៅកន្លែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ