តុលាការថៃពន្យារពេលសវនាការលើបុរសខ្មែរ
កាលពីរសៀលថ្ងៃអង្គារនេះ តុលាការខេត្តស៊ីសាកេតរបស់ថៃបានបើកសវនាការជំនុំជម្រះលើបុរសខ្មែរ ដែលត្រូវបានចាប់ខ្លួនពីបទចារកម្ម កាលពីថ្ងៃទី៧ មិថុនាកន្លងទៅ។ តុលាការថៃបានចោទប្រកាន់អ៊ឹង គឹមថៃ ពីបទប្រើប្រាស់គ្រឿងញៀន និងបទចារកម្ម។ ក្រោយពីការតវ៉ាប្រឆាំងការចោទប្រកាន់នេះពីសំណាក់ជនសង្ស័យ តុលាការថៃបានពន្យារពេលសវនាការជាថ្មី នៅថ្ងៃទី១៥សីហា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ភាពមិនប្រក្រតីហាក់បានកើតឡើងតាំងពីល្ងាចថ្ងៃចន្ទមកម្ល៉េះ។ មន្ត្រីតុលាការថៃបានជូនដំណឹងយ៉ាងប្រញាប់ប្រញាល់មកអគ្គកុងស៊ុលកម្ពុជានៅខេត្តស្រះកែវកាលពីល្ងាចថ្ងៃចន្ទ អំពីការបើកសវនាការនៅថ្ងៃនេះ លើបុរសកម្ពុជាដែលត្រូវបានប៉ូលិសថៃចាប់ខ្លួនក្រោមការចោទប្រកាន់ពីបទចារកម្ម។ នេះបើតាមការអះអាងរបស់អ្នកនាំពាក្យក្រសួងការបរទេសកម្ពុជា។
នៅក្នុងសវនាការកាលពីល្ងាចថ្ងៃអង្គារទី២៦កក្កដានេះ តុលាការថៃបានប្រកាសចោទប្រកាន់លោកអ៊ឹង គឹមថៃពីបទប្រើប្រាស់គ្រឿងញៀន និងបទចារកម្មដោយការថតរូបនៅក្នុងតំបន់កងទ័ព។ ប្រភពពីក្រសួងការបរទេសកម្ពុជាបានបន្តថា ក្រោយពីការប្រកាសចោទរបស់តុលាការ លោកអ៊ឹង គឹមថៃ និងមេធាវីរបស់លោកចំនួន៤នាក់បានច្រានចោលការចោទប្រកាន់យ៉ាងដាច់អហង្ការ និងបានទាមទារអោយតុលាការបង្ហាញភស្តុតាងបញ្ជាក់អំពីបទល្មើស។ ប៉ុន្តែតុលាការមិនបានបង្ហាញភស្តុតាងអ្វីឡើយ។ ហើយទីបំផុតទៅ តុលាការថៃបានប្រកាសលើកពេលសវនាការ និងបង្ហាញភស្តុតាងតាមការទាមទាររបស់ជនសង្ស័យ នៅថ្ងៃទី១៥ខែសីហាវិញ។
អ្នកនាំពាក្យក្រសួងការបរទេសកម្ពុជាបានអត្ថាធិប្បាយចំពោះការចោទប្រកាន់របស់តុលាការថៃលើបុរសជនជាតិខ្មែរថា ការចោទប្រកាន់នេះ គ្រាន់តែត្រូវគេបង្កើតឡើងដើម្បីឈានមកចង់ដោះដូរទណ្ឌិតថៃ២នាក់ដែលកំពុងជាប់ឃុំនៅក្នុងប្រទេសកម្ពុជា។ លោកបន្តថា ការដែលតុលាការថៃពន្យារពេលសវនាការជាថ្មីរហូតដល់ថ្ងៃទី១៥សីហានោះ នៅចន្លោះពេលនេះហើយ ដែលថៃនឹងប្រឌិតភស្តុតាងដើម្បីដាក់បន្ទុកលើបុរសជនជាតិខ្មែរ។
លោកអ៊ឹង គឹមថៃ អាយុ៤៦ឆ្នាំ ស្នាក់នៅឃុំអ្នកលឿងត្រូវបានអាជ្ញាធរថៃចាប់ខ្លួនកាលពីថ្ងៃទី៧មិថុនា ជាមួយបុរសពីរនាក់ផ្សេងទៀត គឺជនជាតិថៃអ៊ីស្លាម និងជនជាតិវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ