លោកនាយករដ្ឋមន្ត្រី ហ៊ុន សែន តបបក្សប្រឆាំងពីយន្តការដោះស្រាយបញ្ហាព្រំដែនកម្ពុជា-ថៃ
ទីបំផុតទៅ លោកនាយករដ្ឋមន្ត្រី ហ៊ុន សែន បានបកស្រាយថា ហេតុអ្វីបានជារដ្ឋាភិបាលកម្ពុជា មិនជ្រើសរើសយកយន្តការដោះស្រាយជម្លោះតាមរយៈកិច្ចព្រមព្រៀងសន្តិភាព ទីក្រុងប៉ារីស ឆ្នាំ១៩៩១។ តាមលោកនាយករដ្ឋមន្ត្រី កម្ពុជាជ្រើសយកយន្តការដោះស្រាយជម្លោះព្រំដែនជាមួយថៃ តាមរយៈក្រុមប្រឹក្សាសន្តិសុខអង្គការសហប្រជាជាតិ តុលាការយុត្តិធម៌អន្តរជាតិទីក្រុងឡាអេ អង្គការយូណេស្កូ គណៈកម្មាធិការបេតិកភណ្ឌពិភពលោក និងអាស៊ាន។ ចំណែកកិច្ចព្រមព្រៀងទីក្រុងប៉ារីស ថ្ងៃទី២៣តុលា ឆ្នាំ១៩៩១ ចុងក្រោយ ក៏ត្រូវតែរុញទៅកាន់ក្រុមប្រឹក្សាសន្តិសុខអង្គការសហប្រជាជាតិ ដើម្បីដោះស្រាយនៅក្នុងជម្លោះព្រំដែនកម្ពុជា-ថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៩
រដ្ឋាភិបាលកម្ពុជាត្រូវទប់ទល់នឹងស្ថានការណ៍នៅសមរភូមិមុខ និងទប់ទល់រាល់កលល្បិចរបស់ថៃ ដែលមានចរិតបំភ័ន្តមតិអន្តរជាតិ។ រដ្ឋាភិបាលកម្ពុជា ក៏បានរិះរកមធ្យោបាយដោះស្រាយជម្លោះតាមរយៈការទូត និងដោយសន្តិវិធី ដោយប្រើប្រាស់យន្តការអន្តរជាតិ ប្រកបដោយប្រសិទ្ធិភាពខ្ពស់បំផុត ដែលអាចដោះស្រាយបញ្ហានៃការឈ្លានពានរបស់ថៃមកលើកម្ពុជា។ នេះជាការឆ្លើយតបរបស់លោកនាយករដ្ឋមន្ត្រី ហ៊ុន សែន ចំពោះតំណាងរាស្ត្របក្សប្រឆាំង។
ក្នុងលិខិតជូនទៅប្រធានរដ្ឋសភា ដែលគេផ្សព្វផ្សាយនៅថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានឆ្លើយតបនឹងសំណួររបស់ក្រុមអ្នកតំណាងរាស្ត្រគណបក្សសមរង្ស៊ីចំនួន ៨ រូប ដែលបានចោទសួរថា តើហេតុអ្វីបានជារាជរដ្ឋាភិបាល មិនទាន់បានស្នើសុំឲ្យសហគមន៍អន្តរជាតិ ជាពិសេសប្រទេសជាហត្ថលេខីនៃកិច្ចព្រមព្រៀងទីក្រុងប៉ារីស ស្តីពីកម្ពុជា ឆ្នាំ១៩៩១ អនុវត្តកិច្ចព្រមព្រៀងនេះ ជាបន្ទាន់យ៉ាងត្រឹមត្រូវ និងពេញលេញ ក្នុងខណៈដែលប្រទេសកម្ពុជា កំពុងតែប្រឈមមុខការឈ្លានពានពីសំណាក់ប្រទេសថៃ?។
តាមលោកនាយករដ្ឋមន្ត្រី កិច្ចព្រមព្រៀងទីក្រុងប៉ារីសឆ្នាំ១៩៩១ ត្រូវបានធ្វើឡើងដោយអនុលោមតាមស្មារតីនៃធម្មនុញ្ញអង្គការសហប្រជាជាតិ។ ក្នុងនោះកិច្ចព្រមព្រៀងទាក់ទងនឹងអធិបតេយ្យ ឯករាជភាព បូរណភាព និងភាពមិនអាចរំលោភបាននៃដែនដី អព្យាក្រឹតភាព និងឯកភាពជាតិនៃកម្ពុជា ក៏បានចែងអំពីការប្តឹងទៅក្រុមប្រឹក្សាសន្តិសុខអង្គការសហប្រជាជាតិ និងយន្តការដោះស្រាយជម្លោះដោយសន្តិវិធីផ្សេងទៀត រួមមាន ការប្តឹងទៅតុលាការយុតិ្តធម៌អន្តរជាតិទីក្រុងឡាអេ។
ម្យ៉ាងទៀតតាមលោកនាយករដ្ឋមន្ត្រី សមាជិកអចិន្ត្រៃយ៍ទាំង ៥ នៃក្រុមប្រឹក្សាសន្តិសុខអង្គការសហប្រជាជាតិ ក៏ជាប្រទេសហត្ថលេខីនៃកិច្ចព្រមព្រៀងទីក្រុងប៉ារីសនោះដែរ។ ហេតុដូច្នេះហើយបានជារដ្ឋាភិបាលកម្ពុជា ជ្រើសរើសយកយន្តការក្រុមប្រឹក្សាសន្តិសុខអង្គការសហប្រជាជាតិ តុលាការយុត្តិធម៌អន្តរជាតិក្រុងឡាអេ អង្គការយូណេស្កូ និងគណៈកម្មាធិការបេតិកភណ្ឌពិភពលោក ដែលសុទ្ធសឹងជាយន្តការកំពូលកម្រិតពិភពលោក និងដែលមានប្រសិទ្ធិភាពខ្ពស់បំផុត សម្រាប់ដោះស្រាយការឈ្លានពានរបស់ថៃមកលើបូរណភាពទឹកដីកម្ពុជា។
ជាមួយនឹងការលើកឡើងខាងលើ លោកនាយករដ្ឋមន្ត្រី ហ៊ុន សែន ក៏បានបញ្ជាក់ទៅកាន់រដ្ឋសភាថា រដ្ឋាភិបាលរបស់លោក បានប្រកាន់គោលជំហរយ៉ាងត្រឹមត្រូវ ហើយបានចាត់វិធានការយ៉ាងសមស្របក្នុងការការពារជាតិ និងការអនុវត្តន៍គោលនយោបាយការទូតក្នុងគោលដៅការពារផលប្រយោជន៍ជាតិ និងមាតុភូមិកម្ពុជា។
ក៏ប៉ុន្តែគណបក្សប្រឆាំងនៅតែលើកឡើងថា ការដែលរដ្ឋាភិបាល មិនប្រើយន្តការកិច្ចព្រមព្រៀងទីក្រុងប៉ារីស ឆ្នាំ១៩៩១ លើជម្លោះព្រំដែនកម្ពុជា-ថៃ ដោយសារតែរដ្ឋាភិបាលកម្ពុជា ខ្លាចប៉ះពាល់ដល់ព្រំដែនជាមួយប្រទេសវៀតណាម។ បញ្ហាព្រំដែនកម្ពុជា-វៀតណាម ដែលបក្សប្រឆាំង បានឆ្កឹះឆ្កៀលជាយូរមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ