អង្គភាពប្រឆាំងអំពើពុករលួយនឹងចាត់ការលើសំណុំរឿងបាត់លុយរដ្ឋជាង ៥ លានដុល្លារ
នៅថ្ងៃច័ន្ទនេះ លោក គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកឡើងថា សំណុំរឿងបាត់លុយរដ្ឋជាង ៥ លានដុល្លារនៅក្រសួងសង្គមកិច្ច អតីតយុទ្ធជននិងយុវនីតិសម្បទា ត្រូវបានបញ្ជូនទៅកាន់អង្គភាពប្រឆាំងអំពើពុករលួយ ដើម្បីចាត់វិធានការតាមច្បាប់។ សេចក្តីអះអាងដូច្នេះបានធ្វើឡើង ក្រោយពីក្រសួងសេដ្ឋកិច្ចនិងហិរញ្ញវត្ថុ បានធ្វើលិខិតប្រកាសឲ្យក្រសួងសង្គមកិច្ច បង្វិលថវិការដ្ឋដែលបាត់បង់ដោយអំពើពុករលួយជាង២២ពាន់លានរៀល ដែលស្មើប្រមាណជាង ៥ លានដុល្លារចូលថវិការដ្ឋវិញ។
ចុះផ្សាយនៅថ្ងៃ៖
ស្តាប់ - ០២:១៧
នៅក្រៅវេទិកាសភា ស្តីពី ការរៀបចំសេចក្តីព្រាងច្បាប់ថវិកាជាតិឆ្នាំ២០១២ នៅរដ្ឋសភាព្រឹកមិញ លោក គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ថ្លែងទៅកាន់ក្រុមអ្នកកាសែតថា ករណីអំពើពុករលួយ នៅក្រសួងសង្គមកិច្ច ដែលមន្ត្រីបានលួចប្រាក់សោធននិវត្តន៍របស់អ្នកចូលនិវត្តន៍ និងចំណាយមិនប្រក្រតីជាង ៥លានដុល្លារ គឺស្ថិតនៅក្នុងដៃរបស់អង្គភាពប្រឆាំង អំពើពុករលួយ។
លោក គាត ឈន់ បានបញ្ជាក់ថា ការចាត់វិធានការតាមផ្លូវច្បាប់ ឬយ៉ាងណានោះ នៅលើឆន្ទានុសិទ្ធិរបស់អង្គភាពប្រឆាំងអំពើពុករលួយ។ ថាតើអង្គភាពនេះចង់ប្ដឹង ឬក៏មិនចង់ប្ដឹង។
តាមលោក គាត ឈន់ យុទ្ធសាស្ត្ររបស់អង្គភាពប្រឆាំងអំពើពុករលួយ នាពេលបច្ចុប្បន្ននេះ គឺយកការអប់រំប៉ុណ្ណោះ។ ក៏ប៉ុន្តែបើគេបណ្តែតបណ្តោយឲ្យមានការកិបកេងលុយរដ្ឋដូច្នេះ ហើយមិនត្រូវបានប្តឹងផ្តល់នោះ នឹងកើតឡើងមានបញ្ហាកាន់តែច្រើន។
យ៉ាងណាក៏ដោយ លោក គាត ឈន់ បានបញ្ជាក់ថា ក្រសួងសេដ្ឋកិច្ច និងហិរញ្ញវត្ថុ ដែលជាស្ថាប័នគ្រប់គ្រងថវិកាជាតិ កំពុងជំរុញឲ្យមន្ត្រីក្រសួងសង្គមកិច្ច សងលុយរដ្ឋ ដែលបានបាត់បង់ចំនួនជាង ៥លានដុល្លារ ដើម្បីបង្វែរចូលថវិការដ្ឋវិញ។
កាលពីថ្ងៃ៥កក្កដា ឆ្នាំ២០១១ លោក គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានសរសេរលិខិតមួយ ដាក់ទៅកាន់លោក អ៊ិត សំហេង រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ដើម្បីឲ្យក្រសួងសង្គមកិច្ច បង្វិលថវិកាដែលបានបាត់ ក្នុងអំពើពុករលួយ ដោយសារការបើកប្រាក់របស់មន្ត្រីអតីតយុទ្ធជន និងមន្ត្រីចូលនិវត្តន៍ ព្រមទាំងការចំណាយខុសប្រក្រតី សរុបជាង ២២ពាន់លានរៀល ស្មើប្រមាណ ៥,៤៨ លានដុល្លារអាមេរិក ចូលមកជាថវិការដ្ឋវិញ។
កាលពីខែមីនា លោកនាយករដ្ឋមន្ត្រី ហ៊ុន សែន បានដាក់បទបញ្ជា ឲ្យអង្គភាពប្រឆាំងអំពើពុករលួយបើកការស៊ើបសង្កេត ចំពោះមន្ត្រីក្នុងក្រសួងសង្គមកិច្ច ដែលបានកិបកេងប្រាក់សោធននិវត្តន៍របស់មន្ត្រីរាជការ និងអតីតយុទ្ធជន។
ក៏ប៉ុន្តែលទ្ធផលនៃការស៊ើបអង្កេតករណីពុករលួយក្នុងក្រសួងសង្គមកិច្ច មកដល់ពេលនេះ មិនត្រូវបានគេទម្លាយឲ្យដឹងឡើយ។
លោក ឱម យ៉ិនទៀង ប្រធានអង្គភាពប្រឆាំងអំពើរលួយ នៅថ្ងៃច័ន្ទនេះ បានបដិសេធ មិនធ្វើអត្ថាធិប្បាយឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ