បញ្ហារោងចក្រមិថុនា៖ សហជីពកម្មករគំរាមធ្វើមហាបាតុកម្ម
សំណុំរឿងអគ្គិភ័យឆាបឆេះរោងចក្រមិថុនាកាលពីចុងខែមីនាកន្លង ទៅនៅមិនទាន់ចប់នៅឡើយទេមកទល់នឹងពេលនេះ។ សហជីពកម្មករបានព្រមានធ្វើមហាបាតុកម្មនៅទូទាំងប្រទេសប្រសិនបើ បញ្ហានេះមិនត្រូវបានដោះស្រាយនៅមុនដំណាច់ខែកក្កដាទេនោះ។ ការប្រកាសគំរោងមហាបាតុកម្មនេះបានធ្វើឡើងនៅព្រឹកថ្ងៃអាទិត្យនេះ ក្នុងពិធីជួបជុំមួយរវាងសហជីពនិងកម្មករប្រហែល ៣០០នាក់ នៅទីក្រុងភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ប្រធានសហភាពសហជីពកម្ពុជា លោករ៉ុង ឈុន បានប្រកាសនៅថ្ងៃនេះថា សហជីពកម្មករនឹងប្រកាសធ្វើមហាបាតុកម្មនៅទូទាំងប្រទេសប្រសិនបើបញ្ហារោងចក្រមិថុនាមិនត្រូវបានដោះស្រាយនៅក្នុងដំណាច់ខែកក្កដាទេនោះ។ ការព្រមានបែបនេះបានធ្វើឡើងនៅក្នុងជំនួបរវាងសហជីពនិងកម្មកររោងចក្រមិថុនាប្រមាណជា៣០០នាក់នៅទីក្រុងភ្នំពេញ។សកម្មជនសហជីពរូបនេះបានអំពាវនាវឲ្យថៅកែរោងចក្រមិថុនា និងក្រសួងការងារក៏ដូចជាក្រសួងពាក់ព័ន្ធផ្សេងទៀតត្រូវតែបើកប្រាក់អតីតភាពជូនកម្មករនៅមុនដំណាច់ខែកក្កដានេះប្រសិនបើពួកគេមិនចង់ឃើញមហាបាតុកម្មកើតឡើងទេនោះ។
រោងចក្រ June Textile ឬរោងចក្រមិថុនា ដែលមានទីតាំងនៅក្នុងសង្កាត់ទឹកថ្លា រាជធានីភ្នំពេញត្រូវបានអគ្គិភ័យឆាបឆេះទាំងស្រុងកាលពីថ្ងៃទី៣០មីនាឆ្នាំ២០១១ដោយបន្សល់ទុកកម្មករ ៤០០០នាក់គ្មានការងារធ្វើ។ កម្មករទាំងនោះបានទាមទារប្រាក់អតីតភាពការងាររបស់ខ្លួនស្របតាមច្បាប់ការងារ ប៉ុន្តែ ភាគីថៅកែអះអាងថា ខ្លួនមានលទ្ធភាពបើកប្រាក់អតីតភាពការងារជូនកម្មករតែ២០ដុល្លារម្នាក់ក្នុងមួយឆ្នាំតែប៉ុណ្ណោះ។ បញ្ហាឆេះរោងចក្រត្រូវបានថៅកែចាត់ទុកជាករណីប្រធានស័ក្តិដែលកម្មករមិនបានទទួលសំណងតាមច្បាប់ការងារទេ។ កម្មករមួយភាគបានសុខចិត្តទទួលយកដំណោះស្រាយនេះ តែនៅសល់មួយភាគទៀតបន្តការទាមទាររហូតមកទល់សព្វថ្ងៃ។
កាលពីថ្ងៃទី១៧ មិថុនា កន្លងទៅ ក្រុមប្រឹក្សាអាជ្ញាកណ្ដាលបានបង្គាប់ឱ្យភាគីថៅកែបើកប្រាក់ ជូនកម្មករទៅតាមលក្ខខណ្ឌការងារ ក៏ប៉ុន្ដែថៅកែរោងចក្របានជំទាស់ទៅនឹងការសម្រេច នេះ។ សហជីពកម្មករបានព្យាយាមធ្វើបាតុកម្មមួយលើកជាពីរលើក ក៏ប៉ុន្តែ ពួកគេត្រូវបានបង្ក្រាបដោយសមត្ថកិច្ចប៉ូលិស។ ក្រុមសហជីពដែលស្និទ្ធនឹងបក្សប្រឆាំងក៏ធ្លាប់បានបង្ហាញជំហរខ្វែងគ្នាដែរជុំវិញការទាមទារនេះ។ លោកជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជាធ្លាប់អះអាងថា វាជាការគួរឲ្យខ្មាសអៀននៅពេលដែលគេនាំគ្នាទាមទារប្រាក់ពីថៅកែក្នុងករណីដែលរោងចក្ររបស់កាត់ត្រូវបានភ្លើងឆេះទាំងស្រុងទៅហើយនោះ។ យ៉ាងណាក៏ដោយ សហជីពមួយចំនួនយល់ថា រោងចក្រនេះមានក្រុមហ៊ុនធានារ៉ាប់រងចេញសងដែលមិនបានធ្វើឲ្យថៅកែខាតបង់ឡើយ។
រយៈពេលជាង៣ខែកន្លងទៅ កម្មកររោងចក្រមិថុនាដែលទន្ទឹងរង់ចាំដំណោះស្រាយបានត្អូញត្អែរអំពីការលំបាកផ្នែកជីវភាពនៅពេលដែលពួកគេគ្មានប្រាក់ខែ រីឯទំនិញ និងប្រេងសាំងចេះតែឡើងថ្លៃខ្ពស់ជាលំដាប់។ នេះជាមូលហេតុដែលក្រុមសហជីពបានដាក់គំនាបទៅលើអាជ្ញាធរតាមរយៈការប្រកាសគំរោងមហាបាតុកម្មនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ