ប្រមុខការទូតកម្ពុជា ប្រតិកម្មចំពោះមន្ត្រីការទូតអាមេរិកលើឯកសារសម្ងាត់
នៅថ្ងៃសុក្រនេះ លោក ហោ ណាំហុង បានបញ្ចេញប្រតិកម្ម ចំពោះមន្ត្រីស្ថានទូតអាមេរិកប្រចាំកម្ពុជា ដែលបានសរសេរក្នុងឯកសារសម្ងាត់ ពាក់ព័ន្ធនឹងតួនាទីរបស់លោកក្នុងសម័យខ្មែរក្រហម។ ប្រតិកម្មរបស់ប្រមុខការទូតកម្ពុជា ដោយសារតែ Website ដ៏ល្បីល្បាញ ឈ្មោះ Wikileaks ទើបតែបានទម្លាយឯកសារសម្ងាត់ជាច្រើន របស់ទូតអាមេរិក និយាយពីកម្ពុជា កាលពីដើមសប្តាហ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
ក្រសួងការបរទេសកម្ពុជា បានប្រកាសនៅថ្ងៃសុក្រនេះថា លោក ហោ ណាំហុង រដ្ឋមន្ត្រីការបរទេស កាលពីថ្ងៃ១៤កក្កដា ឆ្នាំ២០១១ បានកោះហៅលោក ចេហ្វ ដេហ្គ័ល ( Jeff Daigle ) អនុប្រធានស្ថានបេសកកម្ម និងជាភារធារីស្តីទីរបស់ស្ថានទូតសហរដ្ឋអាមេរិកនៅភ្នំពេញ មកធ្វើការតវ៉ាអំពីរបាយការណ៍សម្ងាត់មួយ ស្តីពី ព័ត៌មានពាក់ព័ន្ធនឹងប្រវត្តិរូបរបស់លោកប្រមុខការទូត ហោ ណាំហុង។
សេចក្តីជូនព័ត៌មាន ចុះថ្ងៃ១៥កក្កដា ឆ្នាំ២០១១ បានបង្ហាញថា ប្រវត្តិរូបរបស់លោកប្រមុខការទូតកម្ពុជា ហោ ណាំហុង ដែលសរសេរដោយលោក អាឡិកសាន់ដ័រ អាវីហ្ស៊ូ ( Alexander A. Arvizu ) អតីតអនុប្រធានស្ថានបេសកម្មរបស់ស្ថានទូតសហរដ្ឋអាមេរិកនៅភ្នំពេញ ចុះថ្ងៃទី៦មិថុនា ឆ្នាំ២០០២ និងត្រូវបានផ្សាយដោយ Wikileaks កាលពីថ្ងៃទី១១កក្កដា ឆ្នាំ២០១១។
តាមសេចក្តីជូនព័ត៌មាន លោក ហោ ណាំហុង បានស្នើឲ្យភារធារីស្តីទីស្ថានទូតអាមេរិកប្រចាំក្រុងភ្នំពេញ បញ្ជូនទៅក្រសួងការបរទេសសហរដ្ឋអាមេរិក នូវការតវ៉ាយ៉ាងខ្លាំងក្លាបំផុត ចំពោះសេចក្តីរាយការណ៍ពីប្រវត្តិរូបផ្ទាល់ខ្លួនរបស់លោក ហោ ណាំហុង ដែលសេចក្តីប្រកាសចាត់ទុកថា ពោរពេញទៅដោយការចោទប្រកាន់មួលបង្កាច់ មិនអាចទទួលយកបាន។
ជាមួយគ្នានោះ ក្នុងសេចក្តីជូនព័ត៌មានដដែល ក្រសួងការបរទេស និងសហប្រតិបត្តិការអន្តរជាតិរបស់កម្ពុជា ក៏បានស្នើឲ្យស្ថានទូតសហរដ្ឋអាមេរិកនៅភ្នំពេញ បញ្ចេញមតិអំពីរបាយការណ៍ ដែលមានលក្ខណៈបង្កាច់បង្ខូចកេរ្តិ៍ឈ្មោះដ៏ធ្ងន់ធ្ងរលើប្រមុខការទូត។
តាមឯកសារសម្ងាត់របស់ Wikileaks ប្រវត្តិរូបផ្ទាល់ខ្លួនរបស់លោក ហោ ណាំហុង ដែលមន្ត្រីការទូតអាមេរិកប្រចាំកម្ពុជា បានលើកឡើងនោះ គឺទាក់ទងនឹងតួនាទីរបស់លោក ហោ ណាំហុង នៅគុកបឹងត្របែក ដែលថា លោកប្រមុខការទូតកម្ពុជាបានចូលរួមក្នុងសកម្មភាពសម្លាប់មនុស្សនៅគុកបឹងត្របែក ក្នុងសម័យខ្មែរក្រហម។
យ៉ាងណាក៏ដោយ នៅថ្ងៃសុក្រនេះ អ្នកនាំពាក្យស្ថានទូតអាមេរិកប្រចាំកម្ពុជា លោក Mark Wenig បានឆ្លើយតបតាមអ៊ីម៉ែលមកអ្នកកាសែតថា យើងនឹងមិនអាចធ្វើអត្ថាធិប្បាយលើភាពត្រឹមត្រូវស្របច្បាប់ និងស្របនឹងសភាពការណ៍ពិត លើសំណុំឯកសារទាំងឡាយរបស់រដ្ឋាភិបាលអាមេរិក ដែលបានលេចធ្លាយតាម Wikileaks នោះឡើយ។
អំពីកិច្ចប្រជុំរវាងលោកឧបនាយករដ្ឋមន្ត្រី ហោ ណាំហុង និងលោក Jeff Daigle កាលពីថ្ងៃទី១៤កក្កដា ឆ្នាំ២០១១ ក៏ត្រូវបានស្ថានទូតអាមេរិកផ្សព្វផ្សាយថា ក្នុងកិច្ចប្រជុំនោះ លោក Jeff Daigle បានជម្រាបជូនលោកឧបនាយករដ្ឋមន្ត្រី ហោ ណាំហុងថា ទំនាក់ទំនងរវាងអាមេរិក និងកម្ពុជា គឺមានភាពរឹងមាំ និងផ្តោតសំខាន់លើផលប្រយោជន៍ជាសាធារណៈ ក្នុងគោលដៅជាច្រើន។
សហរដ្ឋអាមេរិក ក៏មានទំនុកចិត្តថា ភាពជាដៃគូរបស់រដ្ឋាភិបាលលោក អូបាម៉ា ដែលកំពុងធ្វើការនៅកម្ពុជា គឺដើម្បីពង្រឹងទំនាក់ទំនាក់កាន់តែល្អថែមទៀតរវាងប្រទេសទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ