សាលាឧទ្ធរណ៍ផ្តន្ទាទោសបុគ្គលិកអង្គការលីកាដូដាក់ពន្ធនាគារ២ ឆ្នាំ
នៅព្រឹកថ្ងៃទី១៤កក្កដានេះ ចៅក្រមតុលាការសាលាឧទ្ធរណ៍ បានសម្រេចតម្កល់សេចក្តីសម្រេចរបស់តុលាការខេត្តតាកែវ លើសំណុំរឿងបុគ្គលិកម្នាក់អង្គការសិទ្ធិមនុស្សលីកាដូ។ ក៏ប៉ុន្តែក្នុងសេចក្តីសម្រេចនោះ ចៅក្រមបានប្តូរបទចោទលើបុគ្គលិកអង្គការលីកាដូ ពីបទផ្សាយព័ត៌មានមិនពិត ទៅជាបទញុះញង់ឲ្យប្រព្រឹត្តបទឧក្រិដ្ឋ។ បុគ្គលិកអង្គការលីកាដូ ឈ្មោះលាង សុខជឿន អាយុ ២៨ ឆ្នាំ ត្រូវបានតុលាការខេត្តតាកែវ កាលពីថ្ងៃទី៣០សីហាឆ្នាំ២០១០ កាត់ទោស ឲ្យជាប់ពន្ធនាគាររយៈពេល ២ ឆ្នាំ ពាក់ព័ន្ធនឹងការបាចត្រាក់រិះគន់រដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
សេចក្តីសម្រេចរបស់ចៅក្រមតុលាការសាលាឧទ្ធរណ៍នៅថ្ងៃ១៤កក្កដានេះ បានធ្វើឡើង ក្រោយពីបើកសវនាការលើសំណុំរឿងចោទប្រកាន់បុគ្គលិកអង្គការលីកាដូ កាលពីថ្ងៃទី៣០មិថុនា ឆ្នាំ២០១១។ ចៅក្រមបានតម្កល់សេចក្តីសម្រេចរបស់តុលាការខេត្តតាកែវទុកជាបានការ។ ពោលគឺ យុវជន លាង សុខជឿន បុគ្គលិកអង្គការលីកាដូ ត្រូវបានផ្តន្ទាទោសដាក់ពន្ធនាគាររយៈពេល ២ ឆ្នាំ។ ក៏ប៉ុន្តែចៅក្រមតុលាការសាលាឧទ្ធរណ៍នៅព្រឹកមិញ បានប្រកាសដូរបទចោទប្រកាន់លើសកម្មជនការពារសិទ្ធិមនុស្សរូបនេះ ពីបទផ្សាយព័ត៌មានមិនពិត តាមច្បាប់អ៊ុនតាក់មកជាបទញុះញង់ឲ្យប្រព្រឹត្តបទឧក្រិដ្ឋតាមច្បាប់ក្រមព្រហ្មទណ្ឌថ្មី។
ការប្តូរបទចោទប្រកាន់នាំឲ្យអង្គការលីកាដូចេញសេចក្តីថ្លែងការណ៍ភ្លាមៗនៅថ្ងៃនេះ ដោយសម្តែងការភ្ញាក់ផ្អើល និងបានបដិសេធយ៉ាងដាច់អហង្ការ ចំពោះការសម្រេចរបស់តុលាការសាលាឧទ្ធរណ៍។ លីកាដូ បានចាត់ទុកថា អ្នកការពារសិទ្ធិមនុស្សនៅកម្ពុជា កំពុងប្រឈមមុខនឹងគ្រោះថ្នាក់កាន់តែច្រើន។ សកម្មជនសិទ្ធិជាច្រើននាក់ត្រូវបានចាប់ឃុំខ្លួនក្នុងពន្ធនាគារ។
បន្ទាប់ពីស្តាប់សេចក្តីសម្រេច លោក លាង សុខជឿន បានចាត់ទុកការផ្តន្ទាទោសរូបលោកថា ជារឿងអយុត្តិធម៌ ហើយថា ការចាប់ខ្លួនលោកកាលពីថ្ងៃ២៩ឧសភា ឆ្នាំ២០១០ ខុសពីឈ្មោះក្នុងដីកា។ សកម្មជនសិទ្ធិមនុស្សរូបនេះ បានប្រកាសថា មិនប្តឹងទាស់ទៅកាន់តុលាការកំពូលទៀតទេព្រោះរូបគេគ្មានជំនឿលើតុលាការនៅកម្ពុជាឡើយ។
កាលពីថ្ងៃទី៣០សីហាឆ្នាំ២០១០ តុលាការខេត្តតាកែវ បានសម្រេចផ្តន្ទាទោសបុគ្គលិកអង្គការសិទ្ធិមនុស្សលីកាដូ លាង សុខជឿន ឲ្យជាប់ពន្ធនាគារពីរឆ្នាំ ពីបទផ្សាយព័ត៌មានមិនពិត ពាក់ព័ន្ធនឹងរឿងបាចខិត្តប័ណ្ណរិះគន់រដ្ឋាភិបាល។
ក្នុងសំណុំរឿងបាចត្រាក់នោះ ចៅក្រមតុលាការខេត្តតាកែវក៏បានសម្រេចផ្តន្ទាទោសកំបាំងមុខលើព្រះសង្ឃខ្មែរក្រោម ព្រះនាមថាច់ កុងភួង ដែលជាមេខ្លោងឲ្យជាប់ពន្ធនាគារចំនួន ៣ ឆ្នាំ។ តុលាការខេត្តតាកែវ ក៏បានកាត់ទោសបុរសខ្មែរកម្ពុជាក្រោមពីរនាក់ទៀត គឺលោក ថាច់ វណ្ណៈ និងលោក ថាច់ ឡេ ដាក់ពន្ធនាគារម្នាក់ៗ ចំនួន ២ ឆ្នាំ។
ជនជាប់ចោទទាំង ៤ នាក់ ត្រូវបានចោទប្រកាន់ពីបទផ្សព្វផ្សាយព័ត៌មានពិត តាមរយៈការបាចខិត្តប័ណ្ណ រិះគន់របបដឹកនាំសព្វថ្ងៃរបស់គណបក្សប្រជាជនកម្ពុជាថា ជាប់ពាក់ព័ន្ធនឹងប្រទេសវៀតណាម។ ខិត្តប័ណ្ណទាំងនោះ ត្រូវបានគេរកឃើញជាបន្តបន្ទាប់ នៅក្នុងខេត្តតាកែវ ជាប់ព្រំដែនប្រទេសវៀតណាមចាប់តាំងពីខែវិច្ឆិកាឆ្នាំ២០០៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ