តុលាការកំពូលសម្រេចលើករណីគ្រឿងញៀននៅខេត្តកំពង់ស្ពឺ
នៅព្រឹកថ្ងៃទី១៣កក្កដានេះ មេខ្លោងផលិតគ្រឿងញៀនដ៏ធំក្នុងខេត្តកំពង់ស្ពឺ ឈ្មោះ ជា ជុង និងគូកន៣នាក់ទៀត ជាជនជាតិថៃ និងចិន ត្រូវបានតុលាការកំពូលសម្រេចតម្កល់សាលដីកាសាលាឧទ្ធរណ៍។ សំណុំរឿងផលិតគ្រឿងញៀន កាលពីឆ្នាំ២០០៧ ត្រូវបានតុលាការផ្តន្ទាទោសលើជនទាំង៤ឲ្យជាប់ពន្ធនាគារពី ២០ឆ្នាំ ទៅ ២៥ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
សេចក្តីសម្រេចបិទផ្លូវតវ៉ារបស់តុលាការកំពូលនៅថ្ងៃនេះ បានធ្វើឡើងក្រោយពីសវនាការជំនុំជម្រះលើសំណុំរឿងផលិតគ្រឿងញៀន នៅខេត្តកំពង់ស្ពឺ កាលពីថ្ងៃទី២២មិថុនា។ តុលាការកំពូលបានសម្រេចតម្កល់សាលដីការបស់សាលាឧទ្ធរណ៍ ទុកជាបានការទាំងមូល។ ពោលគឺមេខ្លោងផលិតគ្រឿងញៀន ជា ជុង ជាអតីតទីប្រឹក្សាឧបនាយករដ្ឋមន្ត្រីលោក ញឹក ប៊ុនឆៃ និងគូកនជាជនជាតិថៃម្នាក់ និងចិនពីរនាក់ ដែលជាប់ព័ន្ធពាក់នឹងករណីគ្រឿងញៀនដ៏ធំនៅខេត្តកំពង់ស្ពឺកាលពីឆ្នាំ២០០៧ ត្រូវផ្តន្ទាទោសដាក់ពន្ធនាគារ ក្នុងម្នាក់ៗពី ២០ឆ្នាំ ទៅ ២៥ឆ្នាំ។
សំណុំរឿងលួចលាក់ផលិតគ្រឿងញៀនក្នុងដីឡូដិ៍ទំហំ៥ហិកតា នៅខេត្តកំពង់ស្ពឺ មានជនជាប់ចោទឈ្មោះ ជា ជុង អាយុ ៤៥ឆ្នាំ ឈ្មោះ ឆ ណាក់ស៊ី អាយុ ៣៤ឆ្នាំ ជាជនជាតិថៃ ឈ្មោះ ឆាយ ខាងស៊ី អាយុ ៤៨ឆ្នាំ ជាជនជាតិចិន។ អ្នកទាំង៣ ត្រូវបានតុលាការផ្តន្ទាទោសដាក់ពន្ធនាគារក្នុងម្នាក់ៗ រយៈពេល ២៥ ឆ្នាំ។ ចំណែកឈ្មោះ រ៉ាន់ យ៉ាង ភេទស្រី អាយុ ៣៣ឆ្នាំ ជាជនជាតិចិន ត្រូវបានតុលាការផ្តន្ទាទោសដាក់ពន្ធនាគារ ២០ឆ្នាំ ពីបទផលិត និង ជួញដូរគ្រឿងញៀន។
កាលពីថ្ងៃទី១ មេសា ឆ្នាំ២០០៧ នៅដីឡូដិ៍ជាប់ផ្លូវជាតិលេខ៤ ក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ប៉ូលិសបានបង្ក្រាបទីតាំងលួចលាក់ផលិតគ្រឿងញៀនដ៏ធំ ដោយចាប់ឃាត់ខ្លួនមនុស្សសរុបចំនួន ១៨នាក់។ ក្នុងនោះ មានជនជាតិចិន ៣នាក់ ជនជាតិថៃម្នាក់ និងកម្មករខ្មែរចំនួន ១៤នាក់ ព្រមទាំងរឹបអូសសារធាតុគីមី សម្រាប់ផលិតគ្រឿងញៀនជិត ៧តោន។
នៅថ្ងៃទី១០មករា ឆ្នាំ២០០៨ តុលាការក្រុងភ្នំពេញ បានសម្រេចលើកលែងការចោទប្រកាន់លើកម្មករស៊ីឈ្នួលខ្មែរចំនួន ១៤នាក់។ ក៏ប៉ុន្តែតុលាការបានផ្តន្ទាទោសឈ្មោះ ជា ជុង ឈ្មោះ ឆ ណាក់ស៊ី ឈ្មោះ ឆាយ ខាងស៊ី ដាក់ពន្ធនាគារម្នាក់ៗ ២៥ឆ្នាំ និងឈ្មោះ រ៉ាក់ យ៉ាង ភេទស្រី ជាជនជាតិចិន ផ្តន្ទាទោសដាក់ពន្ធនាគារ ២០ឆ្នាំ ពីបទផលិត និង ជួញដូរគ្រឿងញៀន។
ដោយឡែកក្នុងសំណុំរឿងគ្រឿងញៀននៅខេត្តកំពង់ស្ពឺនោះ ជនជាតិចិនឈ្មោះ ចិន ធាងវិន និងអតីតទីប្រឹក្សាលោក ហេង សំរិន ប្រធានរដ្ឋសភា ឈ្មោះ អ៊ុំ ឆាយ បានស្លាប់ជាបន្តបន្ទាប់ក្រោយពីប៉ូលិសចាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ