ដើមបណ្តឹងរដ្ឋប្បវេណីចង់បានទិវាចងចាំថ្នាក់ជាតិលើរបបខ្មែរក្រហម
មុនបញ្ចប់សវនាការនៅថ្ងៃពុធនេះ អង្គជំនុំជម្រះបានជជែកអំពីបំណងរបស់ដើមបណ្តឹងរដ្ឋប្បវេណីដែលចង់ទាមទារសំណងរួមពីក្រុមជនជាប់ចោទ។ ថ្ងៃរំលឹកការចងចាំស្តូបដើម្បីរំលឹកដល់វិញ្ញាណខណ្ឌអ្នកស្លាប់ សារមន្ទីរ ឬបណ្ណសារ ទាំងនេះគឺជាការទាមទាររបស់ដើមបណ្តឹងរដ្ឋប្បវេណី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ក្រៅពីប្រធានបទនេះ តាំងពីព្រឹកមក សវនាការបានផ្តោតទៅអាជ្ញាយុកាលនៃបទល្មើសក្រោមក្រមព្រហ្មទណ្ឌកម្ពុជាឆ្នាំ១៩៥៦ ដែលត្រូវបានប្រើចំពោះអតីតមេដឹកនាំរបបខ្មែរក្រហមទាំង៤។
រក្សាទីកន្លែងពិឃាត កសាងបញ្ជីឈ្មោះជនរងគ្រោះដែលត្រូវបានសម្លាប់ កសាងសារៈមន្ទីរដើម្បីរក្សាឯកសារដែលពាក់ព័ន្ធរបបខ្មែរក្រហម សាងសង់ស្តូបមួយដើម្បីអនុញ្ញាតអោយមានការរៀបចំពិធីរំលឹកដល់វិញ្ញាណក្ខន្ធអ្នកស្លាប់ពីសំណាក់ជនរួមជាតិទូទៅដោយមិនប្រកាន់សាសនាពណ៌សម្បុរ និងបង្កើតអោយមានទិវារំលឹកវិញ្ញាណក្ខន្តថ្នាក់ជាតិមួយផងដែរ។ ទាំងនេះគឺសុទ្ធសឹងតែជាសំណងដែលដើមបណ្តឹងរដ្ឋប្បវេណី តំណាងដោយសហមេធាវីជាតិ លោកពេជ អង្គ ទាមទារនៅចំពោះក្រុមប្រឹក្សាចៅក្រមនៅក្នុងសវនាការកាលពីរសៀលថ្ងៃពុធនេះ។ សំណងរដ្ឋប្បវេណីគឺផ្នែកមួយនៃការជួសជុលផ្នែកផ្លូវចិត្តហើយដែលវាគឺជាសិទ្ធិរបស់ជនរងគ្រោះស្របតាមច្បាប់អន្តរជាតិផងដែរ នេះគឺអំណះអំណាងរបស់សហមេធាវីអន្តរជាតិតំណាងដើមបណ្តឹងរដ្ឋប្បវេណី។ សហមេធាវីអន្តរជាតិបានទាញចំណាប់អារម្មណ៍អង្គជំនុំជម្រះដោយស្នើទៅក្រុមប្រឹក្សាចៅក្រម មិនអោយគិតថា សំណងទាំងនេះគឺជាបន្ទុក ប៉ុន្តែវាជាសិទ្ធិរបស់ជនរងគ្រោះដែលត្រូវទទួលបាន។
មិនមានការឆ្លើយតប ឬប្រតិកម្មពីភាគីចុងចោទនិងភាគីណាផ្សេងឡើយនៅពេលដែលប្រធានចៅក្រមបានសួរនៅក្នុងសវនាការនោះ។ ទោះយ៉ាងណាក្តី ការទាមទារខាងលើនេះ នឹងជាកម្មវត្ថុនៃការពិចារណារបស់ក្រុមចៅក្រម។
តាមពិតនៅថ្ងៃនេះ ដែលជាថ្ងៃទី៣នៃការបើកសវនាការបឋម ដើម្បីជំនុំជម្រះអតីតមេដឹកនាំខ្មែរក្រហមនោះ តាំងពីព្រឹកមក សវនាការបានផ្តោតទៅលើអាជ្ញាយុកាលនៃបទល្មើសក្រោមក្រមព្រហ្មទណ្ឌកម្ពុជាឆ្នាំ១៩៥៦។ បញ្ហាគឺថា នៅក្នុងចំណោមការចោទប្រកាន់នានា តុលាការខ្មែរក្រហមបានចោទប្រកាន់ក្រុមអតីតមេដឹកនាំខ្មែរក្រហមពីបទមនុស្សឃាត ការធ្វើទារុណកម្ម និងការធ្វើទុក្ខបុកម្នេញខាងផ្នែកសាសនាដែលបទល្មើសទាំងនេះស្ថិតនៅក្រោមក្របខណ្ឌនៃក្រមព្រហ្មទណ្ឌនៃកម្ពុជាឆ្នាំ១៩៥៦។
ក្រុមមេធាវីការពារក្តីអោយអតីតមេដឹកនាំខ្មែរក្រហមបានទាមទារអោយតុលាការលប់ការចោទប្រកាន់ទាំងនេះ ដោយសារតែវាហួសអាជ្ញាយុកាលនៃការចោទប្រកាន់ ស្របតាមខ្លឹមសារនៃក្រមព្រហ្មទណ្ឌឆ្នាំ១៩៥៦នោះ។ ក្រុមសហព្រះរាជអាជ្ញារ និងសហមេធាវីដើមបណ្តឹងរដ្ឋប្បវេណីវិញ នៅតែទាមទារអោយតុលាការរក្សាការចោទប្រកាន់ទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ