កម្មករ២៩០នាក់ក្នុងសហគ្រាសផលិតនំនិងស្ករគ្រាប់នឹងធ្វើកូដកម្ម
កម្មករ២៩០នាក់ ក្នុងសហគ្រាសផលិតនំនិងស្ករគ្រាប់មួយ ស្ថិតក្នុងស្រុកឧត្តុង្គ ខេត្តកំពង់ស្ពឺ នឹងធ្វើកូដកម្ម នៅមុខសហគ្រាស ដើម្បីប្រឆាំងនឹងថៅកែ ដែលចេះតែរំលោភសិទ្ធិរបស់ពួកគេ និងបណ្តេញកម្មករចេញជាបន្តបន្ទាប់ ដោយគ្រាន់តែពួកគេមានបំណងចូលរួមក្នុងសហជីពការងារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
ការរើសអើងសហជីព និងការកេងប្រវ័ញ្ចកម្លាំងពលកម្មរបស់កម្មករ តាមរូបភាពរំលោភលើលក្ខខណ្ឌការងារ នៅតែជាអ្វីដែលអង្គការសង្គមស៊ីវិល ទាមទារឲ្យថៅកែសហគ្រាសនិងរោងចក្រ ត្រូវធ្វើការផ្លាស់ប្តូរ។
សហព័ន្ធសហជីពកម្មករចំណីអាហារ និងសេវាកម្មកម្ពុជា បានប្រកាសថា កម្មករ២៩០នាក់ ដែលបច្ចុប្បន្នកំពុងធ្វើការនៅសហគ្រាសផលិតនំ និងស្ករគ្រាប់ដែលមានយីហោ លីមហៀងយូសញ្ញាសេះហោះ នៅក្នុងស្រុកឧត្តុង្គ ខេត្តកំពង់ស្ពឺ នឹងធ្វើកូដកម្មប្រឆាំង ទៅនឹងថៅកែរបស់ខ្លួន នៅថ្ងៃទី២៨ ខែមិថុនាខាងមុខនេះ ដើម្បីទាមទារឲ្យសហគ្រាសគោរពនូវលក្ខខណ្ឌការងារមួយចំនួន ព្រមទាំងទទួលយកតំណាងសហជីពនិងកម្មករប្រមាណ១០នាក់ ឲ្យចូលបំរើការងារឡើងវិញ បន្ទាប់ពីថៅកែសហគ្រាសបានបញ្ឈប់ពួកគេដោយគ្មានមូលហេតុ។
ថៅកែសហគ្រាសបានបញ្ឈប់កម្មករទាំងនោះជិត១ខែមកហើយ បន្ទាប់ពីពួកគេមានបំណងចូលជាសមាជិកក្នុងសហជីពមួយ ដែលបង្កើតឡើងនៅក្នុងសហគ្រាស ដើម្បីការពារ ផលប្រយោជន៍របស់កម្មករ ក្រោយពីកម្មករទាំងនោះ ត្រូវថៅកែបង្ខំឲ្យធ្វើការលើសពី៨ម៉ោងក្នុងមួយថ្ងៃ បង្ខំឲ្យធ្វើការថែមម៉ោង មិនមានប្រាក់កម្រៃនិងធ្វើការមិនមានថ្ងៃឈប់សម្រាក។
គម្រោងធ្វើកូដកម្មដ៏កម្រមួយ ក្នុងសហគ្រាសនេះ អាជ្ញាធរស្រុកឧដុង្គនៅមិន ទាន់ដឹងនៅឡើយទេរហូតដល់ថ្ងៃនេះ ។ តែជាញឹកញយ កូដកម្មរឺបាតុកម្ម ដែលតវ៉ានៅទីសាធារណៈ អាជ្ញាធរមូលដ្ឋានតែងដាក់កម្លាំងបង្ក្រាប ដោយមានខែលនិងដំបងឆក់ ក្នុងការរាំងខ្ទប់ ក្រោមលេសរក្សាសណ្តាប់ធ្នាប់សង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ