តុលាការជំនុំជម្រះលើប្រធានគណបក្សនយោបាយចំនួន ១៦ រូប
តុលាការក្រុងភ្នំពេញបានបើកសវនាការជំនុំជម្រះរួមគ្នាលើប្រធានគណបក្សនយោបាយចំនួន ១៦ រូប តាមពាក្យបណ្តឹងរបស់ក្រសួងមហាផ្ទៃកាលពីរសៀលថ្ងៃទី២២មិថុនានេះ។ ប្រធានគណបក្សនយោបាយទាំង១៦រូបនោះត្រូវបានចោទប្រកាន់ពីបទមិនបានផ្ញើរបាយការណ៍ប្រចាំឆ្នាំ២០០៦ទៅក្រសួងមហាផ្ទៃ។ សេចក្តីសម្រេចលើរឿងនេះ នឹងត្រូវចៅក្រមប្រកាសនាថ្ងៃទី២១កក្កដាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ក្រសួងមហាផ្ទៃបានដាក់ពាក្យបណ្តឹងប្រឆាំងប្រធានគណបក្សនយោបាយចំនួន១៦ គណបក្ស ពីបទខកខាន មិនបានផ្ញើរបាយការណ៍ប្រចាំឆ្នាំ២០០៦ ទៅកាន់ក្រសួងមហាផ្ទៃ។ ពាក្យបណ្តឹងនោះ វបានប្តឹងទៅកាន់តុលាការក្រុងភ្នំពេញកាលពីខែឧសភានិងខែកក្កដា ឆ្នាំ២០០៧។
ក្នុងសវនាការនៅរសៀលថ្ងៃនេះ ប្រធានគណបក្សនយោបាយស្ទើរតែទាំងអស់ មិនបានបង្ហាញខ្លួនទេ។ ក្នុងចំណោមប្រធានគណបក្សនយោបាយទាំង ១៦ រូប ដែលជាប់ចោទតាមបណ្តឹងរបស់ក្រសួងមហាផ្ទៃ រួមមានទាំងលោក សមរង្ស៊ី ប្រធានគណបក្សសមរង្ស៊ី លោក កែវ ពុទ្ធរស្មី ប្រធានគណបក្សហ្វ៊ុនស៊ិនប៉ិចផងដែរ។
តាមច្បាប់គណបក្សនយោបាយ ការខកខានមិនបានផ្ញើរបាយការណ៍ប្រចាំ ទៅកាន់ក្រសួងមហាផ្ទៃ ត្រូវផ្តន្ទាទោសពិន័យជាប្រាក់ចំនួន ៣ លានរៀល ស្មើប្រមាណ ៧៥០ ដុល្លារ។ ច្បាប់កំណត់ថា គណបក្សនយោបាយត្រូវផ្ញើរបាយការណ៍ប្រចាំឆ្នាំ និយាយពីសកម្មភាពសំខាន់ៗ និងចំណូល-ចំណាយរបស់គណបក្ស ទៅកាន់ក្រសួងមហាផ្ទៃនិងក្រសួងសេដ្ឋកិច្ច យ៉ាងយូរត្រឹមថ្ងៃទី៣១ខែធ្នូ រៀងរាល់ឆ្នាំ។
ក្នុងអង្គសវនាការតំណាងក្រសួងមហាផ្ទៃ លោក មាស សារឹមអគ្គនាយករង នៃអគ្គនាយកដ្ឋានក្រសួងមហាផ្ទៃបានស្នើឲ្យចៅក្រមជំនុំជម្រះធ្វើការផ្តន្ទាទោសតាមច្បាប់គណបក្សនយោបាយ លើប្រធានគណបក្សទាំង ១៦ រូប ដែលបានយឺតយ៉ាវក្នុងការបញ្ជូនរបាយការណ៍ប្រចាំឆ្នាំ២០០៦ទៅកាន់ក្រសួងមហាផ្ទៃ។
តំណាងក្រសួងមហាផ្ទៃ ក៏បានស្នើសុំឲ្យតុលាការចេញសេចក្តីសម្រេចលុបឈ្មោះគណបក្សនយោបាយចំនួន ៦ គណបក្ស ចេញពីបញ្ជីរបស់ក្រសួងមហាផ្ទៃ ដោយសារគណបក្សទាំងនោះ មិនមានសកម្មភាពអ្វី ហើយគណបក្សខ្លះគ្មានប្រធានដឹកនាំផងដែរ។ តែមិនមែនជាគណបក្សប្រឆាំងសមរង្ស៊ីទេ។ គណបក្ស ដែលប្រឈមនឹងការលុបឈ្មោះទាំង ៦ នោះ ជាគណបក្សមិនដែលឮឈ្មោះឡើយ ក្នុងពេលកន្លង។
នៅកម្ពុជាសព្វថ្ងៃមានគណបក្សនយោបាយចំនួន ៥២ គណបក្ស។ ក្នុងនោះ គណបក្សចំនួន ៤០បានចុះបញ្ជីនៅក្រសួងមហាផ្ទៃ។ ក្រោយពីសួរដេញដោលលើប្រធាន និងតំណាងគណបក្សនយោបាយ ព្រមទាំងមេធាវី និងតំណាងក្រសួងមហាផ្ទៃរួចមក លោក សួស សំអាត ចៅក្រមជំនុំជម្រះ បានប្រកាសថា សេចក្តីសម្រេចលើសំណុំរឿងនេះ នឹងត្រូវប្រកាសនារសៀលម៉ោង ២ ថ្ងៃទី២១កក្កដា ឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ