កម្ពុជានៅត្រូវការឈាមបរិច្ចាគច្រើនទៀត
រដ្ឋមន្ត្រីក្រសួងសុខាភិបាលកម្ពុជាបានអំពាវនាវអោយពលរដ្ឋខ្មែរបន្ថែមទៀតទៅផ្តល់ឈាម ដើម្បីជួយសង្គ្រោះជីវិតអ្នកជំងឺ។ មន្ត្រីសុខាភិបាលបានបញ្ជាក់អោយដឹងថា សកម្មភាពផ្តល់ឈាមនៅកម្ពុជា នៅមានកម្រិតទាបនៅឡើយ បើទោះជាចំនួននៃអ្នកស្ម័គ្រចិត្តទៅផ្តល់ឈាមបានកើនឡើងបន្តិចមែន។
ចុះផ្សាយនៅថ្ងៃ៖
ស្តាប់ - ០១:៤២
កាលពីឆ្នាំ២០១០កន្លងទៅ មជ្ឈមណ្ឌលជាតិផ្តល់ឈាមបានទទួលការបរិច្ចាគឈាមចំនួន៤០ ២៤៥ប្លោកពីសប្បុរសជន។ បរិមាណនេះបានកើនឡើង១២ភាគរយលើសឆ្នាំ២០០៩ ដែលការបរិច្ចាគឈាមមានតែ៣៥៨៩៥ប្លោក។ ការផ្តល់ឈាមបានកើនឡើងមែន ប៉ុន្តែបរិមាណនៃការបរិច្ចាគនេះនៅមានកម្រិតទាបនៅឡើយ។ មន្ត្រីទទួលខុសត្រូវផ្នែកបរិច្ចាគឈាមនៃក្រសួងសុខាភិបាលបានអះអាងអោយដឹងថា នៅប្រទេសកម្ពុជា ក្នុងចំណោម១ ០០០នាក់មានតែមនុស្ស៣នាក់ប៉ុណ្ណោះដែលបានស្ម័គ្រចិត្តបរិច្ចាគឈាម។
ដោយសារតែបរិមាណនៃការផ្តល់ឈាមនៅទាប រដ្ឋមន្ត្រីក្រសួងសុខាភិបាល លោកម៉ម ប៊ុនហេងបានអំពាវនាវអោយពលរដ្ឋខ្មែរមកផ្តល់ឈាម ដោយលោកចាត់ទុកថា នេះគឺជាសកម្មភាពមនុស្សធម៌មួយ។ ការអំពាវនាវត្រូវបានធ្វើឡើងនៅថ្ងៃទី១៤មិថុនានេះ ក្នុងឱកាសនៃទិវាពិភពលោកនៃអ្នកបរិច្ចាគឈាមដែលកម្ពុជាកំពុងចូលរួមដែរ។
ថ្លែងនៅចំពោះមុខមន្ត្រីសុខាភិបាល និងសាធារណជនកាលពីព្រឹកថ្ងៃអង្គារនេះ លោករដ្ឋមន្ត្រីសុខាភិបាលបានបញ្ជាក់ថា ការផ្តល់ឈាម ឬការបរិច្ចាគឈាមមិនធ្វើអោយប៉ះពាល់ដល់សុខភាពរបស់អ្នកផ្តល់ឈាមនោះឡើយ ផ្ទុយទៅវិញ វានឹងជួយជីវិតរបស់អ្នកជំងឺដែលត្រូវការឈាមបន្ទាន់។ លោករដ្ឋមន្ត្រីបានបន្តថា នៅពេលខាងមុខ តម្រូវការឈាមនឹងកើនឡើងថែមទៀតសម្រាប់ការសង្គ្រោះបន្ទាន់ក្នុងបន្ទប់វះកាត់ សម្ភព ជំងឺកុមារ ជំងឺខ្សោយតម្រង់នោម និងជំងឺមហារីកជាដើម។
ក្នុងពេលកន្លងមក ឈាមដែលបានទទួលមកពីការបរិច្ចាគត្រូវបានរក្សាទុក៥០ភាគរយសម្រាប់ការប្រើប្រាស់ក្នុងមន្ទីរពេទ្យរដ្ឋនានាក្នុងរាជធានីភ្នំពេញ និង៥០ភាគរយទៀតត្រូវបានចែកចាយទៅតាមមន្ទីរពេទ្យរដ្ឋនៅតាមខេត្ត និងស្រុកនៅទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ