សាលារាជធានីភ្នំពេញចុះវាស់វែងផ្ទះអ្នកភូមិបឹងកក់ខណៈការចរចាមិនទាន់ត្រូវគ្នា
សាលារាជធានីភ្នំពេញបានជូនដំណឹងដល់ប្រជាពលរដ្ឋរស់នៅក្នុងតំបន់បឹងកក់ថាគណៈកម្មការថ្នាក់ក្រុង ខណ្ឌ និងសង្កាត់មួយនឹងចុះវាស់វែងទំហំផ្ទះនិងដីប្រជាពលរដ្ឋដើម្បីអនុវត្ត ផែនការអភិវឌ្ឍន៍នៅនឹងកន្លែង តាមសំណើរបស់ប្រជាពលរដ្ឋ នៅក្នុងសបា្តហ៍ទី២ខែមិថុនានេះហើយ។ ប៉ុន្តែអ្នកភូមិបឹងកក់បានបញ្ជាក់ថាផែនការអភិវឌ្ឍន៍ របស់សាលាក្រុងនោះពួកគាត់មិនអាចទទួលយកបានទេ លើសពីនេះ អ្នកភូមិបឹងកក់បានឲ្យដឹងថា នៅថ្ងៃចន្ទ ទី៦ មិថុនាសែ្អកនេះ ពួកគាត់នឹងដាក់សំណើថ្មីមួយទៀតទៅសាលារាជធានី ជាសំណើសុំអោយមានការអភិវឌ្ឍន៍នៅនឹងកន្លែងនៅផ្ទាល់ដី មិនមែនដូចផែនការអភិវឌ្ឍន៍នៅនឹងកន្លែងរបស់សាលាក្រុងភ្នំពេញសង់ជាអគារខ្ពស់នោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
អ្វីជាសំណង នៃការអភិវឌ្ឍន៍នៅនឹងកន្លែងរបស់សាលាក្រុងភ្នំពេញ សម្រាប់ប្រជាពលរដ្ឋក្នុងតំបន់បឹងកក់ ទំនងជាការអភិវឌ្ឍន៍នៅនឹងកន្លែង ដែលត្រូវសាងសង់ជាអគារខ្ពស់ៗ ដូចសំណង់ប្រជាពលរដ្ឋក្នុងតំបន់បុរីកីឡាទទួលបាន។ ប៉ុន្តែការអភិវឌ្ឍន៍បែបនោះប្រជាពលរដ្ឋរស់នៅក្នុងបឹងកក់ជាង ១០០០គ្រួសារ ជាអ្នកតវ៉ាចុងក្រោយ និងជាអ្នកមានផ្ទះនៅផ្ទាល់ដីស្រាប់ មិនអាចទទួលយកបាននោះទេ។
ក្នុងលិខិតចុះថ្ងៃទី៣ខែមិថុនាចុងសប្តាហ៍មុននេះ លោក កែប ជុតិមា អភិបាលក្រុងភ្នំពេញមិនបានបញ្ជាក់ថាគម្រោងអភិវឌ្ឍន៍ ដែលសាលាក្រុងព្រមផ្តល់ឲ្យប្រជាពលរដ្ឋក្នុងតំបន់បឹងកក់បែបណានោះឡើយ។ លោកអភិបាលក្រុងគ្រាន់តែប្រាប់ប្រជាពលរដ្ឋថា គណៈកម្មការ នឹងចុះវាស់វែង ទំហំដីនិងផ្ទះប្រជាពលរដ្ឋនៅក្នុងសប្តាហ៍ទី២ ក្នុងខែមិថុនានេះ ហើយលោកបានអំពាវនាវដល់ប្រជាពលរដ្ឋទំាងអស់ឲ្យចូលរួម សហការជាមួយគណៈកម្មការនោះ ដើម្បីផ្ទៀងផ្ទាត់ទំហំដី របស់ពួកគាត់ ឲ្យបានត្រឹមត្រូវ។
អ្នកស្រី នុន សុខខេង តំណាងប្រជាពលរដ្ឋក្នុងសហគមន៏បឹងកក់បានអោយដឹងនៅថ្ងៃអាទិត្យ នេះថា អ្នកភូមិបឹងកក់ទំាងអស់មិនព្រមទទួលយកសំណងរបស់សាលាក្រុងនោះទេ។ តំណាងពលរដ្ឋក្នុងតំបន់បឹងកក់ និងជាអ្នកធ្លាប់បានចូលចរចាជាមួយថ្នាក់ដឹកនាំសាលាក្រុងភ្នំពេញ អ្នកស្រី សុខខេងបញ្ជាក់ថាការចរចាគ្នាកាលពីសប្តាហ៍មុននេះ មិនទាន់ឯកភាពគ្នានៅឡើយទេ។ មិនឯកភាពពីព្រោះសាលាក្រុងប្រកាន់យកគោលការអភិវឌ្ឍន៍ នៅនឹងកន្លែងបែបបុរីកីឡា តែអ្នកភូមិទាមទារ បានផ្ទះផ្ទាល់ដី។
នៅថ្ងៃចន្ទស្អែកនេះ អ្នកភូមិបឹងកក់នឹងដាក់សំណើថ្មីមួយទៀត ទៅសាលាក្រុងភ្នំពេញ។ ជាសំណើសុំអោយសាលាក្រុងផ្តល់ដីនិងផ្ទះ ទំហំ៤ម៉ែត្រគុណ១៦ម៉ែត្រ សម្រាប់គ្រួសារនីមួយៗ។នេះបើតាមការអះអាងរបស់អ្នកស្រី នុន សុខខេង។
សូមបញ្ជាក់ថា ជិត៤ឆ្នាំមកហើយ អ្នកភូមិបឹងកក់បានទាមទារអាជ្ញាធរក្រុងភ្នំពេញ ផ្តល់
សំណងសមរម្យ ពិសេសការអភិវឌ្ឍន៍នៅនឹងកន្លែងនេះតែម្តង បន្ទាប់ពីរដ្ឋាភិបាលបានផ្តល់ផ្ទៃដីបឹងទំហំជាង១២០ហិកតា អោយក្រុមហ៊ុន ស៊ូកាកូអ៊ីន វិនិយោគ។
ក្នុងសកម្មភាពតវ៉ារយៈពេលកន្លងមកនេះ ប្រជាពលរដ្ឋតំបន់បឹងកក់តែងតែទទួលរងការវាយដំពីសំណាក់កងកម្លំាងប្រដាប់អាវុធផងដែរ។ ហើយករណីរំលោភសិទ្ធិមនុស្ស កណ្តាលទីក្រុងភ្នំពេញមួយនេះ ក៏ជាចំនុចអវិជ្ជមាននៃការគោរពសិទ្ធិមនុស្ស នៅកម្ពុជាក្នុងរបាយការណ៍របស់បេសកជនសិទ្ធិមនុស្ស អង្គការសហប្រជាជាតិ លោក ស៊ូយា ប្រាសាទ ស៊ូប៊ែឌី ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ