សាទរទិវាកុមារអន្តរជាតិថ្ងៃទី១មិថុនានៅក្នុងពន្ធនាគារ
អង្គការសិទ្ធិមនុស្សលីកាដូបានរៀបចំប្រារព្ធពិធីសាទរទិវាកុមារអន្តរជាតិថ្ងៃទី១មិថុនា នៅក្នុងពន្ធនាគារតាមរយៈការផ្តល់អាហារ និងសម្ភារៈប្រើប្រាស់ដល់កុមារ និងស្ត្រីមានផ្ទៃពោះជាអ្នកទោស។ពិធីជួបជុំត្រូវបានធ្វើឡើងនៅមណ្ឌលអប់រំកែប្រែទី២ស្ថិតនៅជាយទីក្រុងភ្នំពេញនៅព្រឹកមិញ ដោយមានល្បែងកម្សាន្ត ការផ្តល់រង្វាន់ និងមានការថ្លែងសុន្ទរកថារបស់អ្នកចូលរួមស្តីពីបញ្ហារបស់កុមារផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ដើម្បីសាទរទិវាកុមារអន្តរជាតិថ្ងៃទី១មិថុនា អង្គការសិទ្ធិមនុស្សលីកាដូ បានសហការជាមួយ អគ្គនាយកដ្ឋានពន្ធនាគាររបស់ក្រសួងមហាផ្ទៃ រៀបចំពិធីជួបជុំជាមួយកុមារនិងស្ត្រីមានផ្ទៃពោះជាអ្នកទោសនៅតាមពន្ធនាគារចំនួន ១៤ ។ ពិធីជួបជុំធំត្រូវបានធ្វើឡើងនាព្រឹកមិញ នៅមណ្ឌលអប់រំកែប្រែទី២ នៅព្រៃស ជាយទីក្រុងភ្នំពេញ។
កញ្ចប់ម្ហូបអាហារនិងសម្ភារៈប្រើប្រាស់ត្រូវបានអង្គការសិទ្ធិមនុស្ស លីកាដូ នាំទៅចែកចាយដល់កុមារ និងស្ត្រីមានផ្ទៃពោះ រួមជាមួយនឹងការលេងល្បែងកំសាន្ត ការផ្តល់រង្វាន់និងមានការថ្លែងសុន្ទរកថារបស់អ្នកចូលរួមនិយាយពីបញ្ហានានារបស់កុមារផងដែរ។
ក៏ប៉ុន្តែមន្ត្រីអនុរក្សពន្ធនាគារ បានហាមឃាត់ មិនឲ្យអ្នកកាសែតចូលយកព័ត៌មាន និងថតរូបក្នុងពិធីសាទរទិវាកុមារអន្តរជាតិ នៅក្នុងពន្ធនាគារព្រៃសឡើយ។ លោកស្រី ពុង ឈីវហ្គេក ប្រធានអង្គការ លីកាដូ បានមានប្រសាសន៍ថា ជាទូទៅពន្ធនាគារមិនមែនជាទីកន្លែងសម្រាប់កុមារ និងអនីតិជនទេ។ ប្រព័ន្ធពន្ធនាគារនៅកម្ពុជា មិនមានសមត្ថភាពផ្តល់នូវតម្រូវការជាមូលដ្ឋានរបស់កុមារដូចជា ការអប់រំអាហារចិញ្ចឹមរាងកាយសមស្រប ការថែទាំវេជ្ជសាស្ត្រ ដែលធ្វើឲ្យមានការលំបាកដល់ក្មេងៗនៅក្នុងពន្ធនាគារ។
តាមស្ថិតិរបស់រដ្ឋាភិបាល គិតមកត្រឹមខែមេសា ឆ្នាំ២០១១ មានអ្នកទោសជាអនីតិជន ដែលជាកុមារមិនទាន់គ្រប់អាយុ ១៨ ឆ្នាំ ចំនួន ៧៣០ នាក់ ដែលបានជាប់ឃុំឃាំងនៅក្នុងពន្ធនាគារចំនួន ២៥ក្នុងប្រទេសកម្ពុជា។ ចំណែកស្ត្រីមានផ្ទៃពោះ មានប្រហែលជា ១៤ នាក់ កំពុងតែជាប់ឃុំឃាំង និងមានកុមារជិត ៤០ នាក់ រស់នៅជាមួយម្តាយរបស់ពួកគេនៅក្នុងពន្ធនាគារ។ កុមារត្រូវបានអនុញ្ញាតឲ្យរស់នៅជាមួយម្តាយជាអ្នកទោស រហូតដល់ត្រឹមអាយុ ៦ ឆ្នាំ។
អង្គការសិទ្ធិមនុស្ស លីកាដូ ក៏បានគូសបញ្ជាក់ថា ជាមួយនឹងវិបត្តិ នៃចំនួនអ្នកទោសហួសចំណុះនៅក្នុងពន្ធនាគាររបស់ប្រទេសកម្ពុជា ដែលធ្វើថវិកាពន្ធនាគារមានភាពស្តួចស្តើងរួចស្រាប់ទៅហើយនោះ កុមារតែងតែទទួលរងការលំបាកយ៉ាងខ្លាំង។ នោះគឺនៅក្នុងពន្ធនាគារតាមខេត្តភាគច្រើន អ្នកទោសជាអនីតិជនបានសម្របខ្លួនយ៉ាងពេញលេញទៅក្នុងចំណោមអ្នកទោសជាមនុស្សពេញវ័យ។ ចំណែករបបម្ហួបអាហារ មិនមានគ្រប់គ្រាន់ទេ ហើយការថែទាំវេជ្ជសាស្ត្រតែងតែមិនមានផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ