ក្រសួងធនធានទឹកត្រៀមចុះរុះរើសំណង់កាត់បឹងបួ
រដ្ឋមន្ត្រីក្រសួងធនធានទឹកបានប្រកាសនៅថ្ងៃនេះត្រៀមចុះរុះរើ សម្រាស់ ធ្នស់ ព្រួល និងសំណង់កាត់ទទឹងទន្លេ ស្ទឹង ព្រែក អូរ និងបឹងបួ នៅតាមបណ្ដាខេត្តពាក់ព័ន្ធនឹងបឹងទន្លេសាប ក្រោយពីឱសានវាទរយៈពេលពីរសបា្តហ៍ត្រូវបានបញ្ចប់ ស្របតាមបញ្ជារបស់លោកនាយក រដ្ឋមន្ត្រីហ៊ុន សែន ។ឱសានវាទដែលបានដាក់ដោយរដ្ឋាភិបាលកម្ពុជាតាំងពីថ្ងៃ២២ ខែឧសភា ហើយនឹងបញ្ចប់នៅថ្ងៃទី ៤ ខែមិថុនាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ក្រសួងធនធានទឹកនឹងធ្វើការរុះរើ សម្រាស់ ធ្នស់ ព្រួល និងសំណង់សង់កាត់ទទឹងទន្លេ ស្ទឹង ព្រែក អូរ បឹងបួចាប់ពីថ្ងៃទី៥ ខែមិថុនាខែក្រោយនេះទៅ បន្ទាប់ពីបញ្ចប់ឱសានវាទរយៈពេលពីរសបា្តហ៍ដែលបានរដ្ឋាភិបាលបានកំណត់។ នេះគឺជាការប្រកាសឲ្យដឹងរបស់លោកលឹម គានហោ រដ្ឋមន្ត្រីក្រសួងធនធានទឹកនៅក្នុងសន្និសីទកាសែតនៅព្រឹកថ្ងៃពុធនេះក្នុងរាជធានីភ្នំពេញ។
លោកលឹម គានហោ បានថ្លែងថា ក្រសួងមានសម្ភារៈនិងកម្លាំងគ្រប់គ្រាន់ក្នុងប្រតិបត្តិការរុះរើនេះ និងគូសបញ្ជាក់ថា ប្រតិបត្តិការរុះរើ សម្រាស់ ធ្នស់ ព្រួល និងសំណង់សង់កាត់ទទឹងទន្លេ ស្ទឹង បឹង បួនេះធ្វើឲ្យដល់ឫសគល់ និងប្រកបដោយប្រសិទ្ធិភាព។ លោករដ្ឋមន្ត្រីធនធានទឹក បានសង្កត់ធ្ងន់ថា លោកបានទទួលដាវអាជ្ញាសឹកពីលោកនាយករដ្ឋមន្ត្រីហ៊ុន សែន ដូច្នេះលោកនឹងប្រើប្រាស់អំណាចនេះឲ្យបានជោគជ័យ។
យោងតាមបទបញ្ជាចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពី ថ្ងៃទី២២ ឧសភា រដ្ឋាភិបាលកម្ពុជាបានបញ្ជាឲ្យអភិបាលនៃគណៈអភិបាលខេត្តទាំង ៨ ជុំវិញបឹងទន្លេសាបរួមមានខេត្តកំពង់ឆ្នាំង ពោធិសាត់ បាត់ដំបង បន្ទាយមានជ័យ សៀមរាប កំពង់ធំ និងកំពង់ចាម និងខេត្តកណ្តាល ត្រូវអញ្ជើញម្ចាស់សំណង់គ្រប់ប្រភេទទាំងអស់មកធ្វើការណែនាំ និងតម្រូវឲ្យពួកគេរុះរើសំណង់ទាំងនោះចេញដោយខ្លួនឯង ដោយទុករយៈពេលពីរសប្ដាហ៍។
ប្រសិនបើផុតរយៈពេលកំណត់នេះហើយ ម្ចាស់សំណង់មិនរុះរើចេញទេនោះ ក្រសួងធនធានទឹក អាជ្ញាធរទន្លេសាប អាជ្ញាធរខេត្តពាក់ព័ន្ធ និងកងកម្លាំងអន្តរាគមន៍ពិសេស នឹងចុះបំផ្លាញសំណង់ទាំងនោះចោលទាំងស្រុង និងកសាងសំណុំរឿងបញ្ជូនទៅតុលាការ ដើម្បីផ្ដន្ទាទោសតាមផ្លូវច្បាប់។ លើសពីនេះទៅទៀត ម្ចាស់សំណង់ត្រូវចេញសោហ៊ុយសម្រាប់ការងារប្រតិបត្តិការរុះរើថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ