ពិព័រណ៍ផលិតផលថៃនៅភ្នំពេញនៅថ្ងៃទី១៩ឧសភាត្រូវលុបចោលដោយសារពាក្យសម្ដីមេទ័ពថៃ
ពិព័រណ៍ផលិតផលថៃដែលគ្រោងនឹងរៀបចំនៅទីក្រុងភ្នំពេញនៅថ្ងៃទី ១៩ខែឧសភាខាងមុខនេះត្រូវបានរដ្ឋមន្ត្រីក្រសួងពាណិជ្ជកម្មខ្មែរ ស្នើអោយលើកពេលទៅថ្ងៃក្រោយវិញ។ ការលុបចោលពិព័រណ៍ផលិតថៃនៅពេលនេះត្រូវបានធ្វើឡើងបន្ទាប់ពីមេទ័ព ថៃតំបន់ម្នាក់គម្រាមបិទព្រំដែនមិនអោយមានការនាំចេញទំនិញពី ប្រទេសថៃចូលប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ពិព័រណ៍ផលិតផលថៃដែលគ្រោងនឹងរៀបចំនៅទីក្រុងភ្នំពេញចាប់ពីថ្ងៃទី១៩ដល់ថ្ងៃទី២២ខែឧសភាខាងមុខនេះនឹងត្រូវលុបចោលតាមសំណូមពររបស់រដ្ឋមន្ត្រីក្រសួងពាណិជ្ជកម្មខ្មែរ។
មន្ត្រីជំនាញនៃនាយកដ្ឋានជំរុញពាណិជ្ជកម្មក្រសួងពាណិជ្ជកម្មខ្មែរម្នាក់សុំមិនអោយបញ្ចេញឈ្មោះបានបញ្ជាក់ប្រាប់នៅថ្ងៃអាទិត្យនេះថា ពិព័រណ៍ផលិតផលថៃនៅថ្ងៃទី១៩ខែឧសភាខាងមុខនេះនឹងត្រូវលើកពេលទៅថ្ងៃក្រោយដោយឥតមានពេលកំណត់។ មន្ត្រីរូបនេះបានបន្តទៀតថា រដ្ឋមន្ត្រីក្រសួងពាណិជ្ជកម្មខ្មែរបានសរសេរលិខិតជម្រាបប្រាប់ស្ថានទូតថៃប្រចាំនៅក្នុងប្រទេសកម្ពុជារួចហើយអំពីដំណឹងនេះ។
មន្ត្រីដដែលរូបនេះបានបញ្ជាក់ប្រាប់ទៀតថា ការស្នើលើកពេលពិព័រណ៍ផលិតផលថៃនៅពេលនេះត្រូវបានធ្វើឡើងដើម្បីឆ្លើយតបទៅនឹងការធ្វើអត្ថាធិប្បាយរបស់មេទ័ពថៃម្នាក់ដែលទាមទារអោយមានការបិទព្រំដែនកុំអោយទំនិញថៃចូលកម្ពុជា។ មេទាហានថៃរូបនោះបាននិយាយថា ទំនិញនាំចូលមកកម្ពុជាត្រូវបានគេទិញដើម្បីផ្គត់ផ្គង់កងទ័ពកម្ពុជាដែលត្រៀមធ្វើសង្គ្រាមជាមួយប្រទេសថៃ។ ជាការឆ្លើយតបក្រសួងពាណិជ្ជកម្មស្នើសុំអោយមានការពន្យារពេលសម្រាប់ពិព័រណ៍ផលិតផលថៃនៅទីក្រុងភ្នំពេញ។
បដាបិទផ្សាយដំណឹងកាលបរិច្ឆេទពិព័រណ៍ថៃនៅតាមមហាវិថីធំៗនៃទីក្រុងភ្នំពេញកាលពីប៉ុន្មានថ្ងៃមុនត្រូវបានគេដោះចោលជាបន្តបន្ទាប់អស់វិញហើយនៅថ្ងៃអាទិត្យនេះ។
ពិព័រណ៍ទំនិញថៃគ្រោងនឹងរៀបចំឡើងចាប់ពីថ្ងៃទី១៩ដល់ថ្ងៃទី២២ខែឧសភាខាងមុខនេះនៅមជ្ឈមណ្ឌលកោះពេជ្រទីក្រុងភ្នំពេញ។ ស្តង់លក់ផលិតផលថៃត្រូវបានគេគ្រោងក្នុងចំនួនជាង២០០ស្តង់។
កាលពីចុងខែមេសាកន្លងមក ដោយសារការបាញ់ប្រយុទ្ធគ្នាអ្នកនយោបាយថៃមួយចំនួនមានចេតនាចង់ប្រកាសបិទព្រំដែនប៉ុន្តែជាប្រតិកម្មឆ្លើយតប លោកនាយករដ្ឋមន្ត្រីខ្មែរ ហ៊ុន សែន បានព្រមានថា ប្រសិនបើថៃបិទព្រំដែន ប្រជាជនខ្មែរនឹងឈប់ទិញផលិតផលរបស់ថៃ។
កាលពីពេលមុន ទំនិញថៃមានប្រជាប្រិយភាពយ៉ាងខ្លាំងក្នុងចំណោមប្រជាជនខ្មែរប៉ុន្តែក្នុងរយៈពេលចុងក្រោយនេះ ទំនិញប្រើប្រាស់ប្រទេសវៀតណាមនិងចិនបានចូលមកដណ្ដើមចំណែកទីផ្សារនៃផលិតផលថៃ។
អ្នកនយោបាយថៃមួយចំនួនគិតថា ទីផ្សារកម្ពុជាពឹងផ្អែកទៅលើទំនិញរបស់ប្រទេសថៃ អ៊ីចឹងហើយបានជាអ្នកនយោបាយថៃតែងតែគម្រាមបិទព្រំដែនកុំអោយនាំទិញថៃចូលកម្ពុជា។ ការលើកពេលមិនអោយមានពិព័រណ៍ផលិតផលថៃនៅកម្ពុជានៅពេលនេះត្រូវបានគេមើលឃើញថាគឺជាសារប្រាប់ភាគីថៃថា ខ្មែរមិនរស់នឹងផលិតផលរបស់ថៃតែមួយមុខនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ