ជម្លោះព្រំដែន៖ បក្សប្រឆាំងជំរុញឲ្យរដ្ឋាភិបាលទៅរកកិច្ចព្រមព្រៀងសន្តិភាពក្រុងប៉ារីស
ខណៈដែលរដ្ឋាភិបាលកំពុងតស៊ូមតិយ៉ាងខ្លាំងអំពីជម្លោះឈ្លានពានទឹកដីរបស់ថៃនៅឯកិច្ចប្រជុំកំពូលអាស៊ានក្នុងទីក្រុងហ្សាការតា តំណាងរាស្ត្រគណបក្សសម រង្ស៊ីបានសរសេរលិខិតមួយច្បាប់ទៅលោកនាយករដ្ឋមន្ត្រីហ៊ុន សែននៅចុងសប្តាហ៍នេះ ដើម្បីជំរុញឲ្យរដ្ឋាភិបាលប្រើប្រាស់កិច្ចព្រមព្រៀងសន្តិភាពក្រុងប៉ារីសដើម្បីដោះស្រាយជាមួយថៃ។ តំណាងរាស្ត្របក្សប្រឆាំងបានចោទសួរប្រមុខរដ្ឋាភិបាលអំពីការមិនប្រើប្រាស់កិច្ចព្រមព្រៀងសន្តិភាពក្រុងប៉ារីស ដើម្បីតទល់ជាមួយថៃឈ្លានពាន។ ប៉ុន្តែសំណើរបស់បក្សប្រឆាំងបានទទួលការចំអកពីមន្ត្រីរដ្ឋាភិបាលថា ម្ចាស់សំណើមិនបានតាមដានចំណាត់ការរបស់រដ្ឋាភិបាល។
ចុះផ្សាយនៅថ្ងៃ៖
ស្តាប់ - ០២:៤០
តំណាងរាស្ត្រគណបក្សប្រឆាំងចំនួន៧រូប បានចុះហត្ថលេខាលើលិខិតរួមគ្នាមួយច្បាប់នៅសៀលថ្ងៃទី៦ខែឧសភាម្សិលមិញដើម្បីចោទសួរលោកនាយករដ្ឋមន្ត្រី ហ៊ុន សែនអំពីការមិនប្រើប្រាស់កិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ដើម្បីដោះស្រាយជម្លោះឈ្លានពានទឹកដីរបស់ថៃ។
នៅក្នុងលិខិតផ្ញើទៅកាន់លោកនាយករដ្ឋមន្ត្រីតាមរយៈប្រធានរដ្ឋសភា ក្រុមតំណាងរាស្ត្រគណបក្សប្រឆាំងអះអាងថា កិច្ចព្រមព្រៀងសន្តិភាពក្រុងប៉ារីសមិនត្រឹមតែទទួលស្គាល់សិទ្ធិរបស់កម្ពុជាប៉ុណ្ណោះទេ ប៉ុន្តែ ក៏បានបញ្ជាក់យ៉ាងច្បាស់អំពីកាតព្វកិច្ចរបស់ប្រទេសហត្ថលេខីឲ្យឆ្លើយតាមសំណើរបស់កម្ពុជាទៀតផង។ លើសពីនេះ កិច្ចព្រមព្រៀងនេះក៏បានបញ្ជាក់ផងដែរអំពីយន្តការសម្រាប់ឲ្យសហគមន៍អន្តរជាតិជួយកម្ពុជាយ៉ាងពិតប្រាកដនិងឆាប់រហ័ស។
តំណាងរាស្ត្រគណបក្សសម រង្ស៊ីក៏បានរំលឹកថា មានប្រទេសចំនួន១៨ជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសក្នុងនោះមានប្រទេសមហាអំណាច និងប្រទេសជិតខាង របស់កម្ពុជាផងដែរ។ ដូច្នេះ ហេតុអ្វីបានជារាជរដ្ឋាភិបាលកម្ពុជាមិនអើពើស្វែងរកកិច្ចអន្តរាគមន៍ពីបណ្តាប្រទេសជាហត្ថលេខីទាំងនោះខណៈដែលកងទ័ពថៃឈ្លានពានកម្ពុជាដោយប្រដាប់អាវុធ។
ប៉ុន្តែ សំណើរបស់បក្សប្រឆាំងត្រូវបានមន្ត្រីរដ្ឋាភិបាលស្តីបន្ទោសតបវិញ។ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីប្រតិកម្មថាៈក្រុមសមាជិកសភាបក្សប្រឆាំងមិនបានតាមដានស្ថានការណ៍នយោបាយនិងយុទ្ធសាស្រ្តរបស់រាជរដ្ឋាភិបាលក្នុងការដោះស្រាយបញ្ហាឈ្លានពានរបស់ថៃទេ។ លោកផៃ ស៊ីផាន អះអាងថា គណបក្សប្រឆាំងកំពុងតែវង្វេងមិនបានដឹងពីអ្វីទាំងអស់។លោកបានបញ្ជាក់ថា រដ្ឋាភិបាលមានការទទួលខុសត្រូវក្នុងកិច្ចការពារបូរណភាពទឹកដីដែលមានការរំលោភឈ្លានពានពីសំណាក់កងទ័ពប្រទេសថៃ និងបានចាត់វិធានការសមស្របជាបន្តបន្ទាប់។
សូមបញ្ជាក់ថា រដ្ឋាភិបាលកម្ពុជាកំពុងតស៊ូមតិយ៉ាងស្វិតស្វាញអំពីបញ្ហាជម្លោះព្រំដែនកម្ពុជាថៃ នៅឯកិច្ចប្រជុំកំពូលអាស៊ានលើកទី១៨ដែលកំពុងប្រព្រឹត្តទៅនៅទីក្រុងហ្សាការតាប្រទេសឥណ្ឌូនេស៊ីនៅចុងសប្តាហ៍នេះ។ ដោយឡែក តុលាការយុត្តិធម៌អន្តរជាតិក្រុងឡាអេក៏គ្រោងលើកយកសំណើរបស់កម្ពុជាស្តីពីវិធានការបន្ទាន់ទៅពិភាក្សានៅថ្ងៃទី៣០ និង៣១ខែឧសភាខាងមុខនេះដែរ។
កាលពីដើមសប្តាហ៍នេះ តំណាងរាស្ត្រគណបក្សសម រង្ស៊ីក៏បានស្នើឲ្យដកលោក ហោ ណាំហុងចេញពីរដ្ឋមន្ត្រីការបរទេសដែរដោយពួកគេអះអាងថា លោកខ្វះសមត្ថភាពផ្នែកការទូត។ ប៉ុន្តែ សំណើបែបនេះត្រូវបានលោកហោ ណាំហុងអស់សំណើចនិងបានហៅតំណាងរាស្ត្រទាំងនោះថាក្រុមល្ងិតល្ងង់ដែលចង់ឡើងធ្វើរដ្ឋមន្ត្រីការបរទេសជំនួសរូបលោកទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ