អាជ្ញាធរផ្សព្វផ្សាយពីកិច្ចបង្ការគ្រោះថ្នាក់ចរាចរណ៍ក្នុងឱកាសបុណ្យចូលឆ្នាំថ្មីប្រពៃណីខ្មែរ
គណៈកម្មាធិការជាតិសុវត្ថិភាពចរាចរណ៍ផ្លូវគោក បានចេញសេចក្តីប្រកាសអំពាវនាវ ដល់មហាជនឲ្យបង្កើនការប្រុងប្រយ័ត្នខ្ពស់ ក្នុងពេលធ្វើដំណើរ នៅឱកាសបុណ្យចូលឆ្នាំថ្មី ប្រពៃណីជាតិ។ តាមបេនឡានធំៗ នៅភ្នំពេញ សកម្មជនអង្គការសង្គមស៊ីវិល បានផ្សព្វផ្សាយពីខិត្តប័ណ្ណនិងណែនាំអ្នកបើកបរឡានឈ្នួល កុំឲ្យបើកលឿនហួសកំណត់និងកុំផ្ទុកលើសទម្ងន់។ គ្រោះថ្នាក់ចរាចរណ៍ក្នុងពេលបុណ្យចូលឆ្នាំថ្មី កាលពីឆ្នាំមុន បានបណ្តាលឲ្យមនុស្សស្លាប់ ៤៩ នាក់និងរបួស ៥៣០ នាក់នៅទូទាំងប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហូរពីភ្នំពេញ
គណៈកម្មាធិការជាតិសុវត្ថិភាពចរាចរណ៍ផ្លូវគោក របស់រដ្ឋាភិបាល បានចេញសេចក្តីជូនដំណឹង ដោយក្រើនរម្លឹកមហាជន ឲ្យបង្កើនការប្រុងប្រយ័ត្ន នៅពេលធ្វើដំណើរ ក្នុងពេលបុណ្យចូលឆ្នាំថ្មី ប្រពៃណីជាតិ។
សេចក្តីជូនដំណឹង បានលើកឡើងថា គ្រោះថ្នាក់ចរាចរណ៍នៅទូទាំងប្រទេស នាពេលបុណ្យចូលឆ្នាំខ្មែរ កន្លងមក កើតឡើងដោយសារអ្នកបើកបរមានការធ្វេសប្រហែស មិនគោរពច្បាប់ចរាចរណ៍ ជាពិសេសអ្នកបើកម៉ូតូ មិនពាក់មួកសុវត្ថិភាព បើកបរក្នុងល្បឿនលឿនហួសកំណត់ និងបើកបរក្រោមឥទ្ធិពលជាតិស្រវឹង ជាដើម។
ចំពោះមុខគ្រោះថ្នាក់នេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានអំពាវនាវដល់មហាជន ដែលធ្វើដំណើរ និងបើកបរលើផ្លូវថ្នល់ ឲ្យប្រុងប្រយ័ត្នដើម្បីជៀសវាងនូវឧបទ្ទវហេតុ ក្នុងឱកាសបុណ្យចូលឆ្នាំប្រពៃណីខ្មែរ នាពេលនេះ។ នោះគឺកុំបើកបរ ក្នុងពេលស្រវឹងកុំបើកបរលឿន ជាពិសេសអ្នកបើកបរម៉ូតូ ត្រូវពាក់មួកសុវត្ថិភាព។ ចំណែកអ្នកបើកបរឡាន ក៏ត្រូវគោរពច្បាប់ចរាចរណ៍ និងពាក់ខ្សែក្រវាត់សុវត្ថិភាព និងមិនត្រូវបើកបរក្នុងពេលស្រវឹងទេ។
ដោយឡែក កូនសៀវភៅ និងខិត្តប័ណ្ណអប់រំពីច្បាប់ចរាចរណ៍រាប់ពាន់ ត្រូវបានចែកជូនដល់ក្រុមអ្នករត់តាក់ស៊ី និងឡានក្រុង នៅទីក្រុងភ្នំពេញ ដើម្បីទប់ស្កាត់គ្រោះថ្នាក់ចរាចរណ៍ ដែលអាចកើតមានជាយថាហេតុ ក្នុងឱកាសបុណ្យចូលឆ្នាំថ្មីប្រពៃណីជាតិ។
ក្នុងរយៈពេលពេញមួយសប្តាហ៍នេះ អ្នកដំណើរជាច្រើន បានចាកចេញពីទីក្រុងភ្នំពេញ ចេញទៅកាន់ស្រុកកំណើត តាមបណ្តាខេត្តនានា ដើម្បីប្រារព្ធពិធីបុណ្យចូលឆ្នាំថ្មី និងជួបជុំក្រុមគ្រួសារនៅស្រុកកំណើត។
រយៈពេលនៃការធ្វើដំណើរដ៏កកកុញ ក្នុងឱកាសបុណ្យចូលឆ្នាំប្រពៃណីជាតិនេះ អាចបង្កជាគ្រោះថ្នាក់ចរាចរណ៍ តាមផ្លូវ ដោយសារតែរថយន្តឈ្នួល ដាក់លើសទម្ងន់ ផ្ទុកមនុស្ស និងឥវ៉ាន់លើដំបូល និងបើកលឿនហួសកំណត់ ជាដើម។
ក្នុងពិធីបុណ្យចូលឆ្នាំប្រពៃណីជាតិ កាលពីឆ្នាំ២០១០ គិតចាប់ពីថ្ងៃទី១៣ ដល់ថ្ងៃទី១៧មេសា ឆ្នាំ២០១០ នៅទូទាំងប្រទេស មានគ្រោះថ្នាក់ចរាចរណ៍ចំនួន ២៥៤ ករណី ធ្វើឲ្យមានអ្នកស្លាប់ ៤៩ នាក់ និងរបួស ៥៣០ នាក់។ រីឯពិធីបុណ្យចូលឆ្នាំខ្មែរ កាលពីឆ្នាំ២០០៩ មានគ្រោះថ្នាក់ចរាចរណ៍ចំនួន ២៤០ ករណី បណ្តាលឲ្យមានអ្នកស្លាប់ ៥២ នាក់។ គ្រោះថ្នាក់ចរាចរណ៍ពេលបុណ្យចូលឆ្នាំ កើតឡើងដោយសារបើកបរលឿន អ្នកបើកបរស្រវឹង និងផ្ទុកលើសទម្ងន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ