ថៃនៅតែចង់រករឿងនៅព្រំដែន
ទាហានថៃនៅតែចង់បង្កបញ្ហានៅតាមព្រំដែន នៅពេលដែលភាគីទាំងពីរនឹងត្រូវឡើងទៅជួបគ្នានៅឥណ្ឌូនេស៊ី។ អ្នកនាំពាក្យរដ្ឋាភិបាលកម្ពុជាលោកខៀវ កាញារីទ្ធបានថ្លែងអោយដឹងនៅថ្ងៃនេះថា ទាហានថៃនៅតែចង់ញុះញង់អោយទាហានខ្មែរផ្ទុះអាវុធ តែថាកម្ពុជាមិនធ្លាក់ចូលក្នុងទន្ទាក់នេះទេ។ ពាក់ព័ន្ធនឹងការប្រជុំនៅប្រទេសឥណ្ឌូនេស៊ីនៅក្នុងសប្តាហ៍នេះ លោកខៀវ កាញារីទ្ធអត្ថាធិប្បាយថា បើទោះជា ក្រសួងការពារជាតិថៃ(GBC) នៅតែបដិសេធមិនចូលរួមប្រជុំ ដូចក្រុមគណៈកម្មការវាស់វែងព្រំដែន(JBC)ក៏ដោយ កម្ពុជានៅតែមិនខ្វល់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
កាលពីចុងសប្តាហ៍កន្លងទៅ ទាហានថៃបានព្យាយាមបង្កបញ្ហានៅតាមព្រំដែន តាមរយៈការបញ្ជូនគ្រឿងចក្រមួយចំនួនមកកៀកតំបន់ព្រំដែន នេះគឺជាអះអាងរបស់លោកខៀវ កាញារីទ្ធ អ្នកនាំពាក្យរដ្ឋាភិបាលកម្ពុជា។ លោកខៀវ កាញារីទ្ធបានអត្ថាធិប្បាយថា ទាហានចង់បង្កអោយមានការផ្ទុះអាវុធសាជាថ្មី ដែលចេញពីខាងកម្ពុជា ប៉ុន្តែថា កម្ពុជានឹងមិនធ្លាក់ចូលក្នុងល្បិចកលរបស់ទាហានថៃនោះឡើយ។
អ្នកនាំពាក្យរដ្ឋាភិបាលកម្ពុជាបន្តថា កម្ពុជាសង្ស័យថា ទាហានថៃចង់ចូលមកកាន់កាប់តំបន់ខ្លះក្នុងទឹកដីកម្ពុជានៅតាមព្រំដែននោះ មុនការមកដល់នៃអ្នកសង្កេតការណ៍ឥណ្ឌូនេស៊ី។
នៅក្នុងសំណុំរឿងដោះស្រាយវិបត្តិព្រំដែនជាមួយថៃ កម្ពុជាកំពុងតែត្រៀមលក្ខណៈដើម្បីចេញដំណើរទៅទីក្រុងបូហ្កូប្រទេសឥណ្ឌូនេស៊ី នៅក្នុងសប្តាហ៍នេះ ដើម្បីចូលរួមកិច្ចប្រជុំ គណៈកម្មការខណ្ឌសីមាព្រំដែនគោកកម្ពុជាថៃ JBC និងគណៈកម្មាធិការព្រំដែនទូទៅ GBCក្នុងក្របខ័ណ្ឌក្រសួងការពារជាតិនៃប្រទេសទាំងពីរ ព្រមទាំងកិច្ចប្រជុំរដ្ឋមន្ត្រីការបរទេសកម្ពុជាថៃផងដែរ។ កិច្ចប្រជុំទាំងនេះដែលឥណ្ឌូនេស៊ីនឹងរៀបចំនៅថ្ងៃទី៧-៨ មេសានេះ។ ប្រមុខរដ្ឋាភិបាលក្រុងបាងកក លោកអាប់ភីស៊ីត វេចាជីវ៉ាបានអះអាងថា ថៃត្រៀមខ្លួនចេញទៅប្រជុំគណៈកម្មាការខណ្ឌសីមាព្រំដែនគោក JBCពិតមែន។ ប៉ុន្តែគេនៅតែទទួលចម្លើយអវិជ្ជមានរហូតដល់ពេលនេះពីក្រុមមេដឹកនាំទាហានថៃដៃលបដិសេធមិនទៅចូលរួមកិច្ចប្រជុំគណៈកម្មាធិការព្រំដែនទូទៅ GBC។
លោកខៀវ កាញារីទ្ធថ្លែងថា កម្ពុជាមិនខ្វល់ពីការបដិសេធណាមួយរបស់ភាគីថៃនោះទេ ហើយថាកម្ពុជានឹងនៅតែចូលរួមតាមការអញ្ជើញរបស់រដ្ឋមន្ត្រីការបរទេសឥណ្ឌូនេស៊ី ដែលជាអ្នករៀបចំការប្រជុំនេះ ក្នុងនាមជាប្រធានអាស៊ាននោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ