ព្រំដែន៖ កម្ពុជាប្រតិកម្មទៅនឹងលិខិតរបស់រដ្ឋមន្ត្រីការបរទេសឥណ្ឌូនេស៊ី
លោកហោ ណាំហុងរដ្ឋមន្ត្រីការបរទេសកម្ពុជាបានបញ្ជាក់ជំហរយ៉ាងដាច់ខាត ប្រាប់រដ្ឋមន្ត្រីការបរទេសឥណ្ឌូនេស៊ីថា ដំណោះស្រាយណាផ្សេងក្រៅពីវិធានការជាកញ្ចប់ដែលបានព្រមព្រៀងគ្នា កាលពីថ្ងៃទី៩ឧសភានៅហ្សាការតាស្តីពីបញ្ហាព្រំដែនកម្ពុជាថៃមិនអាច ទទួលយកបានឡើយ។ ប្រតិកម្មបែបនេះត្រូវបានប្រមុខការទូតកម្ពុជាបញ្ជាក់ប្រាប់ប្រធាន អាស៊ានក៏ដូចជារដ្ឋមន្ត្រីការបរទេសអាស៊ានទាំងអស់ឲ្យបានដឹងកាលពី ល្ងាចថ្ងៃអង្គារម្សិលមិញបន្ទាប់ពីថៃបានព្យាយាមគេចវេះ និងបន្ទាប់ពីរដ្ឋមន្ត្រីការបរទេសឥណ្ឌូនេស៊ីផ្តល់ព័ត៌មានដោយភាន់ ច្រឡំដែលកម្ពុជាចាត់ទុកថាបានលើកមុខមាត់ឲ្យថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
កម្ពុជាមិនទទួលយកដំណោះស្រាយណាផ្សេងក្រៅពីវិធានការជាកញ្ចប់ដែលបានព្រមព្រៀងគ្នាកាលពីថ្ងៃទី៩ឧសភារវាងកម្ពុជា ថៃ និងឥណ្ឌូនេស៊ីនៅហ្សាការតានោះឡើយ។ នេះជាការបញ្ជាក់ក្នុងលិខិតរបស់លោក ហោ ណាំហុង រដ្ឋមន្ត្រីការបរទេសកម្ពុជាផ្ញើទៅលោក ម៉ាទី ណាតាលេហ្គាវ៉ា រដ្ឋមន្ត្រីការបរទេសឥណ្ឌូនេស៊ីកាលពីល្ងាចថ្ងៃទី២៤ឧសភាម្សិលមិញ។
លោកកុយ គួង អ្នកនាំពាក្យក្រសួងការបរទេសកម្ពុជាបានឲ្យដឹងនៅថ្ងៃនេះថា ការបញ្ជាក់ជំហរច្បាស់លាស់របស់កម្ពុជាប្រាប់ប្រធានអាស៊ាននៅពេលនេះបានធ្វើឡើងបន្ទាប់ពីលោក ម៉ាកទី ណាតាលេហ្គាវ៉ា បានផ្តល់ព័ត៌មានភាន់ច្រឡំមួយដែលហាក់បានលើកមុខមាត់ដល់ភាគីថៃ។ បើយោងតាមលោកកុយ គួង លិខិតរបស់លោកម៉ាកទីដែលបានផ្ញើមកលោកហោ ណាំហុងកាលពីថ្ងៃទី២៣ឧសភាបានបញ្ជាក់ថា៖
ទី១-លោកបានទទួលព័ត៌មានពីរដ្ឋមន្ត្រីការពារជាតិកម្ពុជានិងថៃនៅក្នុងជំនួបក្រៅកិច្ចប្រជុំរដ្ឋមន្ត្រីការពារជាតិអាស៊ាននៅហ្សាការតាថា នឹងមានការកោះប្រជុំគណៈកម្មការព្រំដែនទូទៅ( GBC )រវាងប្រទេសទាំងពីរ។
ទី២-លោកម៉ាកទីអះអាងថាបានទទួលដំណឹងថា ថៃនិងកម្ពុជាត្រៀមទទួលយកអ្នកសង្កេតការណ៍ឥណ្ឌូនេស៊ី។
ការលើកឡើងរបស់រដ្ឋមន្ត្រីការបរទេសឥណ្ឌូនេស៊ីត្រូវបានលោកកុយ គួង អះអាងថាជាការទទួលបានព័ត៌មានតែពីភាគីថៃប៉ុណ្ណោះ ប៉ុន្តែ លោក ម៉ាកទី បែរជាអះអាងថាបានទទួលពីភាគីទាំងពីរ។ នេះជាអ្វីដែលអ្នកនាំពាក្យក្រសួងការបរទេសកម្ពុជាចាត់ទុកថាជាការលើកមុខមាត់ឲ្យប្រទេសថៃ។ ហេតុដូច្នេះហើយបានជាប្រមុខការទូតកម្ពុជា បានឆ្លើយតបភ្លាមៗទៅកាន់រដ្ឋមន្ត្រីការបរទេសឥណ្ឌូនេស៊ីដោយប្រើភាសាការទូតធ្ងន់ៗនិងយ៉ាងដាច់ណាត់ថាកម្ពុជាមិនទទួលយកដំណោះស្រាយណាផ្សេងក្រៅពីវិធានការជាកញ្ចប់ដែលបានព្រមព្រៀងគ្នានោះឡើយ។ លោក ហោ ណាំហុង រំលឹកថា ចម្លើយជាវិជ្ជមានរបស់ថៃគឺជាការចាំបាច់មិនអាចខ្វះបាន។
សូមរំលឹកថា វិធានការជាកញ្ចប់៦ចំណុចនោះបានបញ្ជាក់ច្បាស់ថា ថៃត្រូវឆ្លើយយល់ព្រមទទួលយកលក្ខខណ្ឌប្រតិបត្តិស្តីពីអ្នកសង្កេតការណ៍ឥណ្ឌូនេស៊ី។ ប្រាំថ្ងៃក្រោយទទួលបានលិខិតផ្លូវការពីថៃ ឥណ្ឌូនេស៊ីនឹងបញ្ជូនអ្នកវាយតម្លៃសភាពការណ៍មកកាន់ព្រំដែន ហើយកិច្ចប្រជុំគណៈកម្មការព្រំដែនទូទៅ និងគណៈកម្មការព្រំដែនចម្រុះកម្ពុជាថៃក៏នឹងបើកធ្វើព្រមគ្នាដែរ។ ប្រាំថ្ងៃក្រោយមកទៀត ឥណ្ឌូនេស៊ីនឹងបញ្ជូនអ្នកសង្កេតការណ៍មកដល់ព្រំដែនកម្ពុជាថៃ។ប៉ុន្តែ រហូតមកទល់ពេលនេះ គណៈរដ្ឋមន្ត្រីថៃនៅមិនទាន់បានអនុម័តកិច្ចព្រមព្រៀងនេះនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ