អ្នកភូមិបឹងកក់បន្តការតវ៉ា តែអាជ្ញាធរបំបែក និងចាប់ខ្លួនតំណាងអ្នកភូមិ
កាលពីព្រឹកថ្ងៃទី ២៨ កុម្ភៈ ក្រុមអ្នកភូមិបឹងកក់ប្រមាណ ៤០០ នាក់បានប្រមូលផ្តុំតវ៉ា នៅមុខសាលារាជធានីភ្នំពេញ ប្រឆាំងនឹងគម្រោងធ្វើផ្លូវចូលតំបន់អភិវឌ្ឍន៍បឹងកក់។ ក្រុមអ្នកភូមិបានតវ៉ា ដោយឈរបិទផ្លូវ នៅមុខសាលាក្រុង ប៉ុន្តែបន្តិចក្រោយមក កម្លាំងប៉ូលិសប្រដាប់ដោយខែល និងដំបងឆក់បានវាយបំបែក។ តំណាងអ្នកភូមិបឹងកក់ ៥ នាក់ ត្រូវបានប៉ូលិសចាប់ឃាត់ខ្លួនមួយរយៈ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
នៅព្រឹកព្រលឹមថ្ងៃច័ន្ទ ទី ២៨ កុម្ភៈនេះ ក្រុមអ្នកភូមិបឹងកក់ ភាគច្រើនជាស្ត្រី បានប្រមូលផ្តុំតវ៉ាជាថ្មីម្តងទៀត ដើម្បីជំទាស់នឹងគម្រោងធ្វើផ្លូវចូលតំបន់អភិវឌ្ឍន៍បឹងកក់ដ៏ចម្រូងចម្រាស។ គម្រោងបើកផ្លូវថ្មីចូលតំបន់បឹងកក់ត្រូវបានអាជ្ញាធររាជធានីភ្នំពេញជូនដំណឹងដល់អ្នកភូមិ ដែលមានដី និងផ្ទះស្ថិតក្នុងគម្រោងផ្លូវថ្មីនោះ ត្រូវទៅទទួលសំណងពីអាជ្ញាធររយៈពេល ១០ ថ្ងៃ គិតចាប់ពីថ្ងៃទី ១៧ កុម្ភៈ។ ប៉ុន្តែអ្នកភូមិអះអាងថា គម្រោងបើកផ្លូវថ្មីចូលតំបន់អភិវឌ្ឍន៍បឹងកក់ ត្រូវបានអាជ្ញាធរក្រុងសម្រេច ដោយគ្មានការជជែកជាមួយប្រជាពលរដ្ឋទេ។
ក្នុងព្រឹត្តិការណ៍នៅព្រឹកមិញ ក្រោយពីការប្រមូលផ្តុំ អ្នកភូមិបាននាំគ្នាឈរបិទផ្លូវព្រះមុនីវង្ស នៅមុខសាលារាជធានីភ្នំពេញ ដើម្បីសុំឲ្យអាជ្ញាធរចេញមកដោះស្រាយ។ ក៏ប៉ុន្តែបន្តិចក្រោយមក ប៉ូលិសប្រមាណ ៥០០ នាក់ ប្រដាប់ដោយខែល និងដំបងឆក់ មានទាំងកាំភ្លើងផង បានចូលបំបែកក្បួនតវ៉ា។ ហេតុការណ៍នោះ ប៉ូលិសបង្ក្រាបបាតុកម្ម បានវាយលើស្ត្រីអ្នកតវ៉ា បណ្តាលឲ្យអ្នកភូមិរបួសធ្ងន់ ស្រាល និងមានខ្លះសន្លប់។ ស្ត្រីអ្នកភូមិជាច្រើននាក់ផ្សេងទៀត ត្រូវប៉ូលិសវាយរហូតដល់រហែកអាវ។
តំណាងអ្នកភូមិ ៥ នាក់ ត្រូវបានប៉ូលិសចាប់ដាក់ឡាន។ ប៉ុន្តែភ្លាមៗនោះ ស្ត្រីពីរនាក់ត្រូវបានអ្នកភូមិដណ្តើមបានពីប៉ូលិសមកវិញ។ ទីបំផុតទៅ តំណាងអ្នកភូមិបឹងកក់ដែលចូលរួមការតវ៉ាចំនួន ៣ នាក់ រួមមានស្ត្រីពីរនាក់ ត្រូវបានប៉ូលិសចាប់ខ្លួន នាំទៅកាន់សាលាខ័ណ្ឌដូនពេញ ដែលស្ថិតនៅប្រមាណ ៣០០ ម៉ែត្រ ពីកន្លែងតវ៉ា។ នៅរសៀលថ្ងៃច័ន្ទនេះ អាជ្ញាធរខ័ណ្ឌដូនពេញបានដោះលែងស្ត្រី ២ នាក់មកវិញ។ បន្ទាប់មក បុរសម្នាក់ទៀតក៏ត្រូវដោះលែងដែរ។
អ្នកស្រី លី មុំ អ្នកភូមិបឹងកក់ដែលចូលរួមការតវ៉ាបានឲ្យដឹងថា មុនពេលដោះលែង អ្នកភូមិបឹងកក់ទាំង ៣នាក់ត្រូវបានអាជ្ញាធរខ័ណ្ឌដូនពេញ តម្រូវឲ្យធ្វើកិច្ចសន្យាផ្តិតមេដៃឈប់ធ្វើការតវ៉ា។ រីឯកាំម៉ារ៉ាថតរូបពីរគ្រឿង និងមីក្រូមួយគ្រឿងត្រូវបានអាជ្ញាធរប្រគល់ឲ្យអ្នកភូមិវិញ។ ប៉ុន្តែរូបថតនៃសកម្មភាពបំបែកលើក្បួនបាតុកម្ម ត្រូវបានអាជ្ញាធរលុបចេញពី Memory ម៉ាស៊ីនថតរូបទាំងនោះ។
យ៉ាងណាក៏ដោយ ក្រុមអ្នកភូមិបឹងកក់បានអះអាងមុននឹងរំសាយចេញពីមុខសាលាខណ្ឌដូនពេញនៅមុននេះថា នឹងប្តេជ្ញាធ្វើការតវ៉ារហូតដល់មានដំណោះស្រាយតាមអ្វីដែលអ្នកភូមិចង់បាន។ នោះគឺដីទំហំ ១៥ ហិកតា ក្នុងតំបន់បឹងកក់សម្រាប់ការអភិវឌ្ឍន៍នៅនឹងកន្លែង ដោយការសាងសង់ផ្ទះល្វែងដោយខ្លួនឯង។
សូមរម្លឹកថា ជម្លោះដីនៅតំបន់បឹងកក់បានកើតឡើងចាប់តាំងពីអាជ្ញាធររាជធានីភ្នំពេញបានចុះហត្ថលេខាជួលដីបឹងកក់ ទំហំ ១៣៣ ហិកតា ឲ្យក្រុមហ៊ុន ស៊ូកាគូ អ៊ិន របស់លោកឧកញ៉ា ឡៅ ម៉េងឃិន សមាជិកព្រឹទ្ធសភាគណបក្សប្រជាជនកម្ពុជា កាលពីខែកុម្ភៈ ឆ្នាំ២០០៧។ គម្រោងអភិវឌ្ឍន៍នោះបានបណ្តាលឲ្យប្រជាពលរដ្ឋជាង ៤.០០០ គ្រួសារត្រូវរុះរើលំនៅឋាន។
អាជ្ញាធរ និងក្រុមហ៊ុនបានសម្រេចផ្តល់សំណងដល់អ្នកភូមិនូវទឹកប្រាក់ ៨.៥០០ ដុល្លារ ក្នុងមួយគ្រួសារ។ ប៉ុន្តែអ្នកភូមិបឹងកក់ដែលរស់នៅដីគោកជាង ១.៥០០ គ្រួសារ ចុងក្រោយនេះ ចង់បានដីទំហំ ១៥ ហិកតាដើម្បីអភិវឌ្ឍន៍នៅនឹងកន្លែង ដោយសាងសង់ផ្ទះល្វែងដោយខ្លួនឯង។ តែអាជ្ញាធរបដិសេធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ