វិនិយោគិនជប៉ុននឹងកើនឡើងនៅកម្ពុជាក្នុងពេលឆាប់ៗ
អ្នកជំនាញផ្នែកវិនិយោគប្រចាំទីភ្នាក់ងារសហប្រតិបត្តិការអន្តរជាតិជប៉ុននៅកម្ពុជាបានអះអាងថា វិនិយោគិនជប៉ុននឹងមកដាក់ទុនវិនិយោគនៅកម្ពុជាកាន់តែច្រើនក្នុងរយៈពេល២ ឬ៣ឆ្នាំខាងមុខនេះ។ អ្នកជំនាញបានពន្យល់ថា កត្តាចំបងមួយដែលជំរុញអោយវិនិយោគិនជប៉ុនមកកម្ពុជានោះ គឺការយល់ដឹងពីស្ថិរភាពនយោបាយ និងការរៀបចំហេដ្ឋារចនាសម្ព័ន្ធវិនិយោគរបស់កម្ពុជា។ គិតមកដល់ត្រឹមឆ្នាំ២០០៩ មានក្រុមហ៊ុនជប៉ុនចំនួន៣៤ដែលកំពុងធ្វើសកម្មភាពនៅកម្ពុជា។
ចុះផ្សាយនៅថ្ងៃ៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
អ្នកជំនាញជប៉ុនផ្នែកវិនិយោគរបស់ទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា ចៃកា (JICA)បានថ្លែងអោយដឹងថា នៅដើមឆ្នាំ២០១១នេះ មានក្រុមហ៊ុនជប៉ុនចំនួន៧បានមកសិក្សាដាក់ទុននៅកម្ពុជា។ លោកYuji IMAMURA អ្នកជំនាញការរបស់ចៃកា និងជាទីប្រឹក្សានៃការិយាល័យវិនិយោគរបស់ក្រុមប្រឹក្សាអភិវឌ្ឍកម្ពុជា បានបញ្ជាក់ថាអ្នកវិនិយោគជប៉ុនភាគច្រើនទើបតែដឹងថា ប្រទេសកម្ពុជាជាប្រទេសមានសុវត្ថិភាព ខុសពីអ្វីដែលពួកគេបានគិតកន្លងមក។
លោកIMAMURAបន្តថា កន្លងមកវិនិយោគិនជប៉ុនគិតថា កម្ពុជាគឺជាប្រទេសគ្រោះថ្នាក់ មានគ្រាប់មីនគ្រប់ទីកន្លែង គ្មានហាងអាហារ ជាប្រទេសកាន់សាសនាអ៊ីស្លាមដែលមិនបរិភោគស្រា គ្មានផ្សារទំនើបជាដើម។ ទាំងនេះហើយដែលជាមូលហេតុចំបងមួយ ដែលធ្វើអោយវិនិយោគទុនជប៉ុនមានទំហំតូចនៅកម្ពុជា។ របាយការណ៍បានបង្ហាញថា ចន្លោះពេលពីឆ្នាំ១៩៩៤ដល់ឆ្នាំ២០០៩កន្លងទៅនេះ មានក្រុមហ៊ុនជប៉ុនតែ៣៤ដែលមានវត្តមាននៅកម្ពុជា ក្នុងតម្លៃវិនិយោគសរុបប្រហែល២៤០លានដុល្លារប៉ុណ្ណោះ។ ក្រុមហ៊ុនទាំងនោះមានដូចជា Suzuki Yamaha Ajinomoto និងMinebeaដែលជាក្រុមផលិតគ្រឿងបន្លាស់ដ៏ធំមួយរបស់ជប៉ុន។
ក្រោយពីការផ្សព្វផ្សាយអំពីប្រទេសកម្ពុជា បូកផ្សំនឹងការកែលំអហេដ្ឋារចនាសម័្ពន្ធមួយចំនួនសម្រាប់ការវិនិយោគ ដូចជាការពង្រីកសេវាអគ្គីសនីក្នុងតម្លៃទាបជាដើម អ្នកជំនាញជប៉ុនលោក IMAMURA យល់ថា វិនិយោគិនជប៉ុននឹងមកបណ្តាក់ទុននៅកម្ពុជា។ ជាងនេះទៅទៀត និន្នាការនៃការបង្វែរទិសវិនិយោគរបស់ក្រុមហ៊ុនជប៉ុននៅក្នុងពិភពលោក ក៏ជាផ្នែកមួយជំរុញអោយវិនិយោគិនជប៉ុនមកកម្ពុជាដែរ។ អ្នកជំនាញរបស់ចៃកាពន្យល់ថា ចាប់តាំងពីមានការអភិវឌ្ឍនៅតំបន់ជនបទនៅប្រទេសចិន សៀងហៃ ហាណូយ និងហូជីមិញ កម្មករទាំងនេះបានឈប់ពីការងារនៅក្នុងរោងចក្រជប៉ុន ដែលធ្វើអោយវិនិយោគិនជប៉ុនត្រូវបង្វែរទិសមកប្រទេសផ្សេងៗដូចជា បង់ក្លាដេស ភូមា ឡាវ និងកម្ពុជាជាដើម។
សព្វថ្ងៃនេះ ថ្វីត្បិតតែជំនួយរបស់ជប៉ុននៅតែដើតួរនាំមុខគេនៅកម្ពុជា ប៉ុន្តែទំហំវិនិយោគរបស់ជប៉ុនបានស្ថិតនៅក្នុងលំដាប់ថ្នាក់ទី១២ ឆ្ងាយពីវិនិយោគទុនចិនដែលស្ថិតនៅលំដាប់ថ្នាក់ទីមួយ និងវិនិយោគទុនកូរ៉េដែលស្ថិតនៅលំដាប់ថ្នាក់ទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ