មន្រ្តីពាណិជ្ជកម្មថា ការឈ្លានពានថៃ មិនប៉ះពាល់ដល់វិស័យពាណិជ្ជកម្មកម្ពុជា-ថៃ
មន្រ្តីពាណិជ្ជកម្មកម្ពុជាបញ្ជាក់ នៅថ្ងៃអាទិត្យទី១៣កុម្ភៈនេះថា ការឈ្លានពានរបស់ប្រទេសថៃ មកលើកម្ពុជា ដែលជំរុញ ឲ្យមានសង្រ្គាមយោធាតាមព្រំដែនកម្ពុជា ថៃនោះ មិនប៉ះពាល់ដល់ពាណិជ្ជកម្មទំាងពីរប្រទេសនោះទេ។ ជាក់ស្តែងពិព័រណ៍ពាណិជ្ជកម្មកម្ពុជា ថៃ ដែលគេគិតថាអាចលើកពេល បន្ទាប់ពីមានការផ្ទុះអាវុធនៅថ្ងៃទី៤ រហូតដល់ ថ្ងៃ៧កុម្ភៈនោះ ពេលនេះនឹងប្រារព្ធធ្វើ គ្មានប្រែប្រួលឡើយ ហើយបើគេពិនិត្យមើលទឹកប្រាក់ពាណិជ្ជកម្មរវាងពីរប្រទេសនេះក៏មិន បានធ្លាក់ចុះដែរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អ៊ឹម ណាវិនពីភ្នំពេញ
ការផ្ទុះអាវុធដែលបង្កឡើងដោយភាគីថៃកាលពីចុងសប្ដាហ៍មុននេះ មិនប៉ះពាល់ដល់ ការវិនិយោគពាណិជ្ជកម្ម រវាងប្រទេសកម្ពុជា និងប្រទេសថៃនោះទេ។ នេះជាការអះអាងរបស់មន្រ្តី ជំនាញ ក្រសួងពាណិជ្ជកម្ម ផ្នែកជំរុញការនាំចូល នាំចេញកម្ពុជា ប្រាប់វិទ្យុបារំាង អន្តរជាតិនៅថ្ងៃអាទិត្យទី១៣ កុម្ភៈនេះ។
ជាក់ស្តែងពិព័រណ៍ពាណិជ្ជកម្ម កម្ពុជា ថៃដែលគ្រោងនឹងពន្យារពេល បន្ទាប់ពីការផ្ទុះអាវុធភ្លាមៗនោះ តែពេលនេះមន្រ្តីក្រសួងពាណិជ្ជកម្ម អះអាងថា គ្មានការពន្យារពេលនោះទេ ពិព័រណ៍ពាណិជ្ជកម្ម កម្ពុជា ថៃ នឹងប្រព្រឹត្តទៅតាមការគ្រោងទុក គ្មានអ្វីប្រែប្រួលឡើយ។
ពិព័រណ៍ពាណិជ្ជកម្មកម្ពុជា ថៃ ប្រចំាឆ្នាំ នឹងប្រព្រឹត្តទៅរយៈពេល៤ថ្ងៃចាប់ពីថ្ងៃទី១៧ ដល់ថ្ងៃទី២០ ខែកុម្ភៈ នៅឯមជ្ឈមណ្ឌលកោះពេជ្រ។ ពិព័រណ៏ពាណិជ្ជកម្មកម្ពុជា ថៃ នឹងមានស្តង់ដាក់បង្ហាញមុខទំនិញមកពីប្រទេសកម្ពុជា និងថៃដូចទម្លាប់ឆ្នាំមុនៗ ប្រមាណជិត២០០ស្តង់ ក្នុងស្តង់ទំនិញថៃមានជាង១០០។
ទំនិញថៃ ដែលមានវត្តមានក្នុងការដាក់តំាងពិព័រណ៍ក្នុងពេលនោះ មានដូចជា គ្រឿងហូបចុក ផលិតផលសំអាង សម្ភារៈប្រើប្រាស់ប្រចំាថ្ងៃ និងផលិតផលឧស្សាហកម្មជាដើម។ នេះបើយោងតាមការអោយដឹង ពីអ្នករៀបចំកម្មវិធី។
ក្រៅពីការដាក់បង្ហាញផលិតផលរៀងៗខ្លួន ពិព័រណ៍ពាណិជ្ជកម្មកម្ពុជា ថៃក៏ជាឱកាសជួបគ្នារវាងពាណិជ្ជករ ទំាងពីរប្រទេសផងដែរ ។មន្រ្តីក្រសួងពាណិជ្ជកម្មអោយដឹងថា ក្នុងថ្ងៃទី១៧ កុម្ភៈ ក្រុមពាណិជ្ជកររវាងប្រទេសកម្ពុជា និងថៃ នឹងជួបប្រជុំគ្នា ដើម្បីពិនិត្យលើលទ្ធភាព នៃការវិនិយោគរួមគ្នាបន្ថែមទៀត។
គួររំលឹកថា កម្ពុជាជាទីផ្សារសំខាន់មួយ នៃផលិតផលសព្វសារពើ របស់ប្រទេសថៃ ប៉ុន្តែចាប់តំាងពីមានការឈ្លានពានរបស់ប្រទេសថៃមកលើកម្ពុជា ចាប់ពីខែកក្កដា ២០០៨មក គេសង្កេតថាទំនិញមកពីប្រទេសវៀតណាម ប្រទេសចិន និងប្រទេសកូរ៉េ បានចូលមកជំនួសទំនិញថៃលើទីផ្សារកម្ពុជាខ្លះៗ។
ទំហំពាណិជ្ជកម្មរវាងប្រទេសកម្ពុជា និងថៃ រយៈពេល៩ខែឆ្នាំ២០១០កន្លងទៅនេះមានទឹកប្រាក់ជាង ២ ០០០លានដុល្លារ ក្នុងនោះកម្ពុជានាំទំនិញចូលទៅប្រទេសថៃជាង១៤៧លានដុល្លារ ចំណែកថៃនាំចូលកម្ពុជាមានទឹកប្រាក់ជាង១ ៩៩០លានដុល្លារ។ មន្រ្តីជំនាញ ពាណិជ្ជកម្មខ្មែរ អះអាងថាទំហំពាណិជ្ជកម្មនេះ មិនធ្លាក់ចុះនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ