កម្ពុជា ដកផ្ទាំងអក្សរចារឹក ដែលសម្គាល់ពីទីកន្លែងកងទ័ពថៃចូលឈ្លានពាន
ទីបំផុតទៅ កងទាហានកម្ពុជា បានសម្រេចចិត្តដកផ្ទាំងអក្សរចារឹក ដែលសរសេរជាសម្គាល់ពីកន្លែងកងទ័ពថៃ ចូលឈ្លានពានទឹកដីកម្ពុជា នៅវត្តកែវសិក្ខាគិរីស្វារៈ ជិតប្រាសាទព្រះវិហារ។ ជាការសម្រេចចិត្ត ក្រោយពីកងទាហានថៃ បានលើកទ័ពចូលឈរជើង និងលើកផ្ទាំងអក្សរមួយដែរ នៅតំបន់សំបុកឃ្មុំ។ តំបន់សំបុកឃ្មុំ និងវត្តកែវសិក្ខាគិរីស្វារៈ របស់កម្ពុជា ស្ថិតក្នុងតំបន់ ៤,៦ គីឡូម៉ែត្រក្រឡា ដែលថៃ ចាត់ទុកថា ជាតំបន់ជម្លោះ។
ចុះផ្សាយនៅថ្ងៃ៖
សេចក្តីរាយការណ៍របស់ លី ម៉េងហូរពីភ្នំពេញ
កាសែតថៃ បាងកកប៉ុស្តិ៍ បានស្រង់សំដី នាយករដ្ឋមន្ត្រីថៃ មកចុះផ្សាយថា នៅថ្ងៃពុធ ទី២៦ ខែមករា ឆ្នាំ២០១១ កងទាហានកម្ពុជា បានដកនូវផ្ទាំងអក្សរចារឹកជាភាសាខ្មែរ ចេញពីតំបន់ ៤,៦ គីឡូម៉ែត្រ ដែលថៃចាត់ទុកថា ជាតំបន់ជម្លោះ នៅជិតព្រំដែនប្រាសាទព្រះវិហារ។
លោកនាយករដ្ឋមន្ត្រីថៃ អាប់ភីស៊ិត បានចាត់ទុកថា ការសម្រេចចិត្តរបស់កម្ពុជា ដកផ្ទាំងអក្សរចេញពីវត្តកែវសិក្ខាគិរីស្វារៈ វាជាការល្អមួយ ដែលអាជ្ញាធរកម្ពុជា មានកិច្ចសហប្រតិបត្តិការល្អជាមួយថៃ។
ជុំវិញការសម្រេចចិត្តដកផ្ទាំងអក្សរ សម្គាល់ពី ទីកន្លែងទាហានថៃ ចូលឈរជើងរំលោភទឹកដីកម្ពុជា នៅព្រំដែនប្រាសាទព្រះវិហារ នៅថ្ងៃនេះ មិនមានអត្ថាធិប្បាយពីមេបញ្ជាការកងទ័ពកម្ពុជា ដែលឈរជើងនៅប្រាសាទព្រះវិហារឡើយ។
ផ្ទាំងថ្មចារឹកអក្សរខ្មែរ ដែលលើកបញ្ឈរ ក្រោយពីកងទ័ពថៃ បានដកចេញពីទឹកដីកម្ពុជា កាលពីថ្ងៃទី១ ខែធ្នូ ឆ្នាំ២០១០ បានសរសេរថា “ ទីនេះ ជាកន្លែងទាហានថៃ ចូលមកឈ្លានពានទឹកដីកម្ពុជា កាលពីថ្ងៃ១៥ ខែកក្កដា ឆ្នាំ២០០៨ ហើយបានដកទ័ពទៅវិញនៅម៉ោង ១០ និង ៣០ ព្រឹក នាថ្ងៃ១ធ្នូ ឆ្នាំ២០១០”។ ផ្ទាំងអក្សរចារឹកនោះ ត្រូវបានកែសម្រួល កាលពីថ្ងៃ២៥មករាម្សិលមិញ មកជាពាក្យថា "ទីនេះ! ជាទឹកដីកម្ពុជា"។ ការកែសម្រួលអក្សរ ធ្វើឡើង ក្រោយពីមានការតវ៉ាពីភាគីថៃ។
ជាការកត់សម្គាល់ នៅព្រឹកថ្ងៃទី២៦មករា ឆ្នាំ២០១១ កងទាហានប៉ារ៉ាថៃរាប់សិបនាក់ប្រដាប់ដោយអាវុធគ្រប់ដៃ និងមានប៉ាឡូ ដឹកនាំដោយលោកឧត្តមសេនីយ៍ សុវ៉ាន់ឆៃ សាមុតសាកន មេបញ្ជាការភូមិភាគ២ បានលើកទ័ពចូលរំលោភទឹកដីកម្ពុជា ដោយឈរជើង នៅតំបន់សំបុកឃ្មុំ។ កងទាហានថៃ ក៏បានលើកស្លាកអក្សរថៃ ដែលសរសេរថា “កន្លែងនេះ ជាតំបន់ ៤,៦ គីឡូម៉ែត្រក្រឡា ដែលនឹងដឹងច្បាស់ នៅពេលគណៈកម្មការព្រំដែនចម្រុះថៃ-កម្ពុជា ( JBC ) ចុះវាស់វែងរួចរាល់នាពេលខាងមុខ”។
ដើម្បីសម្រួលស្ថានការណ៍ លោកនាយឧត្តមសេនីយ៍ ជា តារា បានដឹកនាំកងកម្លាំងយោធាកម្ពុជា ជួបចរចាជាមួយភាគីថៃ នៅវត្តកែវសិក្ខាគិរីស្វារៈ។ មេបញ្ជាការកងទ័ពកម្ពុជា និងថៃ បានសម្រេចបញ្ចប់បញ្ហា ដោយទម្លាក់ផ្ទាំងអក្សរ ហើយដកទ័ពថយក្រោយរៀងៗខ្លួននៅរសៀលថ្ងៃ២៦មករានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ