Human Rights Watch៖ រដ្ឋាភិបាលកម្ពុជារឹតត្បិតសិទ្ធិមូលដ្ឋានរបស់ពលរដ្ឋ
អង្គការសិទ្ធិមនុស្ស Human Rights Watchបាននិយាយនៅក្នុងរបាយការណ៍ប្រចាំឆ្នាំរបស់ខ្លួនថា រដ្ឋាភិបាលកម្ពុជា បានរឹតត្បិតសិទ្ធិសេរីភាពជាមូលដ្ឋានរបស់ពលរដ្ឋកាលពីឆ្នាំ២០១០ កន្លងទៅនេះ។ Human Rights Watch បានអំពាវនាវអោយអង្គការសហប្រជាជាតិ និងក្រុមប្រទេសផ្តល់ជំនួយទប់ទល់ប្រឆាំងនឹងបង្កើនការរឹតត្បិតទាំង នេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
នៅក្នុងសេចក្តីប្រកាសព័ត៌មានរបស់ខ្លួនដែលចេញផ្សាយនៅថ្ងៃអង្គារទី២៥មករានេះ អង្គការការពារសិទ្ធិមនុស្ស Human Rights Watch បានសរសេរថា នៅក្នុងឆ្នាំ២០១០កន្លងទៅ រដ្ឋាភិបាលកម្ពុជា បានរឹតត្បិតសិទ្ធិជាមូលដ្ឋានរបស់ពលរដ្ឋ ដែលប្រការនេះបានធ្វើអោយមានស្ថានភាពលំបាក និងគ្រោះថ្នាក់ដល់អ្នកការពារសិទ្ធិមនុស្ស សកម្មជនតវ៉ាក្នុងសំណុំរឿងជម្លោះដីធ្លី និងក្រុមតំណាងសហជីពកម្មករ។ សេចក្តីប្រកាសព័ត៌មានបានដកស្រង់ការវាយតម្លៃបែបនេះ ពីក្នុងរបាយការណ៍ពិភពលោកប្រចាំឆ្នាំ២០១១ របស់អង្គការការពារសិទ្ធិមនុស្ស Human Rights Watch។
Human Rights Watch បានដកស្រង់ព្រឹត្តិការណ៍នានាដែលបានកើតឡើងនៅក្នុងប្រទេសកម្ពុជាកាលពីឆ្នាំមុននោះ ដើម្បីធ្វើជាអំណះអំណាងនៃការវាយតម្លៃអំពីការធ្លាក់ចុះនៃវិស័យសិទ្ធិមនុស្សនៅក្នុងប្រទេសនេះ។ យោងតាមរបាយការណ៍របស់ Human Rights Watch ព្រឹត្តិការណ៍ទាំងនោះរួមមាន ការបញ្ជូនជនជាតិភាគតិចអ៊ុយហ្គួដែលបានស្វែងរកការជ្រកកោននៅកម្ពុជា ទៅប្រទេសចិនវិញ ការគំរាមបណ្តេញអ្នកសម្របសម្រួលទទួលបន្ទុកសិទ្ធិមនុស្សរបស់អង្គការសហប្រជាជាតិនៅកម្ពុជា ការគំរាមបិទការិយាល័យសិទ្ធិមនុស្សអង្គការសហប្រជាជាតិប្រចាំកម្ពុជា ការកាត់ទោសមន្ត្រីអង្គការស្បៀងអាហារពិភពលោក ការចោទប្រកាន់កាត់ទោសតំណាងរាស្ត្រគណបក្សប្រឆាំង និងការបណ្តេញចេញដោយបង្ខំក្នុងសំណុំរឿងដីធ្លីជាដើម។
អ្នកនាំពាក្យរដ្ឋាភិបាលកម្ពុជា លោកខៀវ កាញារីទ្ធិ បានច្រានចោលការវាយតម្លៃរបស់អង្គការ Human Rights Watch។ លោកខៀវ កាញារីទ្ធ បានអះអាងថា មូលដ្ឋាននៃសេរីភាពត្រូវបានធានា និងការពារ។ ឆ្លើយតបចំពោះករណីដែលបានកើតឡើងមកនោះ សម្រាប់អ្នកនាំពាក្យរដ្ឋាភិបាលកម្ពុជា វាគឺជាការអនុវត្តច្បាប់ដែលត្រូវធ្វើសម្រាប់មនុស្សទូទៅ។
លោក ខៀវ កាញារីទ្ធបញ្ជាក់ថា ចាប់ពីពេលនេះទៅ មិនមានសកម្មភាពណាមួយ ដែលត្រូវចាកឆ្ងាយពីការទទួលខុសត្រូវរបស់ខ្លួនអ្នកប្រព្រឹត្តនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ