ក្រុមសមាជិកព្រឹទ្ធសភាបារាំងទស្សនកិច្ច៧ថ្ងៃនៅកម្ពុជា
គណប្រតិភូសមាជិកព្រឹទ្ធសភាបារាំងបានមកដល់កម្ពុជានៅថ្ងៃនេះ ដើម្បីបំពេញទស្សនកិច្ចផ្លូវការចំនួនមួយសប្តាហ៍។ ទស្សនកិច្ចនេះដឹកនាំដោយលោកស្រីCathererine Tasca ដែលជាអនុប្រធានទី១នៃព្រឹទ្ធសភាបារាំង និងជាប្រធានក្រុមមិត្តភាពនៃសមាជិកព្រឹទ្ធសភាកម្ពុជាបារាំង។ ទស្សនកិច្ចត្រូវបានធ្វើឡើងក្នុងក្របខ័ណ្ឌនៃសហប្រតិបត្តិការអន្តរសភា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
គណប្រតិភូព្រឹទ្ធសភាបារាំងបានមកដល់កម្ពុជាកាលពីរសៀលថ្ងៃចន្ទទី២៤មករានេះ ដើម្បីផ្តើមទស្សនកិច្ចផ្លូវការរយៈពេល៧ថ្ងៃ ដើម្បីពង្រឹងសហប្រតិបត្តិការរវាងសភាជាន់ខ្ពស់របស់ប្រទេសទាំងពីរ។ លោកស្រី Cathererine Tascaដែលជាអនុប្រធានទីមួយនៃព្រឹទ្ធសភាបារាំងគឺជាប្រធានគណប្រតិភូជាន់ខ្ពស់នេះ។ យោងតាមសេចក្តីប្រកាសព័ត៌មានរបស់ស្ថានទូតបារាំងប្រចាំកម្ពុជា ដំណើរទស្សនកិច្ចនេះ មានគោលដៅពិនិត្យលើកិច្ចសហប្រតិបត្តិការអន្តរសភាដែលកំពុងដឹកនាំដោយស្ថាប័នព្រឹទ្ធសភាកម្ពុជា ជាពិសេសគឺស្ថិតនៅក្នុងក្របខ័ណ្ឌនៃសហគមន៍ប្រទេសនិយាយភាសាបារាំង និងពិនិត្យទៅលើទស្សនវិស័យនៃសហប្រតិបត្តិការទាំងនេះ។
នៅក្នុងដំណើរទស្សនកិច្ចនេះដដែល លោកស្រី Cathererine Tascaដែលជាប្រធានក្រុមមិត្តភាពនៃសមាជិកព្រឹទ្ធសភាបារាំងកម្ពុជាផងនោះ នឹងដឹកនាំសិក្ខាសាលាមួយជាមួយសហការីសមាជិកព្រឹទ្ធសភាកម្ពុជា ដែលប្រធានបទនៃសិក្ខាសាលានោះផ្តោតទៅលើ តួនាទី២របស់សមាជិកព្រឹទ្ធសភា៖ ការតាក់តែង និងត្រួតពិនិត្យច្បាប់ និងសកម្មភាពនៅមូលដ្ឋាន។
ក្នុងរយៈពេលនៃការស្នាក់នៅក្នុងប្រទេសកម្ពុជា ប្រតិភូសមាជិកព្រឹទ្ធសភាបារាំងនឹងជួបសវនាការជាមួយព្រះមហាក្សត្រខ្មែរព្រះបាទព្រះបរមនាថ នរោត្តម សីហមុនី ជាមួយលោកជា ស៊ីម ប្រធានព្រឹទ្ធសភា លោក ងួន ញិលអនុប្រធានទី១រដ្ឋសភា និងលោក ហ៊ុន សែន នាយករដ្ឋមន្ត្រី។ ក្រៅពីនេះ គណៈប្រតិភូនេះក៏នឹងអញ្ជើញទៅធ្វើទស្សនកិច្ចនៅក្នុងក្រុងសៀមរាបផងដែរ ដែលនៅទីនោះ ក្រុមសមាជិកព្រឹទ្ធសភានឹងទស្សនកិច្ចនៅសាលាបារាំង និងថ្នាក់២ភាសា Classe Bilingue។
លោកលី សាលីម ទីប្រឹក្សាអគ្គលេខាធិការដ្ឋានព្រឹទ្ធសភាកម្ពុជា ទទួលបន្ទុកfrancophonieបានរម្លឹកថា សហប្រតិបត្តិការនៃព្រឹទ្ធសភាបារាំងចំពោះព្រឹទ្ធសភាកម្ពុជានោះ បានកើតមានតាំងពីការកកើតស្ថានប័ននេះ នៅឆ្នាំ១៩៩៩មកម្ល៉េះ។ លោក លី សាលីមបន្តថា ព្រឹទ្ធសភាបារាំងបានផ្តល់ជំនួយបច្ចេកទេស និងវគ្គបណ្តុះបណ្តាលដល់មន្ត្រីព្រឹទ្ធសភាកម្ពុជាជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ