គណបក្សប្រជាជនកម្ពុជា ប្រារព្ធមីទ្ទិញ អបអរខួបលើកទី៣២ នៃទិវាជ័យជំនះ ៧ មករា
ដូចរៀងរាល់ឆ្នាំដែរ គណបក្សប្រជាជនកម្ពុជា បានរៀបចំប្រារព្ធមីទ្ទិញ អបអរសាទរ ទិវាជ័យជំនះ ថ្ងៃ៧មករា ឆ្នាំ១៩៧៩។ ពិធីសាទរជាច្រើន ត្រូវបានធ្វើឡើងនៅទូទាំងប្រទេស ពិសេសនៅទីស្នាក់ការកណ្តាលគណបក្សប្រជាជនកម្ពុជា ក្នុងទីក្រុងភ្នំពេញ។ នៅព្រឹកមិញ មីទ្ទិញដ៏ធំមួយ ត្រូវបានរៀបចំឡើង ដោយមានការចូលរួមពីប្រមុខដឹកនាំគណបក្សកាន់អំណាចទាំងបីរូប ជាមួយថ្នាក់ដឹកនាំ និងអ្នកគាំទ្រប្រមាណជាង ១០.០០០ នាក់ផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហូរ ពីភ្នំពេញ
នៅព្រឹកព្រលឹមថ្ងៃសុក្រនេះ អង្គមីទ្ទិញសាទរទិវាបុណ្យជាតិ ថ្ងៃ៧មករា ត្រូវបានរៀបចំឡើង យ៉ាងអធិកអធមនៅទីស្នាក់ការធំ គណបក្សប្រជាជនកម្ពុជា ក្នុងក្រុងភ្នំពេញ។ ពិធីដូចគ្នានេះ ក៏ត្រូវបានធ្វើឡើងនៅតាមខេត្តនានា ទូទាំងប្រទេស។ លោក ជា ស៊ីម ប្រធានគណបក្សប្រជាជនកម្ពុជា លោក ហេង សំរិន ប្រធានកិត្តិយស និងលោកនាយករដ្ឋមន្ត្រី ហ៊ុន សែន អនុប្រធានគណបក្សប្រជាជនកម្ពុជា បានបង្ហាញវត្តមាន ចូលរួមជាអធិបតី ក្នុងពិធីជួបជុំប្រចាំឆ្នាំ ជាមួយនឹងវត្តមានរបស់ថ្នាក់ដឹកនាំគណបក្សកាន់អំណាច គណបក្សដៃគូ អង្គទូត និងសកម្មជនគាំទ្រជាង ១០.០០០ នាក់។
ក្នុងអង្គមីទ្ទិញ ប្រធានគណបក្សប្រជាជនកម្ពុជា លោក ជា ស៊ីម បានថ្លែងសុន្ទរកថានយោបាយ ដូចរៀងរាល់ឆ្នាំ។ ក្នុងសន្ទរកថា ៧ ទំព័រ លោក ជា ស៊ីម បានចាត់ទុកថ្ងៃ៧មករា ឆ្នាំ១៩៧៩ ជាទិវាជ័យជំនះ ជាប្រវត្តិសាស្ត្រ ដែលគណបក្សប្រជាជនកម្ពុជា ដោយមានការជួយឧបត្តម្ភពីកងទ័ពស្ម័គ្រចិត្តវៀតណាម បានរំដោះប្រជាជនកម្ពុជា ឲ្យរួចចាកផុតពីគ្រោះមហន្តរាយប្រល័យពូជសាសន៍ នៅក្រោមរបបកម្ពុជាប្រជាធិបតេយ្យរបស់ ប៉ុល ពត។
តាមលោក ជា ស៊ីម ដោយសារជ័យជំនះថ្ងៃ៧មករា ឆ្នាំ១៩៧៩ បានធ្វើឲ្យទឹកដីមាតុភូមិ និងប្រជាជាតិខ្មែរ បានរស់ឡើងវិញ ស្ថិតស្ថេរ គង់វង្ស និងរីកចម្រើនរហូតមកដល់បច្ចុប្បន្ន។ ពោលគឺ ៧មករា ជាថ្ងៃកំណើតទី២ របស់ប្រជាជនកម្ពុជា។ បើគ្មានថ្ងៃជ័យជំនះ ៧ មករា ក៏គ្មានអ្វីៗ នាសព្វថ្ងៃនេះដែរ។
សោកនាដកម្ម ក្នុងរបបខ្មែរក្រហម រយៈពេល ៣ ឆ្នាំ ៨ ខែ និង ២០ ថ្ងៃ ចាប់តាំងពីថ្ងៃ១៧មេសា ឆ្នាំ១៩៧៥ ដែលបានធ្វើឲ្យប្រជាជនកម្ពុជាជាង ៣ លាននាក់ ត្រូវស្លាប់ រួមទាំងសមិទ្ធិផលយ៉ាងធំធេងរយៈពេល ៣២ ឆ្នាំ ក្នុងការកសាងប្រទេស ក្រោយរបបខ្មែរក្រហមដួលរលំ ត្រូវបានលោក ជា ស៊ីម គូសបញ្ជាក់ក្នុងអង្គមីទ្ទិញ។ សមិទ្ធិផលជាប្រវត្តិសាស្ត្រ រយៈពេល ៣២ឆ្នាំនោះ គឺជាសមិទ្ធិផលរបស់គណបក្សប្រជាជនកម្ពុជា។ ក្នុងនោះ រួមមានទាំងការទប់ស្កាត់មិនឲ្យកើតមានរបបខ្មែរក្រហមជាថ្មី ការកសាងអភិវឌ្ឍន៍ប្រទេស ការនាំមកជូនប្រជាជននូវលិទ្ធិប្រជាធិបតេយ្យ សិទ្ធិសេរីភាព រហូតដល់ដំណើរការបង្រួបបង្រួមជាតិ ឈានដល់ការចុះកិច្ចព្រមព្រៀងសន្តិភាព ទីក្រុងប៉ារីស ថ្ងៃ២៣តុលា ឆ្នាំ១៩៩១ ព្រមទាំងការបោះឆ្នោតជាតិជាបន្តបន្ទាប់ ចាប់តាំងពីឆ្នាំ១៩៩៣។
ក្រៅពីនេះ ក្នុងនាមជាប្រធានគណបក្សកាន់អំណាច លោក ជា ស៊ីម ក៏បានប្រកាសជំហរគាំទ្រដំណើរការកាត់មេខ្មែរក្រហម និងការបោះបង្គោលព្រំដែនជាមួយវៀតណាម និងជាមួយប្រទេសឡាវ។ រីឯភាពធូរស្រាល និងដំណើរឈានទៅរកប្រក្រតីភាពឡើងវិញនូវសភាពការណ៍ តាមបណ្តោយព្រំដែនកម្ពុជា-ថៃ ក៏ត្រូវបានលើកឡើង ជាមួយនឹងការបន្តរក្សាធ្វើរដ្ឋាភិបាលចម្រុះជាមួយគណបក្សហ្វ៊ុនស៊ិនប៉ិច និងការបញ្ជាក់ជំហរជាថ្មីនូវការគាំទ្របេក្ខភាពលោក ហ៊ុន សែន ជានាយករដ្ឋមន្ត្រីគ្រប់អាណត្តិ។
យ៉ាងណាក៏ដោយ មកដល់ថ្ងៃនេះ នៅតែមានមតិប្រឆាំង ដែលបានចាត់ទុកថ្ងៃ៧មករា ឆ្នាំ១៩៧៩ ថាជាថ្ងៃ ដែលកងទ័ពវៀតណាម ចូលឈ្លានពានទឹកដីកម្ពុជា រំលោភលើឯករាជភាព និងជ្រៀតជ្រែកលើកិច្ចការផ្ទៃក្នុងរបស់កម្ពុជា។ ក៏ប៉ុន្តែមតិរិះគន់ថ្ងៃ៧មករា នៅឆ្នាំនេះ ហាក់ដូចជា មិនសូវខ្លាំងក្លាប៉ុន្មានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ