ការបើកច្រកព្រំដែនប្រាសាទព្រះវិហារស្ថិតក្នុងភាពមិនច្បាស់លាស់
កម្ពុជានិងថៃ បានគ្រោងបើកច្រកព្រំដែនប្រាសាទព្រះវិហារឡើងវិញនៅថ្ងៃទី ៦ធ្នូ កន្លងទៅ។ ប៉ុន្តែភាគីថៃក៏បានស្នើពន្យារពេលការបើកច្រកនេះវិញ។ រហូតដល់ពេលនេះ នៅមិនទាន់មានពន្លឺនៃការកំណត់កាលបរិច្ឆេទនៃការបើកច្រកនេះសាជាថ្មីនៅឡើយទេ។ យោងតាមការពន្យល់របស់មន្ត្រីជាន់ខ្ពស់រដ្ឋាភិបាលកម្ពុជា ការបើកច្រកព្រំដែននេះ ទំនងជាមិនអាចប្រព្រឹត្តទៅក្នុងពេលឆាប់ៗនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
តាំងពីភាគីថៃបានប្រកាសពន្យារពេល នៃការបើកច្រកព្រំដែនប្រាសាទព្រះវិហារកាលពីដើមខែធ្នូ រហូតដល់ពេលនេះកម្ពុជានៅមិនទាន់ទទួលបានការជូនដំណឹងជាថ្មីពីភាគីថៃនោះនៅឡើយទេ។
បើយោងតាមការពន្យល់របស់អ្នកនាំពាក្យរដ្ឋាភិបាលកម្ពុជា លោកខៀវ កាញារីទ្ធ កម្ពុជាត្រូវមានការប្រយ័ត្នប្រយែងខ្លាំង ក្នុងការសម្រេចលើបញ្ហាបើកច្រកព្រំដែនដ៏រសើបនេះ។ លោកខៀវ កាញារីទ្ធបានបញ្ជាក់ថា ច្រកព្រំដែនប្រសាទព្រះវិហារស្ថិតនៅជាច្រកយុទ្ធសាស្ត្ររបស់យោធានៅឡើយ។
បើទោះជា ប្រមុខរដ្ឋាភិបាលទាំងពីរកម្ពុជាថៃបានព្យាយាមសំរួលស្ថានការណ៍យោធានៅព្រំដែនព្រះវិហារអោយត្រលប់មកជាធម្មតាបានស្ទើរតែ១០០ភាគរយក៏ដោយ ប៉ុន្តែបញ្ហាតានតឹងក៏អាចត្រឡប់មកវិញគ្រប់ពេលវេលាដែរ។ កាលពីសប្តាហ៍កន្លងទៅ កងទ័ពឈុតខ្មៅ និងកងទ័ពប៉ារ៉ាថៃបានស្នើសុំឡើងមកវត្តកែវសិក្ខាគិរីស្វារៈ ប៉ុន្តែត្រូវបានកងទ័ពខ្មែរហាមឃាត់មិនអោយចូល។
គួរបញ្ជាក់ថា ក្រុមជនថៃអាវលឿងជាតិនិយមជ្រុល តែងតែប៉ុនប៉ងមកធ្វើបាតុកម្មនៅមុខច្រកព្រំដែនប្រាសាទព្រះវិហារនេះ ដើម្បីប្រឆាំងនឹងការចុះឈ្មោះប្រាសាទព្រះវិហារក្នុងបញ្ជីបេតិកភណ្ឌពិភពលោក។ ហើយជាងនេះទៀតនោះ វត្តមាននៃកងទ័ពថៃដែលចូលមកឈរជើងនៅក្នុងវត្តកែវសិក្ខាគិរីស្វារៈចាប់ពីថ្ងៃទី១៥កក្កដា២០០៨មកនោះ គឺដោយសារតែមានជនជាតិថៃចូលមកបង្កបញ្ហានៅលើទឹកដីកម្ពុជា ហើយកងទ័ពថៃក៏បានមកតាមក្រោយ ក្រោមមូលហេតុថាមកដោះស្រាយបញ្ហានេះ។
លោកហង្ស សុត អគ្គនាយកអាជ្ញាធរជាតិព្រះវិហារបានថ្លែងយ៉ាងខ្លីថា លទ្ធភាពនៃការបើកច្រកប្រាសាទព្រះវិហារឡើងវិញនោះ អាចធ្វើទៅបានលុះត្រាតែស្ថានភាពដូចដើម។ ដូចដើមមានន័យថា ជាព្រំដែនសន្តិភាព ហើយមិនមានបញ្ហាឈ្លានពានដូចមុន ថ្ងៃ១៥កក្កដា២០០៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ