មេបក្សប្រឆាំងសម្រេចប្តឹងសាទុក្ខទៅតុលាការកំពូលរឿងដកតម្រុយព្រំដែន
មេធាវីការពារក្តីប្រធានគណបក្សប្រឆាំងដែលកំពុងនិរទេសខ្លួននៅក្រៅប្រទេស ថ្លែងឲ្យដឹងនៅថ្ងៃនេះថា លោកសម រង្ស៊ី បានសម្រេចចិត្តបន្តរឿងក្តីដកតម្រុយព្រំដែន នៅខេត្តស្វាយរៀងទៅតុលាការកំពូល។ សារណាការពាររឿងក្តីនេះនឹងត្រូវបញ្ជូនទៅតុលាការនៅមុនថ្ងៃទី ២៥ ធ្នូខាងមុខ ដើម្បីស្នើសុំឲ្យរួចផុតពីការចោទប្រកាន់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នេត្រ ភក្រ្តា
មេដឹកនាំគណបក្សប្រឆាំងសម រង្ស៊ី បានសម្រេចចិត្តបន្តរឿងក្តីរបស់គាត់ទៅតុលាការកំពូល ដោយច្រានចោលសេចក្តីសម្រេចរបស់សាលាឧទ្ធរណ៍តម្កល់សាលក្រមរបស់សាលាដំបូងខេត្តស្វាយរៀងដែលបានផ្តន្ទាទោសលោកឲ្យជាប់ពន្ធនាគាររយៈពេល ២ ឆ្នាំពាក់ព័ន្ធនឹងករណីដកតម្រុយបង្គោលព្រំដែនកម្ពុជា-វៀតណាម។
លោក ជួង ជូងី មេធាវីការពារក្តីលោក សម រង្ស៊ី បានថ្លែងនៅថ្ងៃនេះថា លោកកំពុងរៀបចំសារណាដើម្បីការពារបណ្តឹងសាទុក្ខរបស់ខ្លួនទៅតុលាការកំពូល។ លោកអះអាងថា លោក សម រង្ស៊ី ដែលជាកូនក្តីរបស់លោកមិនអាចទទួលយកសេចក្តីសម្រេចរបស់សាលាឧទ្ធរណ៍បានទេ ហើយថាលោកនឹងបញ្ជូនសារណាការពារក្តីទៅតុលាការកំពូល ឲ្យបានមុនថ្ងៃទី ២៥ ខែធ្នូ។
លោក ជួង ជូងី មានប្រសាសន៍ថា សារណាដែលកំពុងត្រូវរៀបចំនេះគឺដើម្បីបញ្ជាក់ថា លោកសម រង្ស៊ីគ្មានទោសពៃរ៍ចំពោះការដកបង្គោលព្រំដែន និងស្នើសុំឲ្យរួចផុតពីការចោទប្រកាន់។ លោក សម រង្ស៊ី ត្រូវបានកាត់ទោសដោយតុលាការខេត្តស្វាយរៀងកាលពីខែមករា ដោយផ្តន្ទាទោសលោកឲ្យជាប់ពន្ធនាគាររយៈពេលពីរឆ្នាំ និងបញ្ជាឲ្យលោកបង់ប្រាក់ពិន័យ និងសងជំងឺចិត្តជាង ៦០ លានរៀលជាប់ពាក់ព័ន្ធនឹងករណីដកតម្រុយបង្គោលព្រំដែនលេខ ១៨៥ នៅក្នុងស្រុកចន្ទ្រា ខេត្តស្វាយរៀង។
កាលពីខែកញ្ញា លោកត្រូវបានតុលាការរាជធានីកាត់ទោសឲ្យជាប់ពន្ធនាគារ ១០ ឆ្នាំបន្ថែមទៀតពាក់ព័ន្ធនឹងករណីក្លែងបន្លំឯកសារសាធារណៈ និងផ្សព្វផ្សាយព័ត៌មានមិនពិត ព្រមទាំងបានបញ្ជាឲ្យលោកបង់ ១០០ លានរៀលជាប្រាក់ពិន័យ និងសំណង។ លោកជួង ជូងី ថ្លែងឲ្យដឹងថា បណ្តឹងឧទ្ធរណ៍ លើករណីនេះមិនទាន់ត្រូវបានលើកយកមកជំនុំជម្រះនៅឡើយទេ។ លោកជួង ជូងី បានអះអាងថារឿងក្តីរបស់លោកសម រង្ស៊ី គឺជារឿងនយោបាយ មិនមែនជាករណីព្រហ្មទណ្ឌឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ