ហ៊្វុនស៊ីនប៉ិចនិងនរោត្តម រណឬទ្ធិ បន្តប្រកែកគ្នាឡើងវិញ
ព្រអង្គម្ចាស់នរោត្តម រណឬទ្ធិបានធ្វើលិខិតដាក់សំណួរទៅប្រធានគណបក្សហ៊្វុនស៊ីនប៉ិច លោកកែវ ពុទ្ធរស្មី ដើម្បីអោយប្រធានគណបក្សនេះ បញ្ជាក់អំពីមូលហេតុដែលគណបក្សហ៊្វុនស៊ីនប៉ិច បដិសេធមិនចូលរួមបង្កើតគណបក្សថ្មីឈ្មោះហ៊្វុនស៊ីនប៉ិច ៨១ ជាមួយគណបក្សនរោត្តម រណឬទ្ធិ។ សេចក្តីប្រកាសព័ត៌មានមួយរបស់គណបក្សហ៊្វុនស៊ីនប៉ិចកាលពីថ្ងៃទី១២ ធ្នូបានសរសេរថា គណបក្សនេះ មិនផ្លាស់ប្តូរជំហររំលាយឈ្មោះគណបក្សហ៊្វុនស៊ីនប៉ិចដែលត្រូវបាន ចារឹកជាគណបក្សក្នុងប្រវត្តិសាស្ត្ររួចហើយនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
ក្រោយពីព្រះអង្គម្ចាស់រណឬទ្ធិ បានក្លាយជាប្រធានគណបក្សនរោត្តម រណឬទ្ធិឡើងវិញសង្រ្គាមប៉ាកការវាងសត្រូវបងប្អូនបង្កើតហ៊្វុនស៊ីនប៉ិច និងនរោត្តម រណឬទ្ធិបានកើតឡើងសាជាថ្មី។
ក្រោយពីបានសម្តែងការសោកស្តាយចំពោះសេចក្តីប្រកាសបដិសេធការចូលរួមបង្កើតគណបក្សហ៊្វុនស៊ីនប៉ិច ៨១ ពីសំណាក់គណបក្សហ៊្វុនស៊ីនប៉ិចសព្វថ្ងៃ ព្រះអង្គម្ចាស់រណឬទ្ធិបានធ្វើលិខិតមួយទៀតកាលពីថ្ងៃចន្ទទី១៣ម្សិលមិញ ផ្ញើទៅលោកកែវ ពុទ្ធរស្មី ដើម្បីសួរបញ្ជាក់ឡើងវិញអំពីជំហររបស់គណបក្សហ៊្វុនស៊ីនប៉ិច ក្នុងការបង្កើតគណបក្សហ៊្វុនស៊ីនប៉ិច៨១នេះ។
មិនមែនគណបក្សហ៊្វុនស៊ីនប៉ិចគេចវេះពីការបង្រួបបង្រួមគ្នានោះទេ។ ប្រធានគណបក្សហ៊្វុនស៊ីនប៉ិច លោកកែវ ពុទ្ធរស្មី បានអះអាងប្រាប់វិទ្យុបារាំងអន្តរជាតិនៅថ្ងៃអង្គារនេះថា ថ្នាក់ដឹកនាំគណបក្សហ៊្វុនស៊ីនប៉ិចរបស់លោកចង់ធ្វើការងារ អោយបានច្បាស់លាស់ តាមដំណាក់កាល។ យោងតាមការពន្យល់របស់លោកកែវ ពុទ្ធរស្មី គឺបានន័យថា ទីមួយគណបក្សហ៊្វុនស៊ីនប៉ិច ចង់បន្តអនុវត្តស្មារតីពិធីសារសម្ព័ន្ធភាពគ្នារវាងគណបក្សហ៊្វុនស៊ីនប៉ិច និងគណបក្សជាតិនិយមដែលបានក្លាយជាគណបក្សនរោត្តម រណឬទ្ធិ។
ស្មារតីនៃពិធីសារនោះ បើតាមការបញ្ជាក់របស់លោកកែវ ពុទ្ធរស្មី គឺគណបក្សទាំងពីរនឹងបន្តធ្វើការងារជាមួយគ្នា ក្នុងក្របខណ្ឌសហប្រតិបត្តិការ ហើយឈានទៅរកការធ្វើបញ្ជីឈ្មោះបេក្ខជនបោះឆ្នោតរួមគ្នាក្នុងឆ្នាំ២០១២ សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់។ ទី២ ប្រសិនបើ គណបក្សទាំងពីរ ហ៊្វុនស៊ីនប៉ិចនិងនរោត្តមរណឬទ្ធិ សម្រេចទុកចោលពិធីសារនេះវិញ លោកកែវ ពុទ្ធរស្មីថ្លែងថា គណបក្សហ៊្វុនស៊ីនប៉ិច ត្រូវរង់ចាំរហូតដល់គណបក្សនរោត្តម រណឬទ្ធិត្រូវបានទទួលស្គាល់ជាផ្លូវការពីក្រសួងមហាផ្ទៃសិន បន្ទាប់ពីការផ្លាស់ប្តូរឈ្មោះ ពីគណបក្សជាតិនិយមកាលពីថ្ងៃទី១១ធ្នូ។ ការពន្យល់ទាំងនេះ ត្រូវបានលោកកែវ ពុទ្ធរស្មីសរសេរផ្ញើទៅព្រះអង្គម្ចាស់រណឬទ្ធិកាលពីរសៀលថ្ងៃទី១៤ធ្នូនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ