វេទិកាជម្រុញការផ្តល់ឥណទានដើម្បីអភិវឌ្ឍន៍សហគ្រាសខ្នាតតូចនិងមធ្យម
តំណាងស្ថាប័នហិរញ្ញវត្ថុ ធនាគារ ព្រមទាំងសហគ្រាសខ្នាតតូច និងមធ្យម នៅកម្ពុជា បានជួបពិភាក្សា ក្នុងវេទិកាថ្នាក់ជាតិ នៅថ្ងៃពុធនេះ ទី១០ វិច្ឆិកានេះ។ ជាការជួបប្រជុំ ដើម្បីសម្របសម្រួលឲ្យសហគ្រាសខ្នាតតូច និងមធ្យម ទទួលបានឥណទានហិរញ្ញវត្ថុ ឬទុនកម្ចីបន្ថែម ពីធនាគារ។ តាមការស្រាវជ្រាវ សហគ្រាសធុនតូច និងមធ្យម នៅកម្ពុជា ប្រមាណ ៩០% ខ្វះខាតដើមទុន ដើម្បីវិនិយោគ និងពង្រីកអាជីវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហូរ
ក្នុង ប្រទេសកម្ពុជា មានសហគ្រាសខ្នាតតូច និងមធ្យម បានចុះ បញ្ជី និងមិនទាន់បានចុះបញ្ជីសរុបចំនួន ៣៧៥.០៩៥ សហគ្រាស។ ក្នុងនោះ ៨៥% ជាសហគ្រាសធុនតូច ដែលបានផ្តល់ការងារដល់ប្រជាជនកម្ពុជាប្រមាណ ១ លាននាក់។
ការសិក្សាម្តងហើយម្តងទៀតរបស់ធនាគារពិភពលោកនិងសាជីវកម្មហិរញ្ញវត្ថុអន្តរជាតិ បានបង្ហាញថា វិស័យឯកជនរបស់កម្ពុជាជាពិសេស សហគ្រាសមីក្រូហិរញ្ញវត្ថុខ្នាតតូចនិងមធ្យមមានរហូតដល់៩០% ខ្វះខាតហិរញ្ញវត្ថុ ដើមទុនដើម្បីយកមកវិនិយោគនិងពង្រីកអាជីវកម្ម។ ក្នុងនោះ សហគ្រាសស្ទើរតែទាំងអស់ បានប្រើប្រាស់ថវិកាផ្ទាល់ខ្លួន ឬកម្ចីពីក្រុមគ្រួសារ និងពីមិត្តភ័ក្តិ ក្នុងការចាប់ផ្តើមអាជីវកម្ម។
ក្នុងកិច្ចពិភាក្សារយៈពេលពេញមួយថ្ងៃ នៅថ្ងៃនេះ ម្ចាស់និងអ្នកគ្រប់គ្រងសហគ្រាសធុនតូច និងមធ្យម រួមទាំងតំណាងគ្រឹះស្ថានហិរញ្ញវត្ថុ ធនាគារ ដៃគូអភិវឌ្ឍន៍ និងមន្ត្រីរដ្ឋាភិបាល បានពិភាក្សាស្វែងយល់ពីឧបសគ្គ ដែលសហគ្រាសធុនតូច និងមធ្យមនិងស្ថាប័នហិរញ្ញវត្ថុធនាគារ ជួបប្រទះ ដើម្បីដាក់ចេញនូវយុទ្ធសាស្ត្ររួមជម្រុញឲ្យវិស័យធនាគារ និងសហគ្រាសធុនតូច និងមធ្យម នៅកម្ពុជា ផ្សារភ្ជាប់គ្នា និងកាន់តែមានទំនុកចិត្តជាមួយគ្នាថែមទៀត។
លោក តែ តាំងប៉រ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា បានលើកឡើងពីបញ្ហាប្រឈមជាច្រើន ដែលសហគ្រាសធុនតូច បានជួបប្រទះ ជាពិសេសកង្វះខាតដើមទុន។ តំណាងសហគ្រាសធុនតូច និងមធ្យម បានជម្រុញឲ្យធនាគារ ផ្តល់ប្រាក់កម្ចី ឲ្យក្រុមហ៊ុនតូចៗ ដោយមានវត្ថុបញ្ចាំតិចជាងមុន ជាមួយអត្រាការប្រាក់ទាបជាង១០% ក្នុងមួយឆ្នាំ។
ចំណែកអ្នកស្រី សូ ផនណារី តំណាងគ្រឹះស្ថានធនាគារនិងហិរញ្ញវត្ថុ បានជម្រុញឲ្យសហគ្រាសធុនតូច និងមធ្យម ត្រូវពង្រឹងប្រព័ន្ធគ្រប់គ្រងហិរញ្ញវត្ថុ បង្កើនចំណេះដឹងជំនាញ ត្រូវរៀបចំចុះបញ្ជីដីធ្លី និងត្រូវមានភាពស្មោះត្រង់ លើការអនុវត្តន៍កិច្ចសន្យាខ្ចីប្រាក់។ល។ និង។ល។
យ៉ាងណាក៏ដោយ អ្នកជំនាញរបស់សាជីវកម្មហិរញ្ញវត្ថុអន្តរជាតិ បានលើកឡើងថា កន្លងមក ធនាគារនៅកម្ពុជា មានវិធានការរឹតត្បិតដោយផ្តល់ហិរញ្ញប្បទានរយៈពេលខ្លីនិងតិចតួចសម្រាប់ការចំណាយប្រតិបត្តិការរបស់អាជីវកម្ម។ ម្យ៉ាងវិញទៀត ទោះបីជាម្ចាស់ក្រុមហ៊ុនអាចផ្តល់ជាដីនិងអគារសម្រាប់ដាក់បញ្ចាំ ក៏ធនាគារ មិនផ្តល់កម្ចីធំ និងរយៈពេលវែង ដែលក្រុមហ៊ុន ត្រូវការ ដើម្បីពង្រីកអាជីវកម្មរបស់ខ្លួនឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ