លោករ៉ុង ឈុនចង់ផ្តល់ញត្តិផ្ទាល់ដៃជូនលោកបាន គីមូន
លោក រ៉ុង ឈុន ប្រធានសហភាពសហជីពកម្ពុជាមានបំណងជូនញត្តិផ្ទាល់ដៃជូនលោកអគ្គលេខាធិការអង្គការសហប្រជាជាតិ បាន គីមូន នៅថ្ងៃអង្គារខាងមុខនេះ។ ញត្តិនេះនិយាយអំពីបញ្ហាបូរណភាពទឹកដី និងភាពទន់ខ្សោយនៃប្រព័ន្ធយុត្តិធម៌នៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់គី សុខលីមពីទីក្រុងភ្នំពេញ
បើទោះបីជាសាលារាជធានីភ្នំពេញមិនអនុញ្ញាតអោយសហភាពសហជីពកម្ពុជាធ្វើការជួបជុំ ដើម្បីសម្ដែងមតិ នៅថ្ងៃមកដល់របស់លោក បាន គីមូន អគ្គលេខាធិការអង្គការសហប្រជាជាតិ ក៏ដោយក៏លោក រ៉ុង ឈុន ប្រធានសហភាពសហជីពកម្ពុជានឹងនៅតែធ្វើការជួបជុំគ្នាដដែល នៅថ្ងៃទី២៦ខែតុលាខាងមុខនេះ។
ចាប់ពីថ្ងៃអង្គារទី២៦ ដល់ថ្ងៃទី២៨សប្ដាហ៍ក្រោយនេះ លោក បាន គីមូន អគ្គលេខាធិការអង្គការសហប្រជាជាតិនឹងមកបំពេញទស្សនកិច្ចជាផ្លូវការ នៅក្នុងប្រទេសកម្ពុជា។ លោក រ៉ុង ឈុន បានថ្លែងប្រាប់ នៅថ្ងៃអាទិត្យនេះថា ក្រុមរបស់លោកនឹងជួបជុំគ្នានៅមុខអតីតអគាររដ្ឋសភា ជាតិ នៅវេលាម៉ោង៨ព្រឹក នៅថ្ងៃអង្គារខាងមុខនេះ។ ម្យ៉ាងគឺដើម្បីស្វាគមន៍ការមកដល់របស់តំណាងអង្គការសហប្រជាជាតិ និងម្យ៉ាងទៀតគឺដើម្បីផ្ញើសារពីរចំនុចជូនលោក បាន គីមូន។ ប្រធានបទដែលលោក រ៉ុង ឈុន ចង់ជម្រាបប្រាប់លោក បាន គីមូន នោះគឺបញ្ហាបូរណភាពទឹកដី និងភាពទន់ខ្សោយនៃប្រព័ន្ធយុត្តិធម៌នៅកម្ពុជា។
ទាក់ទងទៅនឹងបញ្ហាបូរណភាពទឹកដី លោក រ៉ុង ឈុន បានបញ្ជាក់ថា ប្រទេសថៃបាន និងកំពុងឈ្លានពានប្រទេសកម្ពុជា រីឯការបោះតម្រុយបង្គោលព្រំដែនជាមួយប្រទេសវៀតណាមវិញមានភាពមិនប្រក្រតី។ ចំពោះប្រព័ន្ធតុលាការ លោក ឈុន បានរិះគន់ថា អ្នកមានអំណាចមួយចំនួនជ្រៀតជ្រែកចូលកិច្ចការរបស់តុលាការ។
លោក រ៉ុង ឈុន បានបន្តទៀតថា លោកបានដាក់លិខិតសុំជួប លោក បាន គីមូន តាមរយៈកម្មវិធីអភិវឌ្ឍន៍អង្គការសហប្រជាជាតិប្រចាំនៅកម្ពុជា ប៉ុន្តែរហូតមកដល់ថ្ងៃនេះលោក ឈុន នៅមិនទាន់ទទួលបានចម្លើយតបមកវិញនៅឡើយទេ។
ស្របពេលជាមួយគ្នា អង្គការនិងសមាគមខ្មែរក្រោមដែលមានមូលដ្ឋាន ក្នុងប្រទេសកម្ពុជា ក៏កំពុងស្វះស្វែងរកឱកាសជួបលោក បាន គីមូន ផងដែរដើម្បីរាយការណ៍អំពីស្ថានភាពរបស់ពលរដ្ឋខ្មែរកម្ពុជាក្រោមដែលស្ថិតនៅក្រោមការត្រួតត្រារបស់អាជ្ញាធរវៀតណាម។
នៅក្នុងដំណើរទស្សនកិច្ចរយៈពេលបីថ្ងៃ នៅក្នុងប្រទេសកម្ពុជាលោក បាន គីមូន គ្រោងនឹងជួបសវនាការជាមួយព្រះមហាក្សត្រសម្ដេចព្រះបរមនាថនរោត្តម សីហមុនី បន្ទាប់មកលោកគ្រោងនឹងជួបពិភាក្សាការងារជាមួយលោកនាយករដ្ឋមន្ត្រី ហ៊ុន សែន។
យោងតាមសេចក្តីប្រកាសព័ត៌មានរបស់ក្រសួងការបរទេស លោកអគ្គលេខាធិការអង្គការសហប្រជាជាតិនឹងអញ្ជើញទៅទស្សនាសាលាក្តីខ្មែរក្រហម និងមន្ទីរពេទ្យរុស្ស៊ីផងដែរមុននឹងលោកបន្តដំណើរទស្សនកិច្ចទៅកាន់ប្រទេសថៃ។ ប្រទេសថៃដែលមានជម្លោះព្រំដែនជាមួយប្រទេសកម្ពុជា អស់រយៈពេលជាងពីរឆ្នាំមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ