សង្គមស៊ីវិលអំពាវនាវអោយរដ្ឋាភិបាលពិនិត្យឡើងវិញគម្រោងវិនិយោគដែលប៉ះពាល់ជាអវិជ្ជមានដល់សង្គម
អង្គការសង្គមស៊ីវិលនៅក្នុងប្រទេសកម្ពុជាចំនួន១៥បានអំពាវនាវ អោយរដ្ឋាភិបាលពិនិត្យឡើងវិញគម្រោងវិនិយោគនានាដែលប៉ះពាល់ជា អវិជ្ជមានដល់សង្គមជាតិ។ ប៉ុន្តែមន្ត្រីរាជរដ្ឋាភិបាលឆ្លើយតបវិញថា រាល់គម្រោងវិនិយោគនីមួយៗត្រូវបានសិក្សាតាមលក្ខណៈបច្ចេកទេសទាំងអស់។
ចុះផ្សាយនៅថ្ងៃ៖
សេចក្តីរាយការណ៍របស់ គី សុខលីម
បន្ទាប់ពីធ្វើសន្និសីទថ្នាក់ជាតិប្រចាំឆ្នាំពីរថ្ងៃរួមមក អង្គការសមាគមចំនួន១៥បានអំពាវនាវដល់រាជរដ្ឋាភិបាលកម្ពុជានិងស្ថាប័នពាក់ព័ន្ធទាំងអស់អោយពិនិត្យមើលឡើងវិញគម្រោងវិនិយោគធំៗដែលបង្កផលប៉ះពាល់ជាអវិជ្ជមានដល់សង្គមជាតិ។
សេចក្តីថ្លែងការណ៍រួមរបស់អង្គការសង្គមស៊ីវិលទាំង១៥នេះបានកោតសរសើរកិច្ចខិតខំប្រឹងប្រែងរបស់រាជរដ្ឋាភិបាលក្នុងការរួមចំណែកធានានូវអភិបាលកិច្ចធនធានធម្មជាតិនៅកម្ពុជាប៉ុន្តែបើទោះបីជាយ៉ាងនេះក្តី អង្គការសង្គមស៊ីវិលទាំងនេះបានសម្ដែងការព្រួយបារម្ភអំពីផលប៉ះពាល់មួយចំនួនដែលបណ្ដាលមកពីគម្រោងអភិវឌ្ឍន៍ធំៗ។
សេចក្តីថ្លែងការណ៍រួមបានបញ្ជាក់ចំៗថា គម្រោងសាងសង់ទំនប់វារីអគ្គិសនីបានធ្វើអោយរបបទឹកប្រែប្រួលនិងប៉ះពាល់ដល់របរនេសាទរបស់សហគមន៍នៅតំបន់នោះ។ គម្រោងរុករកនិងធ្វើអាជីវកម្មរ៉ែបានធ្វើអោយប្រជាជនបាត់បង់ដីធ្លី បាត់បង់ប្រភពចំណូលហើយសារធាតុគីមីផ្សេងៗបាននិងកំពុងបំផ្លាញសុខភាពរបស់ប្រជាជននៅសហគមន៍។
ទាក់ទងទៅនឹងការផ្តល់ដីសម្បទានសេដ្ឋកិច្ចវិញ សេចក្តីថ្លែងការណ៍បានបញ្ជាក់ថា ដោយសារការផ្តល់ដីសម្បទានសេដ្ឋកិច្ចមួយចំនួនមិនបានធ្វើឡើងតាមគោលការណ៍ត្រឹមត្រូវប្រជាពលរដ្ឋមួយចំនួនទទួលរងគ្រោះដោយសារគម្រោងទាំងនេះ។ ប្រជាពលរដ្ឋខ្លះបាត់បង់ដីធ្លីផ្ទះសម្បែង រីឯប្រជាពលរដ្ឋខ្លះទៀតត្រូវបានគេជម្លៀសចេញដោយពុំទទួលបានសំណងសមរម្យ។
សេចក្តីថ្លែងការណ៍រួមបានបន្តបញ្ជាក់ទៀតថា គម្រោងធំៗទាំងនោះប៉ះពាល់បរិស្ថាន សេដ្ឋកិច្ច សង្គមកិច្ចនិងវប្បធម៌។
ឆ្លើយតបទៅនឹងការលើកឡើងរបស់អង្គការសង្គមស៊ីវិល លោក ទិត្យ សុធា អ្នកនាំពាក្យអង្គភាពប្រតិកម្មរហ័សនៃទីស្ដីការគណៈរដ្ឋមន្ត្រីបានពន្យល់នៅល្ងាចថ្ងៃសៅរ៍នេះថា គម្រោងវិនិយោគនីមួយៗសុទ្ធតែត្រូវបានធ្វើការសិក្សាពិតប្រាកដទាក់ទងទៅនឹងផលប៉ះពាល់បរិស្ថាននិងផលប្រយោជន៍សេដ្ឋកិច្ច។
អ្នកនាំពាក្យរូបនេះបានបន្តទៀតថា រដ្ឋាភិបាលបានធ្វើការដោយប្រយ័ត្នប្រយែងបំផុតមុននឹងផ្តល់ដីសម្បទានទៅអោយក្រុមហ៊ុនណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ