ជំនន់ទឹកភ្លៀងនៅកម្ពុជាចាប់ផ្តើមស្រក
បន្ទាប់ពីបានវាយលុកកម្ពុជាអស់រយៈពេលជាងមួយអាទិត្យ ជំនន់ទឹកភ្លៀងចាប់បានស្រកចុះបណ្តើរៗ។ មន្ត្រីគ្រប់គ្រងគ្រោះមហន្តរាយបានថ្លែងឲ្យដឹងថា រហូតមកទល់នឹងថ្ងៃអង្គារនេះ មានមនុស្ស ៥ នាក់បានស្លាប់ បាត់បង់ជីវិត និងខូចខាតទ្រព្យសម្បត្តិ ហេដ្ឋារចនាសម្ពន្ធមួយចំនួន។ ប៉ុន្តែការខូចខាតដោយជំនន់ទឹកភ្លៀង នេះមានទំហំតិចជាងព្យុះកេតសាណាកាលពីឆ្នាំទៅ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នេត្រ ភក្រ្តា
គណៈកម្មាធិការជាតិគ្រប់គ្រងគ្រោះមហន្តរាយបានប្រកាសថា ជំនន់ទឹកភ្លៀងដែលបានចាប់ផ្តើមកាលពីថ្ងៃទី១០ តុលាក្នុងខេត្ត-រាជធានីចំនួន ១៣ ក្នុងប្រទេសកម្ពុជា ឥឡូវនេះ បានស្រកចុះមកវិញហើយ។ លោកញឹម វណ្ណដា អនុប្រធានទី ១នៃគណៈកម្មាធិការជាតិគ្រប់គ្រងគ្រោះមហន្តរាយបានថ្លែងប្រាប់ក្រុមអ្នកកាសែតកាលពីថ្ងៃម្សិលមិញថា ទឹកជំនន់ទឹកភ្លៀងបានស្រកចុះ ប៉ុន្តែបានប៉ះពាល់ដល់ទ្រព្យសម្បត្តិ ដំណាំរបស់ប្រជាពលរដ្ឋ និងហេដ្ឋារចនាសម្ព័ន្ធរដ្ឋដទៃទៀតដែលបានរងទឹកជំនន់ខូចខាតស្ទើរទាំងស្រុង។
ជំនន់ទឹកភ្លៀងដែលបានវាយប្រហារមកលើប្រទេសកម្ពុជា តាំងពីសបា្តហ៍មុន បានបង្កការស្លាប់មនុស្ស ៥ នាក់ផងដែរ ហើយ ស្រូវរបស់ប្រជាកសិករជាង ៦ពាន់ហិកតាត្រូវបានបំផ្លាញ។ ប៉ុន្តែទោះបីយ៉ាងណា បើតាមលោកញឹម វណ្ណដា យោងតាមការប៉ាន់ប្រមាណជំហានដំបូង ទោះបីជារបាយការណ៍មិនទាន់ត្រូវបានធ្វើឡើងចប់សព្វគ្រប់ ការខាតបង់ដោយសារជំនន់ទឹកភ្លៀង មានទំហំស្ទើរតែពាក់កណ្តាលនៃគ្រោះអន្តរាយព្យុះកេតសាណា កាលពីឆ្នាំមុនដែរ។ លោកបានថ្លែងទៀតថា តំបន់រងគ្រោះធ្ងន់ធ្ងរបំផុត ដោយសារទឹកជំនន់ប៉ុន្មានថ្ងៃនេះ មានខណ្ឌដង្កោ រាជធានីភ្នំពេញ ខេត្តពោធិ៍សាត់ បន្ទាយមានជ័យ និងក្រុងប៉ោយប៉ែត។
យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ព្យុះកេតសាណា បានវាយប្រហារកម្ពុជាចន្លោះពីថ្ងៃទី ២៩ ខែកញ្ញា ដល់ថ្ងៃទី៥ ខែតុលា ឆ្នាំ២០០៩។ ខេត្តចំនួន ១៤ ក្នុងចំណោមខេត្ត-រាជធានី ចំនួន២៤ បានទទួលរងគ្រោះ និងជួបទឹកជំនន់។ ព្យុះនោះបានសម្លាប់មនុស្សចំនួន ៤៣ នាក់ និង ៦៧នាក់ទទួលរងរបួសធ្ងន់ និងបំផ្លាញផ្ទះ និងជីវភាពរស់នៅរបស់គ្រួសារប្រហែល ៤៩ ០០០គ្រួសារ។ ការខូតខាត និងបាត់បង់ដែលបង្កឡើងដោយព្យុះកេតសាណា បានប៉ាន់ប្រមាណតម្លៃខូចខាតថាមានរហូត ១៣២ លានដុល្លារអាមេរិកក្នុងប្រទេសកម្ពុជា។
យោងតាមការព្យាករណ៍របស់ក្រសួងធនធានទឹក និង ឧតុនិយម ភ្លៀងនឹងបន្តនៅរាយប៉ាយនៅគ្រប់ខេត្ត-រាជធានីនៃប្រទេសកម្ពុជា រហូតដល់ពាក់កណ្តាលខែវិច្ឆិកាទើបស្បើយ។ ប្រមុខរដ្ឋាភិបាលកម្ពុជា លោកហ៊ុន សែន កាល ពីថ្ងៃម្សិលមិញ ទន្ទឹមនឹងបានថ្លែងនូវការកោត សរសើរចំពោះ អាជ្ញាធរទាំងអស់ ពីការខិតខំប្រឹងប្រែងយ៉ាងសកម្មក្នុងការជួយសង្គ្រោះប្រជាពលរដ្ឋរបស់យើងពីទឹកជំនន់។ ខ្ញុំសុំអំពាវនាវដល់អាជ្ញាធរពាក់ព័ន្ធទាំងអស់ ឲ្យបន្តការខិតខំប្រឹងប្រែង ជួយដល់ពលរដ្ឋយើង ក៏ដូចជាចាត់វិធានការជួសជុលផ្លូវ និងហេដ្ឋារចនាសម្ព័ន្ធផ្សេងៗ ដែលរងការខូចខាតបន្ទាប់ពីទឹកស្រកអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ