Air France មានគម្រោងហោះត្រង់មកកម្ពុជា
ឯកអគ្គរដ្ឋទូតបារាំងប្រចាំកម្ពុជាបានថ្លែងប្រាប់លោកនាយករដ្ឋមន្ត្រី ហ៊ុន សែនអំពីគម្រោងរបស់ក្រុមអាកាសចរណ៍បារាំងAir France ដែលចង់បង្កើតការហោះហើរត្រង់មកកម្ពុជា។ នៅក្នុងឱកាសជួបជម្រាបលាលោកនាយករដ្ឋមន្ត្រី បន្ទាប់ពីបានបញ្ចប់អណត្តិរបស់ខ្លួន ឯកអគ្គរដ្ឋទូតបារាំងលោកJean-Francois Desmazières បានស្នើអោយលោកនាយករដ្ឋមន្ត្រីកម្ពុជាគាំទ្ររាល់គម្រោងវិនិយោគ របស់បារាំងនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
ឯកអគ្គរដ្ឋទូតបារាំងប្រចាំកម្ពុជាលោកJean-Francois Desmazièresបានអះអាងប្រាប់លោកនាយករដ្ឋមន្ត្រីខ្មែរហ៊ុន សែនអំពីក្រុមហ៊ុនបារាំងមួយចំនួនដែលកំពុងសំលឹងមើលអំពីការបោះទុនវិនិយោគនៅកម្ពុជានាពេលខាងមុខ។ ឯកអគ្គរដ្ឋទូតបារាំងបានថ្លែងយ៉ាងនេះ នៅក្នុងឱកាសដែលលោកជួបជម្រាបលាលោកនាយករដ្ឋមន្ត្រីហ៊ុន សែនកាលពីថ្ងៃទី១១តុលាម្សិលមិញបន្ទាប់ពីបានបញ្ចប់បេសកកម្មការទូតនៅកម្ពុជា។ លោកJean-François Desmazières បានអះអាងថា ក្រុមហ៊ុនអាកាសចរណ៍បារាំងAir Franceកំពុងពិចារណាអំពីការបង្កើតជើងហោះហើរត្រង់មកប្រទេសកម្ពុជា។
យោងតាមអ្នកនាំពាក្យនៃជំនួបរវាងលោកនាយករដ្ឋមន្ត្រី និងឯកអគ្គរដ្ឋទូតបារាំង ប្រមុខរដ្ឋាភិបាលបានសាទរចំពោះក្រុមហ៊ុនអាកាសចរណ៍បារាំងAir France ប្រសិនបើក្រុមហ៊ុនអាចនឹងប្រតិបត្តិការដូចគម្រោងរបស់ខ្លួនមែន។
ក្រៅពីក្រុមហ៊ុនបារាំងមួយនេះ ឯកអគ្គរដ្ឋទូតបារាំងបានថ្លែងថា ក្រុមហ៊ុនបារាំងផ្សេងទៀតដូចជាក្រុមហ៊ុនដាំអំពៅដែលគ្រោងវិនិយោគនៅក្នុងខេត្តស្ទឹងត្រែង ក្រុមហ៊ុនTotalដែលគ្រោងរុករកប្រេងនៅក្នុងប្លុកមួយនៅក្នុងខេត្តស្វាយរៀង មានកំពុងពិចារណាអំពីលទ្ធភាពនៃការបោះទុននៅកម្ពុជានេះដែរ។ ស្របពេលជាមួយគ្នា ក៏មានក្រុមហ៊ុនដែលប្រើប្រាស់ជំនួយបារាំងដូចជា ក្រុមហ៊ុនកិនស្រូវGoldenriceបានកំពុងមានសកម្មភាពប្រមូលទិញស្រូវអង្ករនៅក្នុងប្រទេសកម្ពុជាដើម្បីនាំចេញទៅក្រៅប្រទេស។ ឯកអគ្គរដ្ឋទូតបារាំងបានស្នើអោយលោកនាយករដ្ឋមន្ត្រី គាំទ្រក្រុមហ៊ុនបារាំងដែលមកបោះទុនវិនិយោគនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ