សមាគមគ្រូបង្រៀនទាមទារដំឡើងប្រាក់ខែអោយដល់២៥០ដុល្លារជូនគ្រូបង្រៀន
សមាគមគ្រូបង្រៀនឯករាជ្យកម្ពុជាទាមទារដំឡើងប្រាក់ខែអោយដល់២៥០ ដុល្លារអាមេរិកជូនគ្រូបង្រៀននៅក្នុងទិវាគ្រូបង្រៀនពិភពលោកដែលនឹង ប្រារព្ធធ្វើឡើងនៅដើមខែតុលាក្រោយនេះ។ បច្ចុប្បន្ននេះ គ្រូបង្រៀននៅបឋមសិក្សានិងមធ្យមសិក្សាទទួលបានប្រាក់បៀវត្សរ៍ក្នុង ចន្លោះពី៤០ទៅ៥០ដុល្លារអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់គី សុខលីមពីទីក្រុងភ្នំពេញ
ប្រាក់ខែគ្រូបង្រៀនគួរតែដំឡើងអោយដល់២៥០ដុល្លារក្នុងមួយខែ។ នេះជាគម្រោងទាមទាររបស់សមាគមគ្រូបង្រៀនឯករាជ្យកម្ពុជា នៅក្នុងឱកាសទិវាគ្រូបង្រៀនពិភពលោក នៅថ្ងៃទី៥ខែតុលាក្រោយនេះ។
នៅថ្ងៃទី៥ខែតុលាខាងមុខនេះ សមាគមគ្រូបង្រៀនឯករាជ្យកម្ពុជាដែលដឹកនាំដោយលោក រ៉ុង ឈុន គ្រោងនឹងធ្វើពិធីដង្ហែញត្តិដាក់ជូនក្រសួងអប់រំ និងរដ្ឋសភាជាតិដើម្បីទាញចំណាប់អារម្មណ៍ពួកគេអោយក្រឡេកមើលតួនាទីសំខាន់របស់គ្រូបង្រៀន នៅក្នុងប្រទេសកម្ពុជា។
លោក រ៉ុង ឈុន ប្រធានសមាគមគ្រូបង្រៀនឯករាជ្យកម្ពុជាបានបញ្ជាក់ថា ការទាមទាររបស់គ្រូបង្រៀន នៅខែក្រោយនេះមានច្រើនចំណុចក្នុងនោះមាន៖ការដំឡើងប្រាក់ខែ ការដំឡើងប្រាក់អតីតភាព ការដំឡើងប្រាក់សម្រាប់កូនប្រពន្ធ និងប្រាក់បង្រៀនបន្ថែមម៉ោង។ គម្រោងទាមទាររបស់សមាគមគ្រូបង្រៀនបានធ្វើឡើង នៅក្នុងកាលៈទេសៈដែលជីវភាពរបស់គ្រូបង្រៀនជួបឧបសគ្គច្រើន។
បច្ចុប្បន្ននេះ គ្រូបង្រៀននៅបឋមសិក្សា និងនៅមធ្យមសិក្សាទទួលបានប្រាក់បៀវត្សរ៍ ក្នុងចន្លោះពី ៤០ទៅ៥០ដុល្លារអាមេរិក។ ចំនួនប្រាក់ខែនេះត្រូវបានគ្រូបង្រៀនរអ៊ូគ្រប់គ្នាថា មានចំនួនតិចតួច និងមិនអាចទ្រទ្រង់ជីវភាពបានគ្រប់គ្រាន់។
ដោយសារតែប្រាក់ខែចាយមិនគ្រប់គ្រាន់យ៉ាងដូច្នេះ ទើបគ្រូបង្រៀនមួយចំនួនធំបានទារប្រាក់ពីកូនសិស្ស នៅក្នុងថ្នាក់រៀនបន្ថែមទៀត។ កូនសិស្សមួយចំនួនត្រូវបង់ប្រាក់ប្រចាំថ្ងៃជូនគ្រូប្រចាំថ្នាក់របស់ពួកគេក្នុងមួយខែ៥ដុល្លារ ឬ១០ដុល្លារក្រោមលេសថា រៀនគួរបន្ថែមម៉ោង។
គ្រូបង្រៀនខ្លះទៀត ឆ្លៀតពេលបង្រៀនគួរឯកជនដើម្បីទទួលបានប្រាក់កម្រៃបន្ថែមទៀត។ គ្រូបង្រៀនតែងតែនិយាយថា ពួកគេមិនចង់យកលុយកាក់ពីកូនសិស្សទេ ប៉ុន្តែការធ្វើយ៉ាងនេះ គឺដោយសារតែពួកគេគ្មានជម្រើស។ ទង្វើប្រមូលលុយកាក់តាមថ្នាក់យ៉ាងដូច្នេះ ធ្វើអោយគ្រូបង្រៀនបាត់បង់កិត្តិយស និងសេចក្តីថ្លៃថ្នូរ។
លោក រ៉ុង ឈុន ប្រធានសមាគមគ្រូបង្រៀនឯករាជ្យកម្ពុជាបាននិយាយថា ប្រសិនបើគ្រូបង្រៀនទទួលបានប្រាក់ខែសមរម្យអាចរស់បានពេលនោះ គ្រូបង្រៀននឹងឈប់ប្រព្រឹត្តអំពើមិនល្អនេះទៀតហើយ។ ប្រាក់ខែគ្រូបង្រៀននៅមិនទាន់គ្រប់គ្រាន់មែន ប៉ុន្តែជារៀងរាល់ឆ្នាំ រាជរដ្ឋាភិបាលបានកំណត់នយោបាយដំឡើងប្រាក់ខែប្រចាំឆ្នាំ២០ភាគរយជូនមន្ត្រីទាំងអស់។
អ្នកវិភាគមួយចំនួនអត្ថាធិប្បាយថា ប្រសិនបើរាជរដ្ឋាភិបាលមិនមានលទ្ធភាពដំឡើងប្រាក់ខែជូនមន្ត្រីរាជការអោយបានគ្រប់គ្រាន់ទេនោះ រដ្ឋាភិបាលគួរតែជួយទប់ស្កាត់ការឡើងថ្លៃទំនិញអោយបានជាអតិបរមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ