សហចៅក្រមស៊ើបអង្កេតរបស់តុលាការខ្មែរក្រហម ចេញដីកាដំណោះស្រាយលើសំណុំរឿង ០០២
ទីបំផុតទៅ លោកចៅក្រម យូ ប៊ុនឡេង និងលោកចៅក្រម ម៉ាសែល ឡឺម៉ុង ដែលជាសហចៅក្រមស៊ើបអង្កេត របស់តុលាការកាត់ទោសមេដឹកនាំខ្មែរក្រហម បានសម្រេចដីកាដំណោះស្រាយលើសំណុំរឿង ០០២ ប្រឆាំងអតីតមេដឹកនាំខ្មែរក្រហមកំពូលៗ ៥ រូប រួមមាន៖ នួនជា ខៀវសំផន អៀងសារី អៀងធីរិទ្ធ និងកាំង ហ្កេកអ៊ាវ ហៅ ឌុច។ ដីកាដំណោះស្រាយ ដែលនឹងប្រកាស នៅព្រឹកស្អែក សហចៅក្រមស៊ើបអង្កេត ត្រូវសម្រេចពីការបញ្ជូនសំណុំរឿង ០០២ ទៅបើកសវនាការជំនុំជម្រះ ឬក៏ត្រូវលើកលែងការចោទប្រកាន់លើជនត្រូវចោទទាំង ៥ រូបនោះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ
សេចក្តីប្រកាសព័ត៌មាន នៅថ្ងៃនេះ បញ្ជាក់ថា សហចៅក្រមស៊ើបអង្កេត របស់តុលាការខ្មែរក្រហម លោកចៅក្រម យូ ប៊ុនឡេង និងលោកចៅក្រមបារាំង ម៉ាសែល ឡឺម៉ុង នឹងត្រូវប្រកាសពីដីកាដំណោះស្រាយ លើសំណុំរឿង ០០២ ក្នុងសន្និសីទកាសែត នាព្រឹកថ្ងៃព្រហស្បតិ៍ ទី១៦ ខែកញ្ញា ឆ្នាំ២០១០។
លោក រាជ សម្បត្តិ ប្រធានផ្នែកកិច្ចការសាធារណៈ របស់តុលាការខ្មែរក្រហម បានមាន ប្រសាសន៍ថា សហចៅក្រមស៊ើបអង្កេតទាំងពីររូប នឹងត្រូវប្រកាសពីដីកាដំណោះស្រាយ លើសំណុំរឿង ០០២ ដែលនឹងត្រូវធ្វើការចោទប្រកាន់ស្ថាពរ និងបញ្ជូនរឿងទៅជំនុំជម្រះ ឬក៏ត្រូវលើកលែងការចោទប្រកាន់លើជនត្រូវចោទទាំង ៥ រូប រួមមាន៖ នួនជា, អៀងសារី, អៀងធីរិទ្ធ, ខៀវសំផន និងកាំង ហ្កេកអ៊ាវ ហៅ ឌុច។
លោក រាជ សម្បត្តិ បានបន្ថែមថា នេះជាកិច្ចការ ដែលបានចំណាយពេលយ៉ាងយូរ ចំពោះការស៊ើបអង្កេតលើសំណុំរឿងខ្មែរក្រហម ជាពិសេសលើសំណុំរឿង ០០២។ វាក៏ជាព័ត៌មានដ៏ធំ មួយ ចាប់តាំងពីការកកើតសាលាក្តីចម្រុះនេះ។
ចំពោះព័ត៌មានលម្អិត នៃដីកាដំណោះស្រាយ ដែលត្រូវប្រកាសនៅថ្ងៃស្អែក លោក រាជ សម្បត្តិ មិនធ្វើអត្ថាធិប្បាយទេ នៅថ្ងៃនេះ ដោយទុកឲ្យសហចៅក្រមជាតិ និងអន្តរជាតិ ជាអ្នកប្រកាស នៅព្រឹកស្អែក។
ជាមួយគ្នានោះ ក្នុងសន្និសីទកាសែត នាព្រឹកស្អែកនេះ សហចៅក្រមស៊ើបអង្កេតរបស់តុលាការខ្មែរក្រហម ក៏នឹងត្រូវប្រកាសពីចំនួនជនរងគ្រោះ ដែលត្រូវទទួលស្គាល់ជាផ្លូវការ ជាដើមបណ្តឹងរដ្ឋប្បវេណី លើសំណុំរឿង ០០២។ សំណុំរឿង ០០២ ដែលមានអ្នកដាក់ពាក្យបណ្តឹងសុំតាំងខ្លួនជាដើមបណ្តឹងរដ្ឋប្បវេណីជិត ៤.០០០ នាក់។
កាលពីថ្ងៃទី១៦សីហា សហព្រះរាជអាជ្ញាជាតិ និងអន្តរជាតិ លោកស្រី ជា លាង និងលោក Adrew Carley បានទាមទារឲ្យសហចៅក្រមស៊ើបអង្កេតធ្វើការចោទប្រកាន់ និងបញ្ជូនទៅកាត់ទោសលើមេខ្មែរក្រហម ៤ រូប គឺនួនជា, អៀងសារី, ខៀវសំផន និងអៀងធីរិទ្ធ។ ប៉ុន្តែសហព្រះរាជអាជ្ញា បានស្នើសុំលើកលែងការចោទប្រកាន់លើលោក កាំង ហ្កេកអ៊ាវ ហៅ ឌុច នៅក្នុងសំណុំរឿង ០០២ ដោយសារតែ ឌុច ត្រូវបានកាត់ទោសឲ្យជាប់ពន្ធនាគារ ៣៥ ឆ្នាំរួចហើយ ក្នុងសំណុំរឿង ០០១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ