ប្រធានរដ្ឋសភា៖ ទីប្រឹក្សាច្រើនជាឆន្ទានុសិទ្ធិរបស់គ្រប់ថ្នាក់ដឹកនាំ
លោក ហេង សំរិន ប្រធានរដ្ឋសភា បានលើកឡើងថា ការមានទីប្រឹក្សាច្រើន ជាឆន្ទានុសិទ្ធិ របស់ថ្នាក់ដឹកនាំ ហើយការតែងតាំងទីប្រឹក្សាទាំងនោះ ធ្វើឡើងស្របតាមក្បួនច្បាប់។ ការលើកឡើងរបស់ប្រធានរដ្ឋសភាដូច្នេះ ជាការឆ្លើយតបទៅនឹងសំណើរបស់ក្រុមអ្នកតំណាងរាស្ត្រគណបក្សប្រឆាំង ដែលបានស្វែងរកការពន្យល់បំភ្លឺ អំពី ការចំណាយថវិការាប់លានរៀល ទៅលើទីប្រឹក្សារបស់លោក ងួន ញ៉ិល អនុប្រធានទី១ រដ្ឋសភា ដែលមានទីប្រឹក្សាចំនួន ៧១រូប។
ចុះផ្សាយនៅថ្ងៃ៖
សេចក្តីរាយការណ៍របស់ លី ម៉េងហួរ
តាមរយៈចំណារយ៉ាងខ្លី ទាក់ទងនឹងវិបត្តិទីប្រឹក្សាអនុប្រធានរដ្ឋសភា ចុះកាលបរិច្ឆេទ ថ្ងៃទី ២ ខែកញ្ញាឆ្នាំ ២០១០ ត្រូវបានប្រធានរដ្ឋសភា លោក ហេង សំរិន លើកឡើងថា នេះជាឆន្ទានុសិទ្ធិរបស់គ្រប់ថ្នាក់ដឹកនាំ ដែលបានអនុវត្តស្របតាមនីតិវិធីច្បាប់។
ចំណារ ដែលមានត្រឹមតែស៊ីញ៉េ លើក្បាលលិខិតរបស់ក្រុមអ្នកតំណាងរាស្ត្រ បានបញ្ជូនទៅកាន់គណបក្ស សមរង្ស៊ី នៅថ្ងៃសុក្រនេះ។ វាក៏ជាចម្លើយ តបនឹងក្រុមអ្នកតំណាងរាស្ត្រគណបក្សសមរង្ស៊ី ចំនួន ១៣ រូប ដែលកាលពីថ្ងៃទី ២៧សីហា បានស្នើសុំប្រធានរដ្ឋសភា ឲ្យពន្យល់បំភ្លឺពីការចំណាយថវិកាប្រមាណ ១១២ លានរៀល ទៅលើទីប្រឹក្សាចំនួន ៧១ រូប របស់លោក ងួន ញ៉ិល អនុប្រធានទី ១ នៃរដ្ឋសភា។
ចម្លើយរបស់ប្រធានរដ្ឋសភាយ៉ាងខ្លីដូច្នេះ មិនបានធ្វើឲ្យតំណាងរាស្ត្របក្សប្រឆាំងអស់ចិត្តនោះទេ។ លោក ជា ប៉ូច ដែលបានចុះហត្ថលេខាលើលិខិតរបស់ក្រុមអ្នកតំណាងរាស្ត្រគណបក្សសមរង្ស៊ី បានបញ្ជាក់នៅថ្ងៃនេះថា លោកចង់បានចម្លើយបញ្ជាក់ពីប្រធានរដ្ឋសភា នូវចំនួនពិតប្រាកដនៃទីប្រឹក្សារបស់លោក ងួន ញ៉ិល អនុប្រធានទី ១រដ្ឋសភា ថាតើទីប្រឹក្សាដ៏ច្រើនរហូតដល់ ៧១ នាក់នោះ មានតួនាទីធ្វើអ្វីខ្លះ? ហើយមានការតែងតាំងពិតប្រាកដ ពីព្រះមហាក្សត្រ ដែរឬទេ?។
នៅថ្ងៃនេះ គេមិនអាចទាក់ទងលោក ងួន ញ៉ិល បានទេ។ ក៏ប៉ុន្តែកាលពីពេលកន្លងមក លោក ងួន ញ៉ិល ដែលជាសមាជិកគណៈអចិន្ត្រៃយ៍គណបក្សប្រជាជនកម្ពុជា បានលើកឡើងថា ទីប្រឹក្សារបស់លោក ដែលគណបក្សប្រឆាំងលើកឡើងនោះ មានយូរតាំងតែពីជំនាន់សម្តេចក្រុមព្រះ នរោត្តម រណឫទ្ធិ នៅធ្វើជាប្រធានរដ្ឋសភា។ ការតែងតាំងទីប្រឹក្សា ឬជំនួយការទាំងនោះ សុទ្ធតែមានការឯកភាពពីលោក ហេង សំរិន ប្រធានរដ្ឋសភា។
ជាមួយនឹងការលើកឡើងដូច្នេះ លោក ងួន ញ៉ិល បានពន្យល់ថា នៅក្នុងការសម្របសម្រួលនយោបាយ ដែលមានអ្នកនយោបាយខ្លះ មកចុះចូលជាមួយគណបក្សប្រជាជនកម្ពុជា ក្នុងពេលកន្លងមក ក៏មានការតែងតាំងបញ្ជីឈ្មោះជាង ៣០ រូប ដើម្បីឲ្យធ្វើជាទីប្រឹក្សារបស់លោកនៅរដ្ឋសភាផងដែរ។
សូមរម្លឹកថា វិបត្តិទីប្រឹក្សា បានកើតឡើងនៅរដ្ឋសភា ចាប់តាំងពីអាណត្តិរបស់សម្តេចក្រុមព្រះ នរោត្តម រណឫទ្ធិ នៅជាប្រធានរដ្ឋសភា ដែលកាលណោះ នាំឲ្យលោកនាយករដ្ឋមន្ត្រី ហ៊ុន សែន ធ្វើការរិះគន់យ៉ាងខ្លាំង ចំពោះការចំណាយថវិកាដ៏ច្រើនទៅលើទីប្រឹក្សាទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ