លោកកឹម សុខាស្នើសុំពន្យាការចូលខ្លួនទៅតុលាការ
លោក កឹម សុខាប្រធានគណបក្សសិទ្ធិមនុស្សបានស្នើទៅព្រះរាជអាជ្ញារងតុលាការ រាជធានីភ្នំពេញ ដើម្បីសុំពន្យាពេលនៃការចូលខ្លួនបំភ្លឺតាមដីការកោះហៅរបស់តំណាង អយ្យាការ។ លោក កឹម សុខាបានផ្តល់ហេតុផលថា លោកកំពុងជាប់បំពេញបេសកកម្មនៅក្រៅប្រទេសរហូតដល់ថ្ងៃទី ១៤ខែតុលា។ លោកសុខ រឿនព្រះរាជអាជ្ញារងសាលាដំបូងរាជធានីភ្នំពេញអះអាងថា លោកបានឃើញលិខិតរបស់លោកកឹម សុខាហើយ ប៉ុន្តែស្ថាប័នអយ្យការមិនទាន់ធ្វើការសម្រេចយ៉ាងណានៅឡើយទេ។
ចុះផ្សាយនៅថ្ងៃ៖
សេចក្តីរាយការណ៍របស់ លាង ដឺលុច
ពីសហរដ្ឋអាមេរិកដែលលោកអះអាងថា កំពុងបំពេញបេសកកម្មនោះ លោកកឹម សុខាប្រធានគណបក្សសិទ្ធិមនុស្ស បានសរសេរប្រាប់លោកសុខ រឿនព្រះរាជអាជ្ញារងតុលាការរាជធានីភ្នំពេញ ដើម្បីស្នើសុំពន្យាពេលនៃការចូលខ្លួនទៅសាលាដំបូងនេះ។
លោកកឹម សុខា បានសរសេរថា ពីថ្ងៃទី ២៧ខែកក្កដាដល់ថ្ងែទី ១៤ខែតុលាឆ្នាំ ២០១០ លោកមិនមានវត្តមាននៅក្នុងប្រទេសនោះទេ ដោយលោកជាប់បំពេញភារកិច្ចនៅសហរដ្ឋអាមេរិក និងប្រទេសកាណាដា។ ជាគម្រោងដែលលោកបានរៀបចំរួចពីមុនមកហើយ។ ដូច្នេះលោកកឹម សុខាបានសរសេរប្រាប់ព្រះរាជអាជ្ញារងសាលាដំបូងរាជធានីភ្នំពេញលោកសុខ រឿន ថាលោកសុំពន្យាពេលនៃការចូលខ្លួនបំភ្លឺសំណុំរឿងនៅពេលសមស្របណាមួយ នៅក្រោយថ្ងៃទី ១៥ខែតុលា។
នៅមិនទាន់មានចម្លើយយ៉ាងណាចំពោះការស្នើរបស់កឹម សុខានេះនៅឡើយទេ។ លោកសុខ រឿន ព្រះរាជអាជ្ញារងសាលាដំបូងរាជធានីភ្នំពេញបានថ្លែងប្រាប់វិទ្យុបារាំងអន្តរជាតិថា លោកបានឃើញលិខិតរបស់លោកកឹម សុខារួចហើយ ហើយលោកក៏បានដាក់សំណើរបស់លោកកឹម សុខាទៅប្រធានស្ថាប័នអយ្យាការ ដើម្បីធ្វើការសម្រេចដែរ កាលពីរសៀលថ្ងៃព្រហស្បតិ៍នេះ។
កាលពីថ្ងៃទី ៣០សីហា ព្រះរាជអាជ្ញារងតុលាការរាជធានីលោកសុខ រឿន បានចេញដីកាអញ្ជើញលោកកឹម សុខាប្រធានគណបក្សសិទ្ធិមនុស្ស អោយចូលខ្លួនទៅតុលាការនៅថ្ងៃទី ៦ខែកញ្ញានេះ ដើម្បីឆ្លើយបំភ្លឺទៅនឹងពាក្យបណ្តឹងរបស់លោកឈឹម ផលវរុណ និងលោកសូវីន សាន់ដែលបានប្តឹងលោកពីបទរំលោភលើសេចក្តីទុកចិត្ត និងការក្លែងលិខិតឯកជន។ គួរបញ្ជាក់ថា ដើមបណ្តឹងគឺជាអតីតបុគ្គលិកមជ្ឈមណ្ឌលសិទ្ធិមនុស្សកម្ពុជា ដែលលោកកឹម សុខាធ្លាប់ធ្វើជាប្រធាន។ ក្រុមអតីតបុគ្គលិកមជ្ឈមណ្ឌលសិទ្ធិមនុស្សមួយក្រុមបានប្តឹងលោកកឹម សុខាជាច្រើនករណី នៅក្នុងឆ្នាំ ២០០៦។
នៅថ្ងៃព្រហស្បតិ៍នេះ ទន្ទឹមនឹងការសុំពន្យាពេលនៃការចូលខ្លួនបំភ្លឺនៅក្នុងស្ថាប័នអយ្យាការ របស់លោកកឹម សុខា គណបក្សសិទ្ធិមនុស្សក៏បានចេញសេចក្តីថ្លែងការណ៍មួយកត់សម្គាល់ថា ករណីរបស់លោកកឹម សុខាត្រូវបានតុលាការចាត់ការយ៉ាងតក់ក្រហល់ ហើយសង្ស័យថា ការចាត់ការលើលោកកឹម សុខានេះអាចជាករណីនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ