ពលរដ្ឋខ្មែរ ៥ នាក់ទៀត ត្រូវបានចាប់បញ្ជូនពីអាមេរិក
ពលរដ្ឋខ្មែរ ៥ នាក់ ដែលគេអះអាងថា បានធ្វើអន្តោប្រវេសន៍ និងប្រព្រឹត្តអំពើខុសច្បាប់ នៅសហរដ្ឋអាមេរិក ត្រូវបានចាប់បញ្ជូន ហើយគ្រោងនឹងមកដល់កម្ពុជា នៅថ្ងៃព្រហស្បតិ៍ ទ ២កញ្ញា ស្អែកនេះ។ មន្ត្រីកម្ពុជា អះអាងថា ជនទាំង ៥ នាក់នោះ ជាមនុស្សធ្លាប់ទទួលទោស ជាប់ពន្ធនាគារនៅអាមេរិក ហើយមានបុរសម្នាក់ បានជាប់ពន្ធនាគារ រហូតដល់ ១៥ ឆ្នាំ ក្នុងរឿងឃាតកម្ម។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លីម៉េងហួរ
មិនមែនជាលើកទី ១ទេ ដែលសហរដ្ឋអាមេរិក បានចាប់បញ្ជូនពលរដ្ឋកម្ពុជា ភាគច្រើនជាយុវវ័យ ដែលគេហៅថា ប្រភេទ Gangster និងបានធ្វើអន្តោប្រវេសន៍ រស់នៅខុសច្បាប់ ព្រមទាំងអ្នកខ្លះប្រព្រឹត្តអំពើល្មើសឧក្រិដ្ឋ នៅលើទឹកដីអាមេរិក មកកាន់ប្រទេសកម្ពុជា។ ចាប់តាំងពីឆ្នាំ ២០០២ មកដល់ពេលនេះ មានពលរដ្ឋខ្មែររស់នៅអាមេរិកចំនួន ២២៩ នាក់ ត្រូវបានបញ្ជូនមកកាន់ប្រទេសកម្ពុជា។
លោកឧត្តមសេនីយ៍ ពិន ពិសិទ្ធិ ប្រធាននាយកដ្ឋានអន្តោប្រវេសន៍ របស់ក្រសួងមហាផ្ទៃ បានលើកឡើងថា ពលរដ្ឋខ្មែរចំនួន ៥ នាក់ផ្សេងទៀតនឹងត្រូវបញ្ជូនមកដល់ទីក្រុងភ្នំពេញ នាថ្ងៃព្រហស្បតិ៍ស្អែក។ លោកបន្តថា ពលរដ្ឋខ្មែរ ដែលធ្វើមាតុភូមិនិវត្តន៍ពីអាមេរិកទាំងនោះ សុទ្ធតែបានប្រព្រឹត្តល្មើសច្បាប់ និងបានទទួលទោសនៅអាមេរិក។ ដូច្នេះនៅពេលមកដល់កម្ពុជា ពួកគេនឹងមិនត្រូវកម្លាំងនគរបាលតាមដាន ឬត្រូវជាប់ទោសទៀតឡើយ។
បើតាមក្រសួងការបរទេស ពលរដ្ឋខ្មែរ ៥ នាក់នោះ ស្ថិតក្នុងចំណោមពលរដ្ឋ ១០ នាក់ ដែលសហរដ្ឋអាមេរិក ត្រូវចាប់បញ្ជូនមកកាន់ប្រទេសកម្ពុជានៅលើកនេះ។ សហរដ្ឋអាមេរិក និងកម្ពុជា បានចុះកិច្ចព្រមព្រៀង កាលពីឆ្នាំ ២០០២ ដើម្បីធ្វើបត្យាប័ន បញ្ជូនត្រឡប់ទៅកាន់ប្រទេសកំណើត នូវជនកម្ពុជា និងអាមេរិកណា ដែលបានប្រព្រឹត្តបទឧក្រិដ្ឋ។
ក៏ប៉ុន្តែក្រុមយុវជនខ្មែរ រស់នៅអាមេរិកភាគច្រើន បានសម្តែងការមិនពេញចិត្ត ដោយអះអាងថា ពួកគេរស់នៅធំធាត់លើទឹកដីអាមេរិក ហើយមិនចេះអក្សរខ្មែរ បែរជាត្រូវចាប់បញ្ជូន ត្រឡប់មករស់នៅកម្ពុជា ដោយជួបការលំបាក ពិសេសត្រូវបែកបាក់ក្រុមគ្រួសារជាដើម។
ចំពោះការបញ្ជូនត្រឡប់ជនកម្ពុជាពីអាមេរិកនេះ អង្គការក្រៅរដ្ឋាភិបាល ដែលធ្វើការសម្របសម្រួល ដើម្បីឲ្យពួកគេ អាចរស់នៅក្នុងសង្គមកម្ពុជា បានលើកឡើងថា ក្នុងចំណោមពលរដ្ឋខ្មែរទាំង ២២៩ នាក់ ដែលត្រូវបានបញ្ជូនពីអាមេរិក ចាប់តាំងពីឆ្នាំ ២០០២ មកដល់កម្ពុជា មានម្នាក់ បានធ្វើអត្តឃាតសម្លាប់ខ្លួន ហើយជាច្រើននាក់ផ្សេងទៀត បានព្យាយាម សម្លាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ